Dual PanelJetero ndahi Musa
1Jetero, mama Musa, imam Midian, megi kerina si nggo ibahan Dibata man Musa ras man bangsa Israel, sanga IbabaiNa bangsa e ndarat i Mesir nari.
2Emaka reh ia ndahi Musa, janah ibabana pe Sipora, ndehara Musa, si mbarenda isuruhna lebe mulih.
3Ikut pe duana anak Sipora, eme Gersom ras Elieser ( Nai nggo pernah bagenda nina Musa, "Aku kalak pertandang i taneh kalak," emaka ibahanna gelar anakna sada Gersom.
4Tole pe nggo ka ikatakenna nina, "Dibata bapangku nampati aku maka la aku ibunuh raja Mesir," emaka ibahanna gelar anakna si sada nari Elieser.)
5Reh Jetero ras ndehara Musa bage pe anakna si dilaki duana ku gurun pasir i ja Musa sangana erkemah deher ku deleng si badia.
6Nggo leben iberitakenna man Musa maka reh atena kerina,
7emaka ialo-alo Musa mamana, erjimpuh ia i lebe-lebena, jenari iemana mamana. Kenca ia sisalam-salamen bengket ia ku bas kemah Musa.
8Ituriken Musa man Jetero kerina si nggo ibahan TUHAN man raja ras bangsa Mesir, guna nelamatken bangsa Israel. Iturikenna pe man bana kerna kiniseran-kiniseran si man bentasen bangsa Israel i bas perdalanen e, janah uga TUHAN nggo nampati bangsa Israel.
9Kenca ibegi Jetero kerina si e, meriah akapna,
10emaka nina, "Terpujilah TUHAN, si nelamatken kam i bas raja ras bangsa Mesir nari! Terpujilah TUHAN si nelamatken BangsaNa i bas perbudaken nari!
11Genduari nggo kueteh maka TUHAN belinen asa kerina dibata-dibata, sabap Ia erbahan si bage tupung bangsa Israel ihina kalak Mesir."
12Kenca bage ibaba Jetero sada persembahen tutungen ras persembahen-persembahen si deban guna ipersembahken man Dibata. Harun ras kerina peminpin Israel reh ndahi Jetero, janah ras-ras ia man pangan si badia e iadep-adepen Dibata.
Piga-piga kalak itentuken jadi hakim (Ul 1:9-18)
13Pepagina Musa ngerunggui perubaten-perubaten si lit turah i bas sapih-sapih kalak Israel, emaka ia terus sibuk pagi-pagi nari seh berngi.
14Kenca idah Jetero kerina dahin si arus idahi Musa, nungkun ia nina, "Kai nge si ibahanndu man bangsa enda? Ngkai maka sekalak kam ngenca ndahikenca, sedangken bage teremna rayat tedis erpagi-pagi nari seh berngi nungkun man bandu?"
15Nina Musa erjabap, "Si enda la banci la kubahan sabap kalak enda reh ndahi aku gelah ietehna kai sura-sura Dibata.
16Adi lit dua kalak si rubati, reh ia ndahi aku, emaka aku erbahan keputusen si apai si benar, jenari kuturiken man bana duana pedah ras undang-undang Dibata."
17Tapi nina Jetero man Musa, "Langa tengteng perbanndu e.
18Kam pe latih akapndu, kalak enda pe kerina bage ka. Adi sekalak kam ngenca ndahisa, mbuesa si man dahinndu e.
19Genduari banci kubereken man bandu nasehat si mehuli, janah Dibata tentu ras kam. Payo tuhu kam si mewakili bangsa enda ngadap man Dibata janah nehken perubaten-perubatenna man BaNa.
20Arus pe iajarkenndu man bana perentah-perentah Dibata, janah nerangkenca man bana uga arusna ia nggeluh, ras kai si arus ibahanna.
21Tapi tambah si e, arus pe ipilihndu piga-piga kalak si ngasup jadi peminpin bangsa enda, eme ngasup minpin 1000 kalak, seratus kalak, lima puluh kalak, ras sepuluh kalak. Kalak e kerina arus mbiar man Dibata, banci iteki, janah la nggit isogok.
22Tugaskenlah ia kerina jadi hakim-hakim si tetap man bangsa enda. Soal-soal si sulit banci isehkenna man bandu, tapi perkara-perkara si kitik ia saja mutuskenca. Alu bagenda tentu ernahangna iakapndu, sabap nggo kam ras-ras maba babanndu si mberat e.
23Adi ibahanndu bagenda, bagi si iperentahken Dibata, la kam ngelabuh janah kalak enda pe banci mulih ku rumah, perkarana pe dung."
24Ibegiken Musa nasehat mamana Jetero,
25emaka ipilihna kalak si ngasup jadi peminpin i bas kalak Israel nari kerina. Itugaskenna ia jadi si minpin 1000 kalak, seratus kalak, lima puluh kalak, ras sepuluh kalak.
26Dahinna eme kap jadi hakim si tetap i tengah-tengah bangsa e, maba perkara-perkara si sulit man Musa, tapi perkara-perkara si kitik ia jine mutuskenca.
27Kenca ikataken Musa mejuah-juah man Jetero, emaka mulih mamana e ku negerina.