Dual PanelKalak Israel ngenanami kiniseran i negeri Mesir
1Enda me gelar-gelar anak Jakup si lawes ras ia ku Mesir, sekalak-sekalak ras keluargana:
2Ruben, Simeon, Lewi, Juda,
3Isakar, Sebulon, Benyamin,
4Dan, Naptali, Gat, Aser
5Kesusuren Jakup i bas si enda nari kerina lit pitu puluh kalak. Tapi Jusup nggo leben ringan i Mesir.
6Jenari mate me Jusup ras senina-seninana, bage pe kerina si sebekbek ras ia,
7tapi kesusurenna, eme kalak Israel, nterem kal anakna. Dungna nggo nterem kal ia janah megegeh pe, seh maka idemina negeri Mesir.
8Jenari erkuasa me i Mesir sekalak raja si mbaru, si la meteh sitik pe kerna Jusup.
9Ikatakenna man rayatna nina, "Kita nggo terancam ibahan bangsa Israel enda, sabap seh kal ia teremna janah megegeh pe.
10Kune kenca terjadi perang, banci jadi ipersadana arihna ras musuhta merangi kita, gelah banci ia lawes i bas negeri enda nari. Arus dage sidarami dalan gelah ula ia nteremsa."
11Emaka isuruh bangsa Mesir me mandur-mandur pengawas kerja paksa guna nakiti ia alu mereken dahin si mberat man bangsa Israel. Kalak Israel ipaksa majekken kota-kota Pitom ras Ramses jadi pusat perbekalen man raja.
12Tapi erkelekna bangsa Israel itindas, reh teremna ka ras reh ngasakna ia. Emaka mbiar bangsa Mesir man bangsa Israel.
13Emaka iusahaken bangsa Mesir gelah latih akap bangsa Israel nggeluh alu maksaken ia alu perbudaken si kejam. Alu kejam ipaksana bangsa Israel erdahin majekken bangunen-bangunen bage pe erdahin i bas juma.
14(Kel 1:13)
15Jenari iperentahken raja Mesir man Siprah ras Puah, eme dua kalak bidan si nampati diberu kalak Heber nina,
16"Adi isampatindu diberu kalak Heber mupus, bunuh anakna e adi dilaki; tapi adi diberu, pelepas saja nggeluh."
17Tapi mbiar bidan-bidan e man Dibata, emaka la ipatuhina perentah raja; emaka ipelepasna saja anak si dilaki nggeluh.
18Erkiteken si e idilo raja bidan ndai duana jenari isungkunina nina, "Ngkai maka bage perbahanenndu? Ngkai maka la ibunuhndu kerina anak dilaki si tubuh?"
19Erjabap ia duana nina, "Diberu kalak Heber la seri ras diberu kalak Mesir; diberu kalak Heber murah kal akapna mupus, janah ope denga sada i bas kami seh i je, anakna nggo tubuh."
20Erkiteken mbiar bidan-bidan enda man Dibata, emaka mehuli perbahanen Dibata man bana, janah iberena pe ia manteki jabuna sekalak-sekalak. Bangsa Israel terus ertambah-tambah ras reh gegehna.
21(Kel 1:20)
22Kedungenna ipedarat raja perentah man kerina rayatna nina, "Ambekkenlah kerina anak dilaki bangsa Heber si mbaru tubuh ku Lau Nil, tapi kerina anak diberu pelepas nggeluh."