Alkitab Mobile SABDA
[VER] : [KARO]     [PL]  [PB] 
 <<  Keluaran 24 >> 

Padan Dibata ras bangsa Israel iesahken

1Nina TUHAN man Musa, "Mari ku datas deleng njumpai Aku; reh kam ras Harun, Nadap, Abihu ras pitu puluh kalak peminpin-peminpin bangsa Israel; janah erjimpuh kam nembah man bangKu tupung kam ndauh-ndauh denga.

2Ise pe la banci ndeher ras Aku seakatan kam ngenca. Jelma si nterem la banci reh ku datas deleng."

3Lawes Musa ngataken kerina perentah TUHAN man bangsa Israel bage pe kerina PeraturenNa, janah ras-ras ia kerina ngaloi nina, "Kerina si ikataken TUHAN nggit kami ngelakokenca."

4Isuratken Musa kerina perentah TUHAN. Pepagina, lampas erpagi-pagi, ipajekkenna sada batar-batar ingan persembahen i teruh deleng e, janah ipajekkenna pe sepulu dua tunggul batu, sada guna tep-tep suku bangsa Israel si sepulu dua.

5Jenari isuruhna piga-piga kalak anak perana nutung persembahen man TUHAN bage pe piga-piga lembu ipersembahkenna jadi persembahen persadan.

6Ibuat Musa setengah dareh asuh-asuhen e, kenca bage itamakenna i bas piga-piga mangkuk; setengah nari ipirpirkenna ku batar-batar e.

7Kenca bage ibuatna kitap perpadanen e, eme ingan perentah TUHAN isuratken, emaka iogekenna alu sora megang man bangsa Israel. Nina kerina ngaloi, "Iikutken kami TUHAN janah ilakoken kami kerina si IperentahkenNa."

8Jenari ibuat Musa dareh si i bas mangkuk ndai, ipirpirkenna ku jelma si nterem. Nina musa man bangsa e, "Enda me dareh tanda pengesahen perpadanen si ibahan TUHAN ras kam sanga IberekenNa kerina perentah-perentah enda man bandu."

9Musa, Harun, Nadap, Abihu ras pitu puluh kalak peminpin-peminpin kalak Israel nangkih ku datas deleng e.

10Janah iidahna Dibata bangsa Israel. I teruh NaheNa lit teridah bagi lante batu si meherga kal, rupana biru bagi rupa langit.

11La isakiti Dibata peminpin-peminpin pilihen bangsa Israel e; idahna Dibata, jenari man ras minem kalak ndai.

Musa i datas Deleng Sinai

12Nina TUHAN man Musa, "Reh lah kam ku datas deleng njumpai Aku, gelah sanga kam i je, Kubereken man bandu dua lambar papan batu si isina kerina undang-undang si nggo Kusuratken guna pengajaren man bangsa Israel."

13Ersikap Musa ras juak-juakna Josua, jenari berkat nangkih deleng si badia e.

14Nina Musa man kerina peminpin-peminpin e, "Timai kami i bas ingan erkemah enda seh kami mulih ka. Harun ras Hur tading i jenda ras kam, emaka ise gia si lit perkarana si man cakapenken banci isehkenndu man kalak enda."

15Lawes Musa ku Deleng Sinai, janah lit embun si nutupisa.

16TUHAN reh ku datas deleng e i bas terang si ersinalsal. Man bangsa Israel, terang e teridah bagi api si gurlah i bas tampuk deleng e. Embun ndai nutupi deleng enem wari dekahna, janah i bas wari si pepituken erlebuh TUHAN man Musa i bas embun e nari.

17(Kel 24:16)

18Musa nangkih ku datas deleng e, mengketi embun. I je me ia tading empat puluh wari empat puluh berngi dekahna.


  Share Facebook  |  Share Twitter

 <<  Keluaran 24 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran