Alkitab Mobile SABDA
[VER] : [KARO]     [PL]  [PB] 
 <<  Matius 21 >> 

Surak-surak si meriah i bas pintu gerbang Kuta Jerusalem (Mrk 11:1-11; Luk 19:28-40; Yoh 12:12-19)

1Kenca Jesus ras ajar-AjarNa seh i Betpage, i uruk Seton, nggo ndeher ku Jerusalem, isuruh Jesus dua kalak ajar-AjarNa leben.

2Nina, "To lawes ku kuta si arah lebendu ah; kenca seh kam ku bas kuta e, idapetindu kari sada kalde tambat dingen anakna deherken ia. Osari nalina jenari tegu duana ku jenda.

3Adi lit kalak nungkun nindulah, 'Perlu Tuhan'; kenca bage nindu minter nge kari ipelepasna kalde e ibabandu."

4Si enda jadi gelah seh kai si nggo ikataken Dibata arah nabi nina,

5"Katakenlah man Kota Sion, genduari reh Rajandu ndahi kam, meteruk UkurNa IersakNa kalde, anak kalde singuda denga."

6Jenari lawes ajar-ajar ndai, idalankenna kai si nggo ikataken Jesus man bana.

7Iteguna kalde e ras anakna. Kenca ikimbangken ajar-ajar e uisna i gurung kalde ndai, kenca bage maka iersak Jesus.

8Kalak si nterem ngkimbangken uisna i dalan. Lit ka deba itektekna lambe jenari iamparkenna i dalan.

9Kalak si nterem si erdalan arah lebe Jesus ras arah PudiNa ersurak-surak nina, "Pujin man Anak Daud! Ipasu-pasu Dibata Ia si reh i bas gelar Tuhan! Pujilah Dibata!"

10Kenca bengket Jesus ku bas Kota Jerusalem guntar belang-belang kota e. Nungkun anak kota e nina, "Ise kin Ia?"

11Erjabap kalak si nterem e, "Enda kap Jesus, Nabi i kuta Nasaret daerah Galilea nari."

Jesus bengket ku Rumah Pertoton kalak Jahudi (Mrk 11:15-19; Luk 19:45-48; Yoh 2:13-22)

12Bengket Jesus ku Rumah Pertoton IpelawesNa kerina kalak si erbinaga ras si nukur i je. ItunggalingkenNa meja-meja kalak si nukari duit bage pe bangku-bangku kalak si erbinaga nderapati.

13Jenari nina man kalak e, "Lit kap tersurat i bas Pustaka Si Badia maka nina Dibata, 'RumahKu igelari me pagi Rumah Pertoton.' Tapi ijadikenndu Rumah e jadi asar penamun."

14Jenari reh kalak pentang ras kalak mate serapen ndahi Jesus i bas Rumah Pertoton e; ipepalem Jesus ia.

15Ngidah tanda sengget si ibahan Jesus e, ngilas ate imam-imam si mbelin ras guru-guru agama. Bage pe ngilas atena anak-anak si ersurak-surak i bas Rumah Pertoton si ngataken, "Pujin man Anak Daud!"

16Emaka isungkun kalak enda Jesus nina, "IbegiNdu nge kai si ikataken anak-anak enda?" Erjabap Jesus, "Kubegi! Langa kin pernah iogendu i bas Pustaka Si Badia kerna si e? I je lit kap tersurat, 'Nggo iajarindu danak-danak ras anak si minem denga guna ngendeken puji-pujin si serta.'"

17Jenari itadingken Jesus kalak e, lawes Ia ku Betani janah i je Ia erberngi.

Isumpahi Jesus batang ara (Mrk 11:12-14, 20-24)

18Pepagina lampas erpagi-pagi, asum Jesus i perdalanen mulih ku Jerusalem, melihe Ia.

19I tepi dalan IdahNa batang ara. IdeheriNa batang ara e, tapi la lit buahna, bulungna ngenca mbur. Emaka nina Jesus man batang ara e, "Asa ndigan pe kam lanai erbuah!" Jenari minter kerah batang ara ndai.

20Ngidah si e mamang kal ate ajar-AjarNa. Emaka nina ajar-ajar e man Jesus, "Kuga maka bage kal pedasna batang ara e kerah?"

21Erjabap Jesus, "Ingetlah! Adi tek kam man Dibata dingen la monce-once ukurndu, ngasup kap kam erbahanca bagi si nggo Kubahan nandangi batang ara enda; janah labo si e, tapi ngasup pe kam ngataken man uruk enda, 'Angkatlah bandu jenari ambekken bandu ku lawit,' janah jadi me bage!

22Adi tek kam, ialokenndu kap i bas Dibata nari kai saja si ipindondu man BaNa arah pertotonndu."

Penungkunen kerna kuasa Jesus (Mrk 11:27-33; Luk 20:1-8)

23Jenari bengket ka Jesus ku Rumah Pertoton kalak Jahudi; asum Ia ngajar reh piga-piga imam si mbelin ras peminpin-peminpin kalak Jahudi njumpai Ia nina, "Kuasa kai lit i bas Kam erbahan si enda kerina? Ise mereken Kuasa e man BaNdu?"

24Erjabap Jesus, "Kusungkun kam lebe, janah adi ijabapndu kari penungkunenKu, Kukataken man bandu Kuasa kai lit i bas Aku erbahan si enda kerina.

25I ja nari rehna kuasa Johanes Peridiken, i bas Dibata nari ntah i bas manusia nari?" Emaka sisungkun-sungkunen ia sapih-sapih ia nina, "Kuga ninta? Adi ninta, 'I bas Dibata nari,' kugapa pe NiNa, 'Adi bage, ngkai maka la kam tek man Johanes Peridiken?'

26Tapi adi ninta, 'I bas manusia nari,' mbiar kita jelma si nterem, sabap kerina kalak e erpengakap maka Johanes Peridiken nabi."

27Emaka erjabap kalak e man Jesus, "La ieteh kami." Perbahan si e nina Jesus man bana, "Aku pe la Kukataken man bandu alu kuasa kai Kubahan si enda."

Perumpaman kerna dua kalak anak

28"Tapi kuga pengakapndu kerna si enda? Lit me sekalak perbapan, anakna dua kalak dilaki. Nina man anakna sintua, 'O anakku, to erdahin kam sekali enda i kebun anggur.'

29Erjabap anakna e, 'Banci bapa,' tapi la idalankenna.

30Jenari ikatakenna man anakna singuda si ikatakenna man anakna sintua ndai. Ngaloi anakna singuda e, 'Aku lang,' tapi dungna erkadiola ia, emaka lawes ia erdahin ku kebun anggur e.

31Si apai dage i bas si dua kalak enda nehken sura-sura bapana?" Erjabap kalak e, "Anak singuda." Emaka nina Jesus man bana, "Leben nge pemungut cukai ras diberu si dahinna erlua-lua bengket Kinirajan Dibata asa kam.

32Sabap kerehen Johanes Peridiken nuduhken man bandu dalan kegeluhen si ituduhken Dibata, janah la kam tek; tapi pengalo cuke ras diberu-diberu si pendahinna erlua-lua e, tek. Janah aminna nggo pe idahndu si e, lalap la erkusur ukurndu dingen lalap kam la tek man Tuhan."

Perumpaman kerna si newa kebun anggur (Mrk 12:1-12; Luk 20:9-19)

33Nina Jesus, "Begiken lah perumpaman enda. Lit sekalak si nuan anggur i bas jumana Jenari ibidena kelewet. Ikurukna lubang ingan merehi buah anggur janah ipajekkenna sada menara ingan erjaga. Kenca bage isewakenna kebun e man kalak si newa, Jenari lawes ia ku negeri si deban.

34Kenca seh peranin buah anggur, isuruh tuan e juak-juakna ngelegi sewa kebun e.

35Tapi itangkap si newa kebun ndai juak-juak e, deba ipekpekina, deba ibunuhna janah deba ibenterina alu batu.

36Isuruh tuan e ka juak-juak si deban teremen asa si arah lebe, tapi e pe bagi si arah lebe ndai ka nge ibahanna.

37Emaka dungna anakna jine isuruhna, sabap nina i bas ukurna, 'Tentu mehangke ia ngenehen anakku.'

38Tapi asum idah si newa ndai anak tuan e nina sapih-sapih ia, 'Enda kap anak tuan si mada kebun anggur enda. Mari si bunuh ia gelah man banta kebunna enda.'

39Emaka itangkapna anak tuan e, iambekkenna ku darat kebun Jenari ibunuhna.

40Dage, kenca reh tuan si mada kebun e, kuga nge ibahanna si newa kebun anggur ndai?"

41Ngaloi kalak e man Jesus, "Tentu ibunuhna si newa kebun anggur si jahat e, Jenari ipesewakenna kebun e man kalak si deban si nggit mereken sewana i bas paksa peranin."

42Nina Jesus man bana, "Langa kin pernah iogendu kai si tersurat i bas Pustaka Si Badia? Nina, 'Batu si iambekken tukang e kap jadi batu palas. Enda kap perbahanen Tuhan; andiko ulina!'"

43"Dage ingetlah," nina Yesus, "kerina hakndu selaku bangsa Dibata ibuat i bas kam nari jenari ibereken man bangsa si patuh ngikutken perentah Dibata.

44(Ise ndabuh ku batu enda getem me ia; janah ise idabuhi batu e meripuk me ia.")

45Kenca ibegi imam-imam si mbelin ras kalak Parisi perumpaman e, ietehna maka kerna ia me si ikataken Jesus i bas perumpaman e.

46Emaka idaramina dalan nangkap Jesus. Tapi mbiar ia kalak si nterem sabap kalak si nterem ngakui Jesus sekalak nabi.


  Share Facebook  |  Share Twitter

 <<  Matius 21 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran