Alkitab Mobile SABDA
[VER] : [KARO]     [PL]  [PB] 
 <<  Yohanes 21 >> 

Jesus ncidahken DiriNa man pitu kalak ajar-AjarNa

1Kenca si ndai icidahken Jesus ka DiriNa sekali nari man ajar-AjarNa i Dano Tiberias. Bagenda me turi-turinna:

2Asum pulung Simon Petrus, Tomas (si igelari si Kembar), Natanael (anak kuta Kana i daerah Galilea), ras anak-anak Sebedeus bage pe dua kalak nari ajar-ajar Jesus si deban,

3nina Simon Petrus man teman-temanna e, "Ateku lawes njala nurung." Ngaloi teman-temanna e, "Kami pe ikut." Emaka berkat kalak e, inangkihna sada perahu. Tapi i bas berngi si ndai sada nurung pe la idatna.

4Terangkenca wari, tedis Jesus i tepi dano; tapi la Ia itandai ajar-ajar e.

5Iperkuanken Jesus ajar-AjarNa e nina, "O senina, lit nge idatndu nurung?" Erjabap kalak ndai, "Lang, sada pe la lit."

6Emaka nina Jesus man kalak e, "Amburken jalandu kempak kemuhen perahu e, tentu rulih kam." Iamburken kalak ndai jalana, jenari lanai ia ngasup ngerintaksa sabap melala kal nurung i bas.

7Nina ajar-ajar si ikelengi Jesus man Petrus, "Tuhan kap si ngerana man banta e!" Kenca ibegi Simon Petrus maka Tuhan kap si tedis i tepi dano e, ipakena jubahna (sabap ndai nggo itangtangina) jenari lompat ia ku lau.

8Ajar-ajar si deban pe ku tepi ras perahu e janahna ngerintak jala si dem nurung e. Kalak e labo ndauh i tepi nari; kira-kira seratus meter ngenca.

9Kenca seh i daraten, idapetina nggo merara arang, janah i babo api e lit nurung ras roti.

10Nina Jesus man ajar-AjarNa e, "Baba ku jenda piga-piga nurung si mbaru itangkapndu e."

11Lawes Simon Petrus ku perahu, jenari irintakna jalana ndarat. Jala e dem nurung kegalangen, buena seratus lima pulu telu. Amin bage pe buena, labo merigat jala e.

12Nina Jesus man ajar-AjarNa e, "Mari, man kita." Sada pe ajar-ajar e la pang nungkun, "Ise Kam?" Sabap ietehna nge maka Tuhan kap e.

13Emaka ibuat Jesus roti, jenari IberekenNa man kalak ndai. Bage pe nurung e IberekenNa man ajar-AjarNa.

14Enda me petelu kaliken Jesus ncidahken DiriNa man ajar-AjarNa kenca Ia ipekeke i bas si mate nari.

Percakapen Jesus ras Simon Petrus

15Kenca elah man, nungkun Jesus man Petrus nina, "O Simon anak Johanes, kelengen kin atendu Aku asaken ate kalak enda?" Erjabap Simon Petrus, "O Tuhan, ietehndu kap maka keleng ateku Kam." Nina Jesus man bana, "Permakanilah anak biri-biringKu."

16Nungkun ka Jesus pedua kaliken man Petrus, "O Simon, anak Johanes, keleng kin atendu Aku?" Erjabap Simon Petrus, "Keleng Tuhan, IetehNdu kap maka keleng ateku Kam." Nina Jesus man Simon Petrus, "Permakanilah biri-biringKu."

17Petelu kaliken nungkun Jesus man Simon Petrus nina, "O Simon, anak Johanes, keleng kin atendu Aku?" Getem kal pusuh Simon Petrus sabap telu kali nggo Jesus nungkun man bana, "Keleng kin atendu Aku?" Emaka erjabap Simon Petrus, "O Tuhan, kai pe IetehNdu kap. IetehNdu pe maka keleng ateku Kam!" Nina Jesus man bana, "Permakanilah biri-biringKu.

18Kukataken man bandu: Si tuhuna asum kam nguda denga, kam ngaturken dirindu gelah banci lawes ku ja atendu, tapi kenca kam metua, idudurkenndu tanndu janah kalak si deban ngiket kam, jenari ibabana kam ku ingan si la atendu bage."

19(Alu kata enda icidahken Jesus kerna uga kematen Petrus guna mpemuliaken Dibata.) Jenari nina Jesus man Simon Petrus, "Ikutkenlah Aku!"

Kerna ajar-ajar si ikelengi Jesus

20Jenari itulihken Petrus ku pudi; idahna ajar-ajar si ikelengi Jesus. Ajar-ajar si ikelengi Jesus, e ndeher ras Jesus kundul asum Jesus man ras ajar-AjarNa si sepulu dua dingen si nungkun, "O Tuhan ise kin si nandangi ndudurken Kam e?"

21Asum idah Petrus ajar-ajar e nina man Jesus, "O Tuhan kuga kerna ia?"

22Erjabap Jesus, "Adi ateKu nggeluh ia seh Aku reh mulihken, kena kadena kin kam i je? Ikutkenlah Aku!"

23Emaka mbar berita maka ajar-ajar si ikelengi Jesus e la pagi mate. Tapi si tuhuna labo ikataken Jesus maka ajar-ajar si IkelengiNa e la mate! Nina Jesus, "Adi ateKu nggeluh ia seh Aku reh mulihken, kena kadena kin kam i je?"

24Ajar-ajar si ikelengi Jesus e me si ngidah kerina kejadin e dingen ia pe nuratkenca. Sieteh maka kerina si isuratkenna enda tuhu.

Pendungi

25Melala denga perbahanen Jesus si deban. Adi kerina isuratken sada-sadai, kuakap la siat doni enda ingan kitap si isurati e.


  Share Facebook  |  Share Twitter

 <<  Yohanes 21 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel