Dual Panel1Larromi pole Batara mae ri tu Israel, nampa nanyonyo’ Daud lanri ero’Na Napabattu kasukkaranga mae ri anjo bansaya. Nakana Batara ri ia, "Suro bilangi pandudu’na Israel siagang Yehuda."
2Nampa nakanamo Daud mae ri Yoab panglimana tantarana, "A’lampako siagang sikamma komandanna tantaranu mange ri sikontu suku Israel ri sikontu pa’rasanganga untu’ ansuro bilangi panduduka. Erokka’ angngassengi jaina ke’nanga."
3Mingka nakanamo Yoab ri karaenga, "Dasi-dasi nanipa’lappi-lappi jaina ra’ya’ Israel ri Karaeng Allata’alata, sa’genna a’lappi sibilangngang jaina ri kamma-kammaya anne, kammayatompa dasi-dasi kittallasa’ tongija anciniki ke’nanga. Mingka untu’ apa nakiero’ ansuro bilangi taua karaeng?"
4Mingka tuli terasa’na karaenga ri parentana anjo. Jari a’lampami Yoab siagang sikamma perwira tantarana untu’ ansuro bilangi bansa Israel.
5Le’baki a’limbang ri Binanga Yordan, akkemami Yoab siagang ana’ buana ri timboranna Aroër, iamintu se’rea kota niaka ri tangnga-tangngana ka’bung daera Gad. Battu anjorengi ke’nanga nampa a’lampa wara’, mange ri Yaezer,
6nampa tulusu’ mange ri Gilead siagang Kades ri daerana tu Het. Nampa a’lampa ke’nanga mange ri Dan a’lekko kalau’, mange ri Sidon.
7Battu anjorengi ke’nanga nampa a’lampa timboro’ mange ri Tirus iamintu kota niaka pattahanganna. Situlusu’na a’lampami pole ke’nanga mange ri sikontu kotana tu Hewi siagang tu Kanaan, nampa kala’busanna mange ri Bersyeba, bageang timboranna Yehuda.
8Nala’bammi ke’nanga sikontu pa’rasanganga lalang wattu salapang bulang ruampulo allo. Le’baki anjo ammotere’mi ke’nanga mange ri Yerusalem
9nampa a’laporo’ mae ri karaenga antekamma wassele’na anjo pammilangnganga. Jaina tu bura’ne akkullea a’jari tantara iamintu 800.000 tau ri Israel nampa 500.000 tau ri Yehuda.
10Mingka ri le’ba’namo nasuro bilang Daud anjo bansaya, naassemmi kalenna sala, nampa nakanamo mae ri Batara, "O, Batara, teai sipato’ dorakaku! Kipammopporanga’, lanri dongo’na anjo panggaukangku."
11Nakanamo Batara mae ri Na’bi Gad a’jaria panynyambung bicara ri Daud mae ri Batara, "A’lampako siagang pauangi Daud angkanaya laKusuroi ammile ri tallua passala’. Kereanga napilei iami laKugaukang." Ammukona bari’basa’, ri ambangunnamo ri tinrona Daud,
12(24:11)
13battumi Gad andallekang nampa napabattuang anjo kananNa Batara nakana, "Kereanga kipilei karaeng: Anne pa’rasanganga nituju ri bala kacipurang tallun taung sallona, yareka niondangki’ ri musunta lalang tallum bulang sallona, yareka nitujui anne pa’rasanganga ri garring lalang tallung ngallo? Kitappuki kamma-kamma anne apa musti kupabattu mae ri Batara."
14Appialimi Daud angkana, "O, dende’! Ballasa’ma’ inakke! Mingka bajikangngang mami Batara anghukkung ngasengki’ kala rupa tau langhukkunga’; nasaba’ Batara lompo pangngamaseangi."
15Jari appabattumi Batara garring mae ri tu Israel appakkaramula anjo bari’basaka sa’genna wattu le’baka Natantukang Batara. Ri sikontu Israel nia’ 70.000 jaina tau mate.
16Anjo malaeka’Na Batara angngeranga bala kamateang anrapi’mi mange ri tampa’ panggilingang gandunna Arauna, tu Yebus. Ri wattunna Nacini’ Batara angkanaya sadiami anjo malaekaka untu’ amputtai Yerusalem, Napinrami Batara kaputusanNa, siagang ammari anghukkungi anjo bansaya. Nakana ri anjo malaekaka, "Ganna’mi! Ammari mako!"
17Naciniki Daud anjo malaeka’ ambunoai taua, nampa nakana mae ri Batara, "Inakke doraka, lanri inakke anggaukangi anjo kasalanga. Mingka apa kasalanna anjo bansaya? Inakkemo hukkung siagang kaluargaku!"
18Anjo memang alloa nabattu Na’bi Gad andallekang ri Daud na nakana ri ia, "Naikki’ karaeng ri panggilingang gandunna Arauna, siagang appaentengki’ tampa’ pakkoro’bangngang untu’ Batara."
19Jari a’lampami Daud situru’ parentaNa Batara Napabattua tete ri Na’bi Gad.
20Sitabangi anjo wattua attoa’ naung Arauna, na nacini’ karaenga siagang sikamma tau niaka anrurungangi battu mae ri ia. Nasu’ju’mo Arauna ri dallekanna Daud,
21siagang akkuta’nang angkana, "Apa kutaeng paralluta battu mae karaeng?" Appialimi Daud angkana, "Erokka’ amballi anne tampa’ panggilang gandunnu, lanri erokka’ ambangung tampa’ pakkoro’bangngang untu’ Batara anrinni, sollanna ammari anne garring antujuaki’."
22Nakanamo Arauna, "Kiallemi karaeng, siagang kipassareammi mae ri Karaeng Allata’ala apa kikanaya baji’. Anne sapi-sapi untu’ koro’bang nitunu nampa untu’ kayu tunuang akkullei kialle tarungang-tarungang pa’jekoa siagang sikamma papang-papang pa’gilinganga."
23Napassareang kabusuki anjo sikammaya mae ri karaenga siagang nakana, "Dasi-dasi naNatarima Karaeng Allata’ala passareta karaeng."
24Mingka appiali karaenga angkana, "Teako! Eroki kuballi. Tea’ assare passare mae ri Karaeng Allata’alaku battu ri apa kualle bawang-bawanga." Nampa naballimo Daud anjo tampa’ panggiling gandunga siagang sapi-sapia. Ballinna iamintu limampulo doe’ pera’.
25Le’baki anjo ambangummi Daud tampa’ pakkoro’bangngang untu’ Batara anjoreng, siagang assaremi koro’bang nitunu kammayatompa koro’bang passiamakkang. Niturukiammi pappala’ doanna Daud ri Batara, nampa ammarimo anjo garringa ri Israel.