Dual Panel1Nakanamo pole anjo malaeka’ ammakea pakeang lenang, "Ri anjo wattua lammumbai malaeka’ lompoa iamintu Mikhael pajagana bansanu. Nampa lania’ wattu kasukkarang tenaya sanrapanna baku’ nia’na bansa-bansaya. Mingka sikontu tau battua ri bansanu, ia niaka tattulisi’ arenna lalang ri kitta’Na Allata’ala, lanipasalamaki.
2Jai ri ke’nanga mateamo lattallasa’ poleangi; sipa’gang lanakasiaki katallassang mannannunganga na sipa’gang pole lanakasiaki tunaya siagang kapa’risanga sa’genna todong satunggu-tungguna.
3Sikamma pamimping cara’deka laccayai sangkamma cayana langika. Siagang sikamma tau le’baka angngajara’ tau jai untu’ anggaukangi apa bajika siagang adeleka, laccayai sangkamma bintoenga untu’ satunggu-tungguna."
4Nampa nakana pole anjo malaekaka ri nakke, "Daniel, tongkoki anjo kittaka kamma-kamma anne, siagang sarei segele’ sollanna tuli tattongko’ sa’genna ri kala’busang jammanga. Jai tau ansalidiki apa niaka kajariang. Mingka anjo usahana ke’nanga latena sikali matu-matunna."
5Nampa nia’ kucini’ rua tu bura’ne. Anjo se’rea ammentengi ri biring binanga anrinnianga, nampa se’reanga pole ammentengi ri biring binanga ba’leangnganga.
6Anjo se’reanga akkuta’nangi ri anjo ammentenga la’bi ambania mae ri ulunna binangaya angkana, "Angngapapi nalammari anne kajariang-kajariang appakalannasaka?"
7Anjo maraenganga naangkaki rua-rua limanna nai’ ri langika. Kulangngereki assumpa lanri Allata’ala mannannunganga siagang nakana, "Anjo sikamma kajarianga lanarapiki sa’genna tallu sitangnga taung. Punna le’ba’mo passessaya ri umma’Na Allata’ala, lakala’busang tommi anjo sikamma kajariang appakalannasaka."
8Sikontu anjo apa napaua memang kulangngereki, mingka tena nakupahangi. Nampa akkuta’nanga’ angkana, "O karaeng, antekamma batena lakala’busang yangasenna anne?"
9Appialimi angkana, "A’lampamako kamma-kamma anne Daniel, nasaba’ anne kana-kanaya musti nicokkoi siagang nirahasiakangi sa’genna kala’busang jammanga.
10Jai tau laniso’ri siagang lanitangkasi. Ke’nanga ja’dalaka tena nalanapahangi siagang tulusu’ la’gau’ ja’dala’na; iaji bawang cara’deka lampahangi.
11Appakkaramula battu ri allo nipammarina anjo koro’bang allo-alloa siagang sikamma appakamalla’ niarenga Kaja’dallang Angngancuru’ nipaenteng, nia’ 1.290 allo.
12Mate’nei ke’nanga tau tuli majarreka sa’genna allo maka 1.335.
13Ikau Daniel, majarre’ laloko sa’genna allo kala’busanga. Lamateko, mingka lambangung poleangko untu’ antarimai pahalanu ri kala’busang jammanga."