Alkitab Mobile SABDA
[VER] : [MAKASAR]     [PL]  [PB] 
 <<  Hosea 1 >> 

1Iaminne pasang Napassareanga Batara mae ri Hosea ana’na Beeri ri wattunna kakaraengang Yehuda niparenta massing-massing ri Karaeng Uzia, Yotam, Ahas, siagang Hizkia, nampa kakaraengang Israel niparenta ri Yerobeam ana’na Yoas.

2Ri wattunna uru a’bicara Batara mae ri bansa Israel tete ri nakke, Nakana Batara, "Hosea, a’buntingko siagang sitau baine nangaia assundala’ nampa ana’-ana’nu la’jari sangkamma tongi anjo bainennu. UmmakKu sangkammai anjo bainennu; tena namajarre’ pa’mai’na ke’nanga mae ri Nakke, siagang nabokoiA’."

3Jari a’buntimma’ siagang sitau baine niarenga Gomer ana’na Diblaim. Ri wattunna nalassukang ana’ bungasa’na ikambe, iamintu sitau bura’ne,

4Nakanamo Batara ri nakke, "Arengi anjo ana’nu Yizreel, nasaba’ tasalloami nalaKuhukkung Karaeng Israel, lanri pammunoang nagaukanga Yehu, boe-boena, ri Yizreel. LaKupa’le’baki pamarentahanna jari-jarina Yehu.

5Anjo wattua ri Ka’bung Yizreel laKuancuruki kagassinganna tantarana Israel."

6Nampa allassukang bainengku ana’ makaruana ikambe, iamintu sitau ana’ baine. Nakana Batara ri nakke, "Hosea, arengi anjo ana’nu ‘Tenaya Nikamaseangi’, lanri tenamo nalaKukamaseang bansa Israel siagang tena sikalimo nalaKupammopporang ke’nanga.

7Mingka bansa Yehuda laKukamaseangi. INakke, Batara, Allata’alana ke’nanga lampasalamaki ke’nanga; mingka teai lanri pa’bundukang, teai todong lanri pa’dang yareka pana yareka jarang siagang pabaena."

8Le’baki ana’na ikambe makaruaya nisa’la’ susu, tianammi pole bainengku nampa allassukang sitau ana’ bura’ne.

9Nakana Batara ri nakke, "Arengi anjo ana’nu ‘Teai UmmakKu’, nasaba’ tu Israel teai ummakKu, siagang iNakke teaiA’ Allata’alana ke’nanga."

10Bansa Israel la’jari sanrapangi kassika ri tamparanga jaina, sa’genna takkullea nibaku’ yareka nirekeng. Kamma-kamma anne Nakana Allata’ala ri ke’nanga, "Ikau teaiko ummakKu," mingka lanarapiki sallang wattunna nalaNakana ri ke’nanga, "INakkemi Allata’ala mattallasaka siagang ikaumi ana’-anakKu!"

11Bansa Yehuda siagang bansa Israel lanipakase’rei ammotere’. Langngangkaki ke’nanga sitau pamimping, siagang la’bakkaki ke’nanga kammayatompa lakkalumanynyangi ammotere’ ke’nanga ri pa’rasangang kalenna. Tojeng, allo Yizreel la’jarimi allo lompo!


  Share Facebook  |  Share Twitter

 <<  Hosea 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran