Dual Panel1O, Yerusalem, riolo rapangko baine tamanang tenaya nakkulle ammana’. Mingka kamma-kamma anne akkio’ rannu mako, siagang akkelong mako matte’ne pa’mai’! Saba’ teai sipato’ jaina ana’nu, la’biangngangi na ana’ baine tenaya nibokoi ri bura’nenna.
2Luarrimi kema-kema pammantangannu; la’bui otere’na siagang pakajarreki patto’-patto’na!
3Lapila’ katambangi luara’nu mae ri kanang siagang mae ri kairi, pandudu’nu lanaempoi buttana bansa-bansaya siagang lanapammantangngi kota-kota sinoa kamma-kamma anne.
4Teako mallakki, talanipakasirikako; talanihinayako sa’gennu ammakkala’ kacci. Lanukaluppai tamajarre’na tappa’nu ri wattu rungkanu; tanuu’rangiami sinona nukasia’ ri wattunnu rapang janda.
5Mappa’jarinu rapangi bura’nennu, Allata’ala matangkasa’na Israel Iami Mappasalama’nu. Batara Kaminang Makoasaya, iaminjo arenNa, Ia Allata’ala makoasa ri sikontu linoa.
6O, Israel, rapangko baine bunting beru si’naya pa’mai’na lanri nibokoi ri bura’nenna. Mingka Nakiokko ammotere’ Allata’ala na Nakana,
7"Sinampe’ dudujA’ ambokoiko; Kukamaseang duduko siagang Kualleko ammotere’.
8Sinampe’jA’ anggilingi rupangKu battu ri kau lanri sanna’na larroKu. Mingka Kukamaseangko siagang pangngamaseang mannannungang." Kammaminjo kananNa Allata’ala Mappasalama’nu.
9"Sangkamma ri jammanna Nuh a’janjiA’ angkanaya talanialleami linoa ri je’ne’ a’ba, kamma tomminjo anne kamma a’janjiA’ angkanaya talalarroaMa’ yareka tenamo naKuancangko.
10Manna pole ta’lengga sikamma monconga siagang sikamma buluka, talammariA’ angkamaseangko. Tuli Kuta’gala’ jarreki parjanjiang passiamakkangKu," kananNa Batara mangngamaseanga ri kau.
11Nakana Batara, "He Yerusalem, kota cilakaya, tena kullenu siagang tena panynyaleorinnu. LaKupadongkoki ammotere’ sikamma dasara’nu, batu-batu ka’jalaka ballinna Kupake.
12Sikamma tembo’ pattahangnganga Kubangungi battu ri batu delima, sikamma pakke’bu’ lomponu battu ri batu paramata, tembo’-tembo’nu battu ri paramata intang.
13Sikontu pandudu’nu a’jari ana’ gurungKu, lakala’biangi siagang lasalewangangi ke’nanga.
14Nibangungko irate ri kaadelang, nipakabellako battu ri mallaka siagang panjallakkanga.
15Punna nibundukiko, teai iNakke ampassuroangi, manna inai ambundukiko latu’guru’ ngasengi.
16INakke ampa’jari tukang bassia angkapeki pepeka untu’ ande’deki parekang sanjataya. INakke todong ampa’jari tantaraya ammakea sanjata untu’ a’bundu’ siagang ammuno.
17Mingka sikamma sanjata nipareka untu’ ambaliangko, tena ngaseng nala’matu-matu. Na sikamma tuduhang ri kalennu ri pangadelanga lanupa’butti angkanaya sala ngasengi. INakke lassareko hadia pammetang ikau sikamma atangKu," kammaminjo kananNa Batara.