Alkitab Mobile SABDA
[VER] : [SIMALUNGUN]     [PL]  [PB] 
 <<  Ayub 30 >> 

Sahap ni si Job na Parpudi \@(sambatni)\@; Hasombuhonni Sisonari

1“Hape sonari, halak siposonan humbangku manartawai ahu, bapa ni sidea hurang tunggung hinan huahap mangkasomani baliang sijaga biribiringku.

2Tapi aha ma gunani bangku gogoh ni tangan ni sidea ai? Ai bani sidea pe domma salpu hagogohon ai.

3Marhalanihon ni na hurang ampa lohei, gabe laho do sidea manggagat hu tanoh horah ampa halimisan,

4laho mambuat pahu hun tongah-tongah ni poyon-poyon, ampa suhat panganon ni sidea.

5Hona usir do sidea hum bagas huta, anjaha hona surak do sidea songon halak panangko.

6Ibagas lombang bagas mando sidea marianan, Ibagas lubang-lubang atap ibagas liang ni dolog batu.

7I tongah-tongah ni rambah sidea doruh-doruh, i toruh ni tatada manggompang.

8Halak na oto anjaha na mahiri do sidea, na binogbogan luar hun nagori on.

9Hape sonari gabe sidoding-dodingkonon ni sidea do ahu, gabe siparumpamahonon ni sidea.

10Magigi do sidea bangku, mandaoh-daoh sidea humbangku; anjaha itijuri do ahu bani bohingku.

11Halani domma itanggali Naibata tali ni lampolampongku anjaha ipatoruh ahu, seng malang be sidea i lobeihu.

12Hampit siamunku mandurgak halak na janglas-janglas, ikaiskon ahu, ipajunjun sidea dompak ahu hamagouan ni sidea.

13Iparseda sidea do dalanku, anjaha ipabanggal sidea hamagouanku, anjaha ise pe lang na mangulangi sidea.

14Songon humbani buntas ni partoguh sidea roh mandorab ahu, hun tongah-tongah ni haruntason ai sidea marrohan.

15Songgot-songgot do manlingkubi ahu; songon pinurpurhon ni alogo hasangaponku, anjaha hasonanganku masab songon hombun.

16Halani ai usei do uhurhu ibagas, anjaha ari-ari panaronon manjorot ahu.

17Songon tinobak do hulingkulingku borngin, anjaha borit ni angkulangku seng marnamaronti.

18Isontap Naibata do hiouhu ibagas hagogohon, gabe tarsongkik ahu binahenmu ai.

19Domma isampakkon Naibata ahu hubagas hubang, gabe doskon orbuk pakon abuan do ahu.

20Doruh-doruh do namin ahu Bamu, tapi seng itangihon Ham ahu; jongjong do ahu i lobei-Mu, tapi seng marpanatap Ham dompak ahu.

21Mubah do Ham bangku gabe na so paridop ni uhur; ipardakdak tangan-Mu na margogoh in do ahu.

22Iangkat Ham do ahu laho mamurpurhon bani logou, anjaha ipaturut Ham do ahu ihabangkon habahaba.

23Tongon, hubotoh do, sihol bobanon-Mu do ahu hu hamatean, hu rumah, partumpuan ni sagala na manggoluh.

24Tapi tene, ai lang durdurhonon ni halak na laho mogap do tanganni, anjaha doruh-doruh bani parmaraanni ai?

25Ai lang tangis do ahu mangidah halak na susah? Ai lang horu do uhurhu mangidah halak na musil?

26Na madear do namin hupaima-ima, tapi hasedaon do roh, na siang do namin huarapkon, tapi hagolapan do das.

27Bulinsah do uhurhu ibagas, seng ra soh; ari hamagouan do mandorab ahu.

28Birong do ahu mardalani, tapi seng binahen ni mata ni ari; jongjong do ahu i tongah-tongah ni tumpuan, anjaha tangis mangindo pangurupion.

29Domma gabe hasoman ni baliang harangan ahu, gabe huan-kuan ni burung unta.

30Gabe birong do hulingkulingku anjaha mardabuhan humbangku, anjaha horah do holiholingku halani milasni.

31Mubah do sora ni husapingku gabe tangis-tangis, anjaha sora ni tulilangku gabe doruh-doruh.”


  Share Facebook  |  Share Twitter

 <<  Ayub 30 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel