Tonggo Mangindohon ase Mulak Suang Israel
1Bani pambobai koor. Humbani ginompar ni si Korah. Sada Psalm. (85-2) Ham Jahowa, idop do uhur-Mu ijia bani tanoh-Mu, ipasuang Ham do use si Jakob.
2(85-3) Isasap Ham do hajahaton ni bangsa-Mu, irungkub Ham do dousa ni sidea haganupan. Sela.
3(85-4) Ipahombun Ham do ringis-Mu, anjaha iampogi Ham do gajag ni gila-Mu.
4(85-5) Sai pasuang Ham ma hanami, Ham Naibata ni haluahonnami, parontihon Ham ma ringis-Mu dompak hanami.
5(85-6) Lanjar do Ham manringis dompak hanami, anjaha toruskonon-Mu do ringis-Mu marsundut-sundut?
6(85-7) Ai lang be ulakan-Mu pagoluh hanami, ase marmalas ni uhur bangsa-Mu ibagas Ham?
7(85-8) Patidak Ham ma hu bennami, Ham Jahowa, idop ni uhur-Mu, anjaha useihon Ham ma bennami pangurupion-Mu.
8(85-9) Sai tangihononku do atap aha na hinatahon ni Naibata Jahowa, ai hadameion do hata-Ni dompak bangsa-Ni pakon bani na hinaholongan-Ni, asal ma ulang mulak sidea bani haotoon.
9(85-10) Tongon, donok do pangurupi-Ni bani na mangkabiari-Si, tongon, marianan do hamuliaon-Ni bani tanohnami.
10(85-11) Idop ni uhur pakon hasintongan sai pajumpah do, anjaha hapintoron pakon hadameion marsisummahan.
11(85-12) Hasintongan martumbor hun tanoh, anjaha hapintoron manatap hun atas langit.
12(85-13) Tongon, Jahowa sandiri do mambere na madear, anjaha tanohnami mambere gogohni.
13(85-14) Hapintoron do mardalan i lobei-Ni, anjaha hadameion mangirikkon langkah-langkah-Ni.