Dual Panel1Menase mimiti jumeneng raja nagara Yuda dina yuswa dua welas taun. Ngarajaanana lima puluh lima taun, calikna di Yerusalem.
2Lampahna matak giruk, kawas lampah bangsa-bangsa anu geus disingkahkeun ku PANGERAN ti eta tanah waktu umat-Na daratang ka dinya.
3Anjeunna ngadegkeun deui tempat-tempat ngabakti ka brahala anu ku Hiskia, ramana, geus diburak-barik. Ngadamel altar-altar paranti muja ka Baal, ngadamel arca-arca Asera, jeung nyembah ka bentang-bentang.
4Di Bait Allah ge, tempat anu ku PANGERAN dipilih salalanggengna paranti ngabakti ka Mantenna, ngadegkeun altar-altar brahala.
5Buruan Bait Allah duanana diadegan altar-altar paranti muja ka bentang-bentang.
6Malah anjeunna meuncit putrana di Lebak Hinom, diduruk dikurbankeun. Metakeun elmu ngaramal, elmu sihir, jeung sok menta nasehat ka tukang-tukang metangan jeung tukang-tukang manggil arwah. Dorakana ka PANGERAN teh nataku, matak bendu.
7Bait Allah diteundeunan arca, teu tolih geus aya timbalan Allah ka Daud jeung Suleman yen: "Ieu tempat, di Yerusalem, di ieu Bait Allah, ku Kami dipilih ti sakabeh wewengkon dua welas kaom Israil, paranti ngabakti ka Kami.
8Saupama urang Israil narurut kana timbalan-timbalan Kami, parengkuh kana hukum anu ku Musa abdi Kami geus diajangkeun ka maranehna, ku Kami moal dibikeun aya anu nyingkahkeun ti ieu tanah anu ku Kami geus diserenkeun ka karuhunna."
9Urang Yuda ku Menase disasabkeun, datang ka jadi leuwih doraka ti batan bangsa-bangsa anu ku PANGERAN geus disingkahkeun ti tanah eta, waktu umat-Na mimiti daratang ka dinya.
10Menase jeung rahayatna ku PANGERAN dielingan, tapi henteu narurut.
11Nu matak Yuda teh ku PANGERAN diantep dirurug ku balad Asur. Menase ku musuh dicerek make kakait tuluy dirante, jeung diboyong ka Babul.
12Sanggeusna sangsara, anjeunna ngarendahkeun salira sarta tobat ka PANGERAN Allahna, sasambat ka Mantenna mundut pitulung.
13Panyambatna ku Allah ditampi, dimakbul, tuluy dipulangkeun ka Yerusalem sarta ngarajaan deui. Ayeuna Menase yakin yen PANGERAN teh Allah.
14Sanggeus kitu, kuta jajaran luar di wetaneun Kota Daud ku Menase diluhuran, mimiti ti hiji tempat di hiji lebak deukeut cinyusu Gihon, terus ka kaler nepi ka Gapura Lauk jeung wewengkon hiji kota anu disebut Opel. Di unggal kota benteng di Yuda, Menase nempatkeun pasukan-pasukan anu masing-masing dibawah ku hiji perwira.
15Aallahan-aallahan bangsa lian jeung arca-arca anu bareto ku anjeunna ditempat-tempatkeun di Bait Allah, kitu deui altar-altar brahala di luhur pasir tempat Bait Allah ngadeg, jeung anu di tempat-tempat sejen di Yerusalem, ku anjeunna disingkir-singkirkeun kabeh ka luareun kota, dipiceun.
16Altar-altar paranti ngabakti ka PANGERAN diomean, seug anjeunna nyanggakeun kurban panarima jeung kurban pamuji sukur dina eta altar. Urang Yuda ditimbalan ngabarakti ka PANGERAN Allah Israil.
17Jalma-jalma najan ngalurbanna masih keneh di tempat-tempat sejen, tapi ditujukeunana mah ka PANGERAN.
18Sagala hal anu dijalankeun ku Menase, hal sasambatna ka Allahna, hal amanat ilahi anu ku nabi-nabi diunjukkeun ka anjeunna kalawan nyebut jenengan PANGERAN Allah Israil, kabeh kaungel dina Kitab Babad Raja-raja Israil.
19Ari hal paneda raja, hal waleran Allah kana panedana, hal dosa-dosana, kadorakaanana samemeh tobat, halna ngadegkeun tempat-tempat ngabakti ka brahala, halna ngadamel arca-arca Asera, halna ngadamel arca-arca brahala jeung tuluy disembah, kabeh kaungel dina Kitab Carita Para Nabi.
20Menase pupus, dikurebkeun di lingkungan karaton, sarta Amon putrana jadi raja gegentosna.
21Amon mimiti jadi raja nagara Yuda dina yuswa dua puluh dua taun. Ngarajaanana dua taun, calikna di Yerusalem.
22Lampahna cara lampah Menase, ramana, midamel dosa ka PANGERAN jeung nyembah ka brahala-brahala anu bareto disembah ku ramana.
23Tur anjeunna mah henteu terus ngarendahkeun anjeun cara ramana, sarta dorakana leuwih-leuwih ti batan ramana.
24Anjeunna ditelasan di karaton ku ponggawa-ponggawana.
25Tapi anu nelasanana oge kabeh dipaehan ku urang Yuda, sarta urang Yuda tuluy ngajenengkeun Yosia putrana ngagentos anjeunna.