Dual Panel1PANGERAN nimbalan deui.
2"Eh anak manusa," timbalana-Na, "geura ngaramal sarta umumkeun ieu timbalan Kami. Ucapkeun ieu ucapan-ucapan sing tarik: Tereh datang poe nu matak gimir!
3Poena tereh tumiba, pikeun tindakan PANGERAN: langit mendung, bangsa-bangsa bakal susah.
4Mesir bakal ngarandapan perang. Sudan nandangan kasukeran. Di Mesir bakal loba nu diparaehan. Eta nagri bakal diranjah. Runtuh jadi ruruntuk.
5Serdadu-serdadu sewaan ti Sudan, Lidia, Libia, Arab, Kub, malah nu asal ti umat Kami, eta oge tangtu tariwas dina eta perang."
6PANGERAN Nu Maha Agung nimbalan, "Ti semet Migdol di beulah kaler nepi ka Aswan di beulah kidul, sakabeh anu ngabela Mesir tangtu tariwas tengahing jurit. Angkatan perang Mesir anu dipiagul tangtu tumpur. Kitu timbalan Kami, PANGERAN Nu Maha Agung.
7Eta nagri bakal jadi tempat anu pangsepi-sepina di dunya, kota-kotana bakal tumpur sama sakali.
8Saupama Mesir ku Kami geus der dihuru sarta anu ngabelana geus paraeh, maranehanana bakal nyaraho yen Kami teh PANGERAN.
9Lamun geus ninggang mangsana sarta Mesir geus tumpur, Kami baris ngiangkeun utusan-utusan tarumpak kapal, geusan ngageretak urang Sudan anu teu boga panyangka. Tangtu maranehanana galimir. Waktuna geus tereh!"
10PANGERAN Nu Maha Agung nimbalan, "Raja Nebukadnesar, raja nagri Babul, ku Kami rek dipake geusan meakkeun kakayaan Mesir.
11Eta nagri tangtu didatangan ku manehna jeung baladna anu taya rasrasan, tuluy ditumpurkeun. Mesir ku maranehna bakal digempur ku pedang, tanahna bakal pinuh ku bangke.
12Walungan Nil ku Kami rek disaatan, Mesir rek diselehkeun kana kakawasaan jalma-jalma anu doraka. Sakuliah nagrina bakal diancurkeun ku bangsa sejen. Kitu timbalan Kami, PANGERAN."
13PANGERAN Nu Maha Kawasa nimbalan, "Brahala-brahala sesembahan jeung dewa-dewa di Mempis rek dibasmi. Mesir moal boga deui pamingpin, jelema-jelemana sina pinuh ku kasieun.
14Pakidulan tanah Mesir rek dijadikeun tempat sepi, kota Soan di kaler arek dihuru. Tebe, ibukotana, arek dihukum.
15Kota Sin, benteng Mesir anu gede, sina ngarasa amarah Kami. Kakayaan Tebe bakal ditumpurkeun.
16Mesir bakal dihuru ku Kami, Sin bakal nandangan kanyeri anu pohara. Tembok Tebe rek direbahkeun, kotana dibedah.
17Jajaka-jajaka kota On jeung kota Pi-Beset bakal tariwas ku perang, nu sejen-sejenna ditawan.
18Saupama kakawasaan Mesir ku Kami geus dirubuhkeun sarta kakuatanana anu dipiagul geus tumpur, di Tahpanhes bakal poek mongkleng. Mesir bakal katutup ku mega, rahayatna di saban kota bakal jaradi tawanan.
19Saupama Mesir geus dihukum saperti kitu ku Kami, kakara bakal nyaraho yen Kami teh PANGERAN."
20Dina tanggal tujuh bulan kahiji, nincak sabelas taun hirup di nagri buangan, sim kuring ditimbalan ku PANGERAN.
21"Eh anak manusa," timbalana-Na, "leungeun raja Mesir geus dipotongkeun, taya pisan anu mangbeberankeun atawa mere pangais keur ngais leungeunna sangkan bisa cageur, sangkan bisaeun deui ngangkat pedang.
22Ayeuna kieu timbalan Kami, PANGERAN Nu Maha Agung: Raja Mesir musuh Kami. Leungeunna, boh anu walagri keneh, boh anu geus potong, rek dipotongkeun duanana, pedangna sina ragrag tina genggemanana.
23Urang Mesir rek disina paburencay ka sakuliah dunya.
24Sabalikna Kami rek neguhkeun leungeun raja Babul, sina ngagenggem pedang Kami. Leungeun raja Mesir rek dipotongkeun, sina gegerungan nepi ka paeh hareupeun musuhna.
25Geus tangtu pisan eta raja teh ku Kami ditumpeskeun tanagana, sabalikna raja Babul mah ku Kami rek dikuatkeun. Saupama pedang Kami geus diserenkeun ka raja Babul, sarta ku manehna geus diacung-acung ka Mesir, unggal jalma bakal nyaho yen Kami teh PANGERAN.
26Urang Mesir rek disina paburencay ka sakuliah dunya. Sanggeus kitu maranehna bakal nyaho yen Kami teh PANGERAN."