Alkitab Mobile SABDA
[VER] : [ABUN]     [PL]  [PB] 
 <<  Kisah Para Rasul 14 >> 

1Paulus si Barnabas mu kem mo kota Ikonium. Mone an we mu mo ye Yahudi bi nu ari sagana ne. Mo nu ari ne an we ki Yefun Allah bi sukdu subot Yesus Kristus ne sane sor sukdu ne pet mo nje mone. Sane anato yé mwa, ye Yahudi si yewis yi ne, án nai sukjimnut dik do, án jammo Yefun Yesus tepsu án bi Yekwesu, án onyar kem mo Yefun Yesus it.

2Sarewo ye Yahudi ge bok yo gato bariwa sukdu ne, án krokgat yewis yi ge bok yo subere án bariket ye gato onyar kem mo Yefun Yesus ne.

3Sane Paulus si Barnabas kem mone nam. An we yo nyu nde, an we ki subot an we bi Yekwesu Yefun Yesus bi sukdu. An we ki sukdu subot os ndo gato Yesus Kristus kak wa men yetu ne. Yefun Yesus ben an we nggiwa kadum Yefun Allah bi suktinggi ne bor, subere yé mwa ne sino yeket ete nutbot ndo nde, sane ye nut do sukdu gato an we ki ne sangge.

4Sane ye gato kem mo kota ne wat yu. Deyo simo ye Yahudi gato bariwa Yefun Yesus bi sukdu-i, deyo simo yerasul gato jammo Yefun Yesus.

5Sane ye Yahudi deyo si yewis yi deyo si an bi yekwesu, án syeret os wa Paulus si Barnabas. Án iwa ben sukye nai Paulus si Barnabas, án iwa am an we ne su jok sane sor an we kwop wé.

6Sarewo an we jam kom mo yé ne bi sukjimnut-i, sane an we titi mu mo kota Listra si kota Derbe mo bur Likaonia kadit. An we mubot bur Likaonia ne.

7Mone an we ki sukdu subot os ndo gato Yesus Kristus kak wa men yetu subere Yefun Allah nai men gum sok mo An bi rus-i.

8Mo kota Listra an we ku yetu ge dik yo gato gwes út. Ye ne gwes út kadit kam gato an bi im kem su an, an yo muket an gwes mo nde.

9Paulus ki sukdu nai nje mone sa, ye gato gwes út ne syaretwa Paulus bi sukdu ne. Orete Paulus sokwa an, Paulus jam mo an mit do, ye ne sa, kwabom kam mo Yefun Yesus do, bere Yefun Yesus ben an gwes nggi.

10Sane, Paulus ki nggi nai ye ne do, "Nan ti su nan gwes se!" Sugane it, ye ne yak ti, ye ne muket an gwes.

11Yé mwa gato mone me suk gato Paulus ben ne sa, yé mwa ne saiye su a Likaonia do, "Mban! Suk gato men som ne ma ku men it anare. Men bi yefun is ma ku men it. Án ka sa yetu!"

12Yé kendo Barnabas gum do Zeus, Yé kendo Paulus gum do Hermes, we Paulus anato ki sukdu mwa ne,

13Yé ne som án bi yefun dik yo gato gum do Zeus mo nu gato án nggo mo kota de nden. Sane yesu ge dik yo gato ben suk mo Zeus bi nu ne ma. An gwat sapi ge ndi bok yo si bunga ma mo ros syo mo kota wa an si yé mwa mone som ye we ne su.

14Sarewo yerasul we ne, Barnabas si Paulus jam suk gato yé mwa ne iwa ben sa, an we syik an we bi san, subere yé mwa ne jam do, an we bariwa suk gato yé mwa iwa ben ne. An we ben sane, or an we kasbot yé mwa miten, an we saiye do,

15"Nin gwat suksom wa men wa suma ne? Men ka we yetu tepsu nin sor re. Nin som men ka we nde. Men ka we ma wa ki sukdu subot os ndo gato Yesus Kristus kak wa men yetu ne, subere nin misyar yefun bok yo gato jom nin ne. Yefun bok ne yo ós nin nde, sane yefun bok gato yo mbau nde nin brek kadit, ete nin jammo Yefun Allah gato gesyos ne sor. Nin bi nin nggwa mo Yefun Allah gato ut gu nim ne, bur ré si sem si suk mwa mone sino et.

16Suga nyim tuya Yefun Allah misyar yetu ben suk ket án í ne sor,

17wo Yefun Allah kadum An nggwa nai men sare do: An ben sukndo su men, An syo nogi is ma kadit gu, suk gato men jan, An ben kom sisu ndo, An syo sugit mwa nai men, ete An ben men mit iwa suk mwa ne."

18An we duyawa yé mwa su sukdu ne, sarewo bergan yé mwa ne som an we su suk gato án gwat ma ne tó, wo kom mo rut sa, yé mwa ne misyar re.

19Orge ye Yahudi ge bok yo ma kadit kota Antiokhia si kota Ikonium ma mo Listra. Yé bok ne ben kidar yé mwa mone subere yé mwa ne simo os ibit gato án ben ne, or án sino am Paulus su jok wa gu Paulus kwop. Án am Paulus su jok, án nut do Paulus kwop re, or án gwat Paulus mu mo kota de nden.

20Ye gato onyar kem mo Yefun Yesus sum wairi wa Paulus sa, Paulus sun or re, Paulus satu mu mo kota mit. Bi ik, ete Paulus si Barnabas mu kadit kota ne, an we mu mo kota Derbe.

21Paulus si Barnabas mu kom mo Derbe. Mone, an we ki sukdu subot os ndo gato Yesus Kristus kak wa men yetu ne, ete yé mwa mone nai sukjimnut do, án onyar kem mo Yefun Yesus it. Orge Paulus si Barnabas mubot kota bok yo o wa ós ye gato onyar kem mo Yefun Yesus, Paulus si Barnabas ós yé ne onyar kem mo Yefun Yesus nggi wai o, subere yé ne jammo Yefun Yesus petok sor. An we mu mo kota Listra e, kota Ikonium sisu kota Antiokhia mo bur Pisidia. An we ki nai ye gato mone do, "Men yé gato onyar kem mo Yefun Yesus, mo bur ré men ku sukye mwa, subere ri ma, men sok mo Yefun Allah bi rus-i mo nat be gato Yefun Allah fro wa men."

22(14:21)

23Mo kota bok ne sino gato an we mu mone, Paulus si Barnabas bes yekwesu mo nu ari wa mewa ye gato onyar kem mo Yefun Yesus mo kota bok ne. An we mewa nggwa kadit sugit yei, an we ki suk su Yefun sor. An we ki suk su Yefun do, "Yefun Allah, yekwesu ré onyar kem mo Nan it. Nan mewa án, Nan ben án nggiwa án ben suk tepsu yekwesu wa mewa ye gato onyar kem mo Yefun Yesus."

24Paulus si Barnabas mubot bur Pisidia, orge an we mu kom mo bur Pamfilia.

25An we ki subot Yefun Allah bi sukdu subot Yefun Yesus mo kota Perga, orge an we mu mo kota Atalia.

26An we mu kadit kota Atalia, an we simo kwem satu mu mo kota Antiokhia. Ye gato onyar kem mo Yefun Yesus suga nyim mo Antiokhia ne, án ak án syim mo Paulus si Barnabas subere Yefun Allah mewa an we mo Yefun bi suk-i gato an we ben ne. Sane suk gato Yefun Allah kiwa an we ben ne, an we ben or re.

27An we mu kom mone, or an we kendo ye gato onyar kem mo Yefun Yesus sum sino, orge an we ki subot suk mwa gato Yefun Allah ben su an we mo pe bok yo gato an we mu mone. An we ki do, "Yefun Allah ben men ka we nggiwa men ka we ki subot An bi sukdu, Yefun Allah ben men ka we nggiwa ben sukye gato ben nje yeket. Yefun Allah kak os wa men ka we ki An bi sukdu nai yewis yi, ete yewis yi mwa ne nai sukjimnut do, án onyar kem mo Yefun Yesus mone dom."

28An we si ye gato onyar kem mo Yefun Yesus mo kota ne kem mone nam dom.



 <<  Kisah Para Rasul 14 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran