Alkitab Mobile SABDA
[VER] : [GULLAH]     [PL]  [PB] 
 <<  Lukas 19 >> 

Jedus an Zacchaeus, de Man wa da Geda Tax

1Jedus done gone eenta Jericho an beena pass shru dey.

2One man been dey name Zacchaeus. E a head man ob dem wa da geda tax, an e hab a heapa money.

3Zacchaeus beena try fa see Jedus, bot e ain able fa shim cause e been a shot man an e ain able fa see oba de crowd wa been roun Jedus.

4So Zacchaeus ron head ob de crowd an climb op a sycamo tree fa hab chance fa see Jedus. E been gwine come long dat way.

5Wen Jedus git ta de tree wey Zacchaeus been, e look op an tell um say, “Hurry op an come down, Zacchaeus, cause A haffa stay ta ya house taday.”

6Zacchaeus come down quick. E tek Jedus ta e house an gim haaty welcome.

7All de people wa shim een Zacchaeus house staat fa grumble say, “Jedus done gone fa stay ta house ob man wa ain keep de Jew Law.”

8Zacchaeus stan op an tell de Lawd fo de people say, “Look, Lawd! A gwine gii haf ob ebryting A got ta de po people. An ef A done tief fom anybody, A gwine gim back fa time wa A done tief fom um.”

9Jedus tell um, “Taday God done sabe dis man an e fambly. Dis man one ob Abraham chullun chullun too.

10Cause de Man wa Come fom God done come fa saach fa people wa loss. E come fa sabe um.”

De Paable Bout de Ten Wokman an de Money

11De people beena listen ta wa Jedus say. E been mos ta Jerusalem now. An dey beena tink say dat dey gwine see God come down an rule tareckly. So den, Jedus tell um one paable.

12E say, “One time one man wa fom a king fambly beena gwine ta a country way off. E beena gwine dey fa leh dem mek um king ob e own country. Atta e been mek king, e hab plan fa come back home gin.

13Fo de man lef, e call ten ob e wokman an gim each a walyable gole coin. E tell um say, ‘See hommuch each one ob oona kin mek wid dis money fo A come back.’

14“Now den, de people wa lib een dat country hate um. Dey sen messenja dem atta um fa go tell de big leada wa da rule oba dey country say, ‘We ain wahn dis man fa rule oba we.’

15“Bot de man git name king ob dey country an come back ta e house. Tareckly e sen fa e ten wokman dem fa come tell um hommuch money dey done mek wid e gole coin.

16De fus wokman come an say, ‘Sah, A done mek ten mo gole coin wid de one wa ya gii me.’

17De king tell um say, ‘Ya done good. Ya a good wokman. Cause A able fa trus ya fa do a leetle job, well A gwine mek ya rula oba ten city.’

18De secon wokman come ta de king an say, ‘Sah, A done mek fibe mo gole coin wid de one wa ya gii me.’

19De king tell um, ‘Ya gwine rule oba fibe city.’

20Oda wokman come ta de king say, ‘Sah, yah de one gole coin wa ya gii me. A done tie um op een a hankachief fa keep um safe.

21A scaid ob ya cause ya a haad man. Ya tek dat wa ain ya own an ya haabis wa ya ain plant!’

22De king tell um say, ‘Ya a good fa nottin wokman. De wod wa ya own mout done taak A gwine nyuse fa condemn ya! Ya done know A da a haad man, ainty? A tek dat wa ain me own an A haabis wa A ain plant.

23Ya shoulda pit me money een de bank, ainty? Den wen A come back, leas A woulda hab de money an de interest e done git too.’

24Den de king tell de wokman dem wa beena stan dey, say, ‘Oona tek de one gole coin way fom dis man. Gim ta de wokman wa hab ten gole coin.’

25Dem wokman say, ‘Sah, dat man hab ten coin already!’

26An de king ansa say, ‘A da tell oona say, dat ebry poson wa got sompin, God gwine gim mo. Bot de one wa ain got nottin, God gwine tek way dat leeleetle bit wa e got.

27Now den, me enemy dem wa ain wahn me fa rule oba dem, oona fetch um yah an kill um een front ob me!’”

De People Hona Jedus Like a King

28Atta Jedus done say dat, e gone long head ob de people, da waak ta Jerusalem.

29Wen e git close ta Bethphage an Bethany, dey ta de Mount ob Olib, e call two e ciple an sen um on head ob um.

30E tell um say, “Oona go ta de settlement wa dey head ob oona. Wen oona go eenta de settlement, oona gwine see one nyoung donkey dat dey done tie op dey. Nobody ain neba yet ride on dat donkey. Mus ontie um an fetch um yah.

31Ef anybody aks oona hoccome oona da ontie um, ansa um say, ‘De Lawd need um.’”

32De two ciple gone long ta de settlement an dey find ebryting jes like Jedus tell um.

33Wen dey da ontie de nyoung donkey, dem wa e blongst fa aks um say, “Hoccome oona da ontie um?”

34Dey ansa say, “De Lawd need um.”

35Den dey tek de donkey ta Jedus. Dey pit dey cloes on top de animal an hep Jedus git on um.

36Wiles Jedus da ride long on e way ta Jerusalem, de people spread some dey cloes on de road fo um fa sho um hona.

37Wen Jedus come fom de Mount ob Olib, da gwine down de hill, e come close ta Jerusalem. An all de big crowd ob people wa beena trabel long wid um staat fa rejaice an tank God. Dey da holla ta de top ob dey boice, praisin God fa all de miracle wa dey beena see Jedus do.

38Dey say, “God bless de King wa e done sen fa come een de name ob de Lawd! Leh dey be peace een heaben. We da gii glory ta God!”

39Some de Pharisee dem dey een de crowd tell Jedus say, “Teacha, buke de people wa da trabel long wid ya. Chaage um fa hush op dey mout!”

40Jedus ansa um say, “A da tell oona, ef dem people hush op de mout, de rock yah gwine staat fa holla!”

Jedus Cry fa Jerusalem

41Wen Jedus git close ta de city, e shim, an e staat fa cry. E dat saary fa um.

42E say, “A wish oona, eben oona dey een Jerusalem, woulda know taday wa ting oona need fa hab peace! Bot oona ain able fa shim now!

43De time da come wen oona enemy dem gwine build wall roun de city. Dey gwine hab oona pen op an fence op ta ebry side so dat oona ain able fa git outta dey.

44Dey gwine stroy de city an all ob oona an eben all oona chullun. Dey gwine knock all de city stone ta de groun. Dey ain gwine lef eben one stone weh e stan. Dey gwine do all dat cause oona ain recognize de time wen God beena come fa sabe oona!”

Jedus Een God House

45Den Jedus gone eenside God house. E staat fa dribe out dem people wa beena sell ting eenside dey.

46E tell um say, “God say een e wod, ‘Me house gwine be place weh people pray ta me!’ Bot oona done ton um ta place weh tief dem da hide!”

47Jedus beena laan de people een God house ebry day. De leada dem ob dem Jew priest, dem Jew Law teacha, an de oda Jew leada dem beena try fa find way fa kill Jedus.

48Bot dey ain been able fa figga how fa do um, cause all de people been dey, da geda roun Jedus fa yeh um. Dey ain beena wahn fa miss eben one wod e say.



 <<  Lukas 19 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2021
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran