Alkitab Mobile SABDA
[VER] : [MADURA]     [PL]  [PB] 
 <<  Maleakhi 2 >> 

1PANGERAN Se Mahakobasa adhabu ka para imam, "Reya’ Tang parenta ka ba’na:

2Hormadi Sengko’ kalaban lalakonna ba’na. Mon ba’na ta’ endha’ ngedhingngagi Tang oca’, bi’ Sengko’ ba’na ebastowa. Sakabbinna rajekke se etarema ba’na bakal aoba’a daddi babaston. Saongguna, sakabbinna se becce’ jareya bi’ Sengko’ la ebasto, sabab ba’na ta’ marduli Tang parenta.

3Na’-ana’na ba’na bi’ Sengko’ eokoma, ban mowana ba’na bi’ Sengko’ ebeddha’ana calatthongnga keban se bi’ ba’na ekagabay kurban, ban ba’na eereda ka tombuganna calatthong.

4Daddi ba’na tao ja’ Sengko’ la aberri’ parenta reya, sopaja Tang parjanjiyan ban para imam, toronanna Lewi, paggun etoro’.

5E dhalem parjanjiyan jareya Sengko’ ajanji aberri’a ka reng-oreng jareya odhi’ aman ban taremtem ban Sengko’ nyoro reng-oreng jareya hormat ka Sengko’. E bakto jareya reng-oreng buru pajat hormat tor tako’ ka Sengko’.

6Reng-oreng jareya ngajarragi barang se bendher, banne se sala. Reng-oreng jareya rapet ban Sengko’, sarta jujur atoro’ ka Tang karep. Laen dhari jareya reng-oreng jareya nolong oreng sabannya’na sopaja ta’ alako jahat pole.

7Pajat kawajibanna para imam ngajarragi barang se bendher parkara Sengko’, PANGERAN Se Mahakobasa. Mon ra’yat atanya’a apa se ekakarep Sengko’, kodu atanya ka para imam jareya, sabab para imam jareya Tang otosan.

8Tape sateya reya, ba’na, mam-imam, la nyaleyot dhari jalan se bendher. Pangajaran-pangajaranna ba’na daddi lantaranna oreng sabannya’na alako sala. Ba’na arosak parjanjiyan se bi’ Sengko’ epabadha ban ba’na.

9Daddi bi’ Sengko’ reng-oreng Isra’il epata’parduliya keya ka ba’na sabab ba’na ta’ ta’at ka Tang karep ban polana ba’na ada’-bida’agi oreng e bakto ngajar Tang ommat."

10Ba’na ban sengko’ reya gu ta’ andhi’ Rama se settong, ta’ iya? Ba’na ban sengko’ reya gu ta’ ecepta’agi bi’ Allah se settong, ta’ iya? Mon bariya, arapa ba’na ban sengko’ me’ saleng mongker dhari janjina sarta kalaban cara se kantha jareya mongkere parjanjiyan se ebadhi Allah ban bangatowana ba’na ban sengko’?

11Ommat Yehuda la nerrak parjanjiyanna Allah bi’ reng-oreng jareya ban ngalakone rang-barang se nako’e neng e Yerusalim ban e saantero nagara. Reng-oreng jareya la macemmer Padalemman Socce se ekataresnae aba’na dibi’ sarta abine babine’an se nyemba ba-dibana bangsa laen.

12Moga-moga reng-oreng se atengka kantha jareya epanyengla dhari ommat Isra’il bi’ PANGERAN. Moga-moga reng-oreng jareya ta’ noro’ tang bangsa pole ngatorragi ban-kurban ka PANGERAN Se Mahakobasa.

13Ban reya’ pole lalakonna ba’na. Mezbana PANGERAN bi’ ba’na epangambang bi’ aeng mata; ba’na nanges tor agingging polana Pangeran ta’ kasokan narema ban-kurbanna ba’na pole.

14Ba’na atanya arapa Salerana me’ ta’ kasokan narema ban-kurban jareya. Polana PANGERAN ngagali ja’ ba’na ta’ esto ka babine’ se la ekabine ba’na e bakto ba’na gi’ ngodha. Babine’ jareya pasanganna ba’na e dhalem odhi’na, tape bi’ ba’na ekiyanadi, maske e ajunanna Allah ba’na la ajanji teptebba esto ka babine’ jareya.

15Bi’ Allah Se Settong ba’na gu ta’ la epadaddi settong badan tor settong sokma ban babine’ jareya? Apa se daddi kasokanna PANGERAN kalaban cara se kantha jareya? Tadha’ laen sopaja ba’na andhi’a na’-ana’ se daddi ommadda Allah se saongguna. Daddi ba’na kodu ajaga sopaja e antarana ba’na tadha’ se ta’ esto ka binena.

16"Sengko’ baji’ mon badha oreng atellak," ca’na dhabuna PANGERAN, Allahna Isra’il. "Sengko’ baji’ mon badha e antarana ba’na se kejjemma kantha jareya ka binena. Daddi ba’na kodu ajaga ban ja’ sampe’ ba’na kiyanat ka binena."

17Cacana ba’na mabusen Allah. Tape ba’na atanya, "Aponapa kaula me’ ekoca’ mabusen PANGERAN?" Kalaban ngoca’, "Oreng se alako jahat kabbi eanggep bagus bi’ PANGERAN Se Mahakobasa, ban Pangeran kasokan ka reng-oreng jareya." Otabana kalaban atanya, "E dhimma Allah se eanggep adil rowa?"



 <<  Maleakhi 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2021
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran