Alkitab Mobile SABDA
[VER] : [ABUN]     [PL]  [PB] 
 <<  Filipi 1 >> 

1Ji gato gum do Paulus, ji si Timotius, men ka we gato Yesus Kristus bi pakwerut anato krom surat ré wa nin. Men ka we krom sukdu ré wa nin yé gato onyar kem mo Yesus Kristus gato sum mo nu ari mo kota Filipi. Men ka we krom surat ré wa nin yé gato gum yekwesú mo nu ari si yé gato ós yekwesú mo nu ari ne sino.

2Men bi Ai, Yefun Allah si men bi Yekwesu Yesus Kristus ete mewa nin. Yefun Allah si Yesus Kristus ete uttok nin petok sor.

3Ji napawa nin yo, ji ki ndo mo Yefun Allah mo suk gato nin ben ne.

4Ji ndek suk mo Yefun Allah wa nin sino yo, ji mit at wa.

5Ji mit at wa ji ki suk su Yefun wa nin, we nin ós ji mu frot sukdu subot os ndo gato Yesus Kristus kak wa men yetu ne nai ye yi jam, kadit kam ketke gato nin onyar kem mo Yefun sor kom mo kam ré.

6Ji kwabom kam mo Yefun Allah do, Yefun Allah gato ben nin ti nggi wa nin ben An bi suk-i su ketke, bere An ben sukndo su nin gat sor, kom mo pe gato or mó, kom mo kam gato Yesus Kristus satu ma mo bur ré re.

7Ji mit at wa nin, ji jimnutbot nin anato ndo, we ji gen ne kem pe su nin mone re. Sane dom, ji jimnotku nin, we yé bok ji mo sel more yo, ji duno nje su sukdu subot os ndo gato Yesus Kristus kak ne yo, ji ki rer subot sukdu ne nai ye gato duwer ji mo sukdu ne yo, nin si ji tepsu dik wa ben suk gato Yefun Allah fro wa ji ben ne sino.

8Yefun Allah jam do, sangge, ji da o ku nin, ji bi sukjimnut sye kas subot nin tepsu Yesus Kristus bi sukjimnut sye kas subot nin ne.

9Ji ndek mo Yefun Allah wa nin sare do: nin jimnotku yu wai kadit nyim ne o et, nin mewa yu sisu ndo wai o et, nin ben sukndo su yu mwa wai o et. Ji ndek mo Yefun subere nin jam Yefun kom mo mit, ete nin jam suk gato ndo kadit suk gato ibit wai kadit nyim ne o re,

10subere nin jam suk mwa gato ndo wai wa nin ben ne, orete nin ben suk gato ndo ne bu sor. Ji ndek mo Yefun subere ye yo ku os wa ki nin gum ibit mo suk yo mo nde kom mo kam gato Yesus Kristus satu ma mo bur ré re.

11Ji ndek mo Yefun subere An ós nin subere suk mwa gato nin ben ne ndo sino tepsu Yefun Allah mit, sukibit yo mo nde, subere yé mwa un Yefun Allah ete bes An gum kok mo suk gato nin ben ne.

12Ji bi nji, ji bi nyanggon gato onyar kem mo Yesus Kristus, ji iwa nin jam do, sukye gato ji ku mo sel ré kak os wa yé mwa jam ete onyar kem mo sukdu subot os ndo gato Yesus Kristus kak wa men yetu ne.

13Kadit yé bok ji mo sel ré anato yesukmise mwa ne sino gato mewa ji mo gubernur bi nu si ye yi dom jam do, yesukmise ne rai ji more mo gato ji ki sukdu subot Yesus Kristus.

14Yé rai ji mo sel ré sane anato Yefun ós ye gato onyar kem mo Yefun Yesus mo kota ré, bergan yé mwa ne sino, án yo nyuwa ki Yefun Allah bi sukdu saga nyim ne o nde. Án yo nokwa nje gato ben sukye nai án o nde.

15Ji jam do, yé gare deyo da ki sukdu subot Yesus Kristus, sarewo án ki subot sukdu ne, we án mit iwa án gum sye tepsu ji. Án iwa án gum sye wai kadit ji. Sane án sok os mone subere yé maskwa ket ji. Sarewo yé deyo ki sukdu subot Yesus Kristus, án yo meret os wa ji nde, wo án ben án bi suk-i su án mit kwo sor.

16Ye gato mit kwo ne, án ki sukdu subot Yesus Kristus, we án bi sukjimnut sye kas subot ji si Yefun Allah sino. Án ki sukdu subot Yesus Kristus, we án jam do, Yefun Allah bes ji wa ji ki rer subot os ndo ne sare do, os ne sangge.

17Sarewo ye gato iwa án gum pasye wai kadit ji ré, yé ne ki sukdu subot Kristus we án meret gum pasye wa án dakai. Án ki sukdu subot Kristus sarewo án mit-i tara re. Án bi sukjimnut ibit. Án ki sukdu subot Kristus, we án mit do, bere ji ku sukye mwa wai mone o re.

18Sarewo suk yo o nde! Ji do ku sukye mwa wai o it yo, suk yo o nde, sarewo suk gato ndo wai anato yé ki sukdu subot Kristus nai yé mwa jam sor. Kapre ye gato ki subot Kristus, ye deyo bi sukjimnut ibit e, ye deyo bi sukjimnut ndo e, yé ki subot Kristus nai yé mwa jam anato ji mit at wa. Sane dom ji mit at wa pe sor,

19we ji jam do, bere yepasye sombok ji kadit sukye gato ji ku mo sel ré. Nin ki suk su Yefun wa ji, sane bere Yefun Gen ós ji dom anato ji jam do, bere yé sombok ji re.

20Bere su kam gato yepasye ndo ji subot suk gato ji ben ne yo, ji mit iwa do, ji yo damen mo an gwem nde. Ji nut do, sangge bere ji yo nyuwa ji ki sukdu subot Kristus nai an nde. Sane yo, ji kwop o, ji mbau o, mo suk sino gato ji ben ne, ji bes Yesus Kristus gum kok petok sor.

21Ji dakai bi sukjimnut do, ji mbau yo, ji ben suk wa Yesus Kristus sor, wo ji kwop yo, ji ku suk gato ndo wai it anane.

22Ji do kem mo bur ré yo, bere ji ben suk mwa gato ndo tó. Sane ji nutbot or et. Kwa u ana ndo wai ne? Ji kwop bado, ji mbau bado, ji jam nde tó.

23Ji nutbot os kwa we ré tó. Ji jam nde os u anato ndo wai ne? Kwa dik yo anato ji iwa ji mu kadit bur ré, ete ji mu kem su Yesus Kristus. Ji nut do, ji do si An kem sino it yo, ndo wai o re anane.

24Kwa dowe anato ji kem mo bur ré subere ji ós nin tó, we nin mitmo ji ós nin tó.

25Ji dakai jam rer do, bere ji kem mo bur ré wa ós nin tó, sane bere ji mbau tó. Bere ji si nin kem more tó, subere ji ós nin onyar kem pe mo Yefun Yesus, subere nin mit at wai mo sukndo gato Yefun Yesus ben ne o re.

26Sane yepasye do sombok ji, ete ji satu ba ku nin it yo, bere nin gato onyar kem mo Yesus Kristus mit at wai mo sukndo gato An ben wa ji ne o re.

27Yé sombok ji yo, ji kem more tó yo, nin ben nin bi suk-i tepsu sukdu subot os ndo gato Yesus Kristus kak ne sor. Nin ben suk tepsu sukdu gato ji duno nin su ne. Ji iwa nin ben nin bi suk-i sane subere ji ba ku nin yo, ji yo ba ku nde yo, ji jam sukdu subot nin do, nin tepsu dik wa nin jom Yefun bi sukdu-i pe sor. Nin mit dik si nin onyar dik wa nin duwer ye gato bariwa sukdu subot os ndo ne. Nin onyar kem mo sukdu ne pe sor.

28Ye gato duwer nin mo Yefun bi sukdu-i ne, nin yo nyuwa yé ne nde, mo sukwokgan dom nde. Nin nyuwa nde yo, bere yé ne jam do, sangge bere Yefun Allah bare án mo bot gesyos, wo nin sa, bere Yefun Allah ós nin kem ndo to kapyo mato kapyo.

29Nin jam do, Yefun Allah ós nin kem ndo, we Yefun Allah syo An bi suktinggi nai nin subere ós nin onyar kem mo Yesus Kristus sor nde, wo An syo An bi suktinggi nai nin subere nin nggi wai kadit sukye gato nin ku ne.

30Su ré yé gato bariwa Yesus Kristus, án ben sukye nai nin tepsu wam ga nyim nin me do yé ne ben sukye nai ji dom. Su ré dom, nin jam do, ye gato bariwa Yesus Kristus ne ben sukye nai ji tó.


  Share Facebook  |  Share Twitter

 <<  Filipi 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran