Alkitab Mobile SABDA
[VER] : [ABUN]     [PL]  [PB] 
 <<  Ibrani 4 >> 

1Suk gato Yefun Allah tom su ye Israel subere ye Israel kem not mo Yefun Allah bi nat-i ne kwop mone it. Suktom ne ndo wa men tó. Sane men mewa men nggwa subere Yefun Allah do watbot men it yo, men ge dik yo gwet mo nde, wo men yé mwa ne sino kem not mo An bi nat-i tepsu suk gato Yefun tom ne.

2Suk gato Yefun tom ne ndo wa men mó tó, we yé ki sukdu subot os ndo gato Yesus Kristus kak ne nai men. Yé kibot Yefun Allah bi sukdu nai ye Israel dom, sarewo án yo onyar kem mo sukdu ne nde, án su krat ware, sane sukdu ne yo ós án wa ku suk gato Yefun tom ne nde.

3Sarewo men yé gato onyar kem mo sukdu ne, bere men kem not mo Yefun Allah bi nat-i tepsu suk gato Yefun tom ne. Men sa, bere kom mo nat ne, sarewo Yefun ki subot yé gane, yé gato bariket Yefun bi sukdu-i sare do, "Ji maskwa ket án, ete Ji tom su án do, 'Mara! Nat gato Ji fro wa Ji si án kem not mone yo, bere án yo kom mone nde go!' " Yefun Allah da fro nat ne tomgatu An ut suk mwa mo bur ré, sarewo yé gato bariket Yefun yo kom mo nat ne nde.

4Yefun fro nat ne tomgatu An ut suk mo bur ré, tepsu ye krom mo Yefun bi sukdu, Yefun ki sukdu subot kam domufit sare do, "Kam domufit ne, Yefun Allah kem not kadit suk mwa gato An ben ne sino." Sane Yefun fro nat ne nyim wé kadit kam domufit ne re.

5Ye krom sukdu gato Yefun ki subot nat gato Yefun fro ne o sare do, "Mara! Nat gato Ji fro wa Ji si án kem not mone yo, bere án yo kom mone nde go!"

6Sane ye Israel gato jam Yefun Allah bi sukdu gato ndo su kam nyim ne, án yo si Yefun Allah kem not mo nat ne nde, we án bariwa jammo Yefun Allah bi sukdu-i ne. Ye yi neya sa, ye gato jammo Yefun bi sukdu-i ne, bere ku os wa án si Yefun Allah kem not mo bi nat-i ne mó tó, suk gato Yefun tom ne ndo mó tó.

7Sane Yefun Allah fro bi kam-i gato ye kendo mo Yefun Allah bi sukdu do, "Kam ré" ne mó re. Su "Kam" gato ye ki subot ré bere men si Yefun Allah kem not mo An bi nat-i. Yefun Allah ki subot "Kam ré" si ye Israel suga nyim tuya. Or o, nam o, Yefun Allah ki sukdu ne nai yeraja Daud, ete Daud waii krom napyo anato men jam. Sukdu ré ye krom mo Yefun Allah bi sukdu, tepsu gado ji krom ne, sare do, "Su kam ré, nin do jam Yefun Allah ki sukdu nai nin it yo, nin su krat wa nde."

8Yosua fro ye Israel ne kem not mo bur det gato Yefun Allah tom su án sisu sangge ne sa, bere Yefun Allah yo ki sukdu subot kam yi yo o nde, wo Yosua yo kak os wa ye Israel kem not mo Yefun bi nat-i nde, sane Yefun ki sukdu subot kam dik yo o re.

9Sane Yefun Allah tom su An bi rus-i do, An fro bi kam-i gato men kem not ne mó re, tepsu Yefun Allah kem not su kam domufit ne, bere men si Yefun kem not mone tó.

10We, sare, men yé gato kem not mo Yefun bi nat-i tepsu Yefun Allah tom ne, bere men kem not kadit suk mwa gato men ben wa Yefun mo bur ré, tepsu Yefun Allah dakai ut suk mwa ne, orete An kem not kadit suk gato An ben ne.

11Sane men sino wergat men nggwa sisu men mit dik si men onyar dik, subere men si An kem not mo An bi nat-i, tepsu Yefun Allah tom su men ne. Men werwa, subere men bariket Yefun Allah bi sukdu nde, saga nyim ye deyo ben ne, subere ri ma Yefun Allah do watbot men ne yo, men ge dik yo gwet mo nde, wo men yé mwa ne sino kem not mo Yefun Allah bi nat-i.

12Men jammo Yefun Allah bi sukdu sor, we sukdu gato Yefun ki ne bere ós men kem ndo. An bi sukdu-i ne pet mo men mit. An bi sukdu-i ne pet mo men mit kru wai kadit nyom gato ot de we gato ye syer men su ne. Ye syer men su nyom ot de we it yo, nyom ne bere kom mo de nden sor nde, wo kom mo men de mit kai. Sane dom Yefun Allah bi sukdu-i pet mo men de nden sor nde, wo pet mo men de mit kai, bere kru wai kadit nyom ne o re. An bi sukdu-i pet kom mo men mit kai, mo pe gato men da kridek si men da gesyos miten. An bi sukdu-i pet kom mo mit kai, kom mo pe gato men yetu dini rit si men gus mo men dini ne miten. An bi sukdu-i kak men bi sukjimnut subot suk gato men nutbot si suk gato men iwa men ben ne. Sane Yefun bi sukdu-i pet kom men mit sane sor men jam suk gato ndo kadit suk gato ibit mone.

13Men yo ku os wa gurik suk yo kadit Yefun Allah mo nde, sukwokgan yo dom nde. Yefun jam suk mwa ne o re. Suk mwa ne sino gato Yefun Allah ut ne, suk yo kewa nde, An me suk mwa ne dakai bor yi sor. Men yo ku os wa gurik suk gato men ben ne nde, sane bere men ki subot suk gato men ben ne rer nai Yefun Allah gato ndobot men su kam sari ne ma sor.

14Men bi Yekwesu gato gum kok wai mo Yefun Allah bi nu, An sa, mu kom mo Yefun Allah dakai gwem mo gu, An ki suk wa men mone. Men bi yegweswai ne gum do, Yesus, Yefun Allah bi Gan. Men ki do, men onyar kem mo An, sane men jom An bi sukdu-i gato men onyar kem mone krat et.

15Men bi yegweswai gato gum kok wai mo Yefun Allah bi nu ne, An kem mo bur ré sa, An da kridek tepsu men yetu gato yo nggi nde. An kaim rere tepsu men yetu kaim rere. Sane suk yo da ma tik Yefun Yesus mit wa ben sukibit ket kwayo-kwayo tepsu men yetu sino mó re, sarewo An yo ben sukibit yo mo nde.

16Sane men yo nggi nde yo, men karowa Yefun et. Men nyuwa men ki men bi sukdu-i su Yefun Allah nde, wo men ki sor, men damen wa nde. Men jam do, men yo ben suk yo nyim wa An nde, wo Yefun ben An bi suk-i su men yo, An dakai bi sukjimnut sye kas subot men yi sor, bere Yefun ós men mone. Sane men ndekwa An os men et, subere An syo suk mwa gato ndo nai men dakai yi tepsu bi kam gato men mitmo suk ne su.


  Share Facebook  |  Share Twitter

 <<  Ibrani 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran