Dual Panel1Yetu ge dik yo gato gum do Ananias, an si an bi nggon Safira so an we bi bur det.
2Ananias gwat bi sugum napyo syo nai yerasul. An ki do, "Sugum gato ji ku kadit ji bi bur det gato ji so anare." An da ki sane, ondewo, an grem sugum napyo wa an dakai. An bi nggon jam suk gato an ben ne dom.
3Orge Petrus ki do, "Ananias, ben sa u anato biris bi yekwesu bok nggwa mo nan, ete nan kidar Yefun Allah Gen sare ne? Nan ki do, sugum gato nan ku kadit nan bi bur det gato nan so anare, ondewo, nan dakai grem sugum napyo wa nan dakai. Nan kidar Yefun Allah Gen ko ré go!
4Nan yo so nde tó, nan bi bur det anane. Sugum gato nan ku mo bur det gato nan so ne anato nan bi sugum dom fe! Suk gato nan ben su sugum ne kadit nan sor. Sarewo nan ki do, nan gwat sugum mwa ne sino syo nai men, ondewo nan gwat napyo sor re. Nan kidar anane! Ben sa u anato nan kidar suk sare ne? Nan kidar men yetu nde, wo nan kidar Yefun Allah anane."
5Ananias do jam suk gato Petrus ki ne, orge an kwop, an ges gwa mo bur. Yé mwa gato jam sukdu subot Ananias ne nyuwa ndo nde.
6Yemsok ge bok yo ma far Ananias mukri su san det. Yemsok ne sam Ananias mukri mu nden, ete bi mo makwe.
7Bergan jam gri yo o, Ananias bi nggon ma. Mom jam nde mom bi ya kwop re.
8Petrus ndo mo mom do, "Nan ki rer et, nin ka we so nin ka we bi bur det ne bi sugum-i anare, bado?" Mom ki do, "Sangge, men ka we ku sugum ana gane it."
9Petrus ki nai mom do, "Ben sa u anato nin ka we tom yu wa kidar Yefun Allah Gen ne? Nin ka we nut do, bere nin ka we yo ku sukye nde, bado? Nan jam yemsok ga ma ré. Yemsok ne sam nan bi ya mukri mu bi mo makwe re. Yemsok ne ma wa sam nan mukri-i mu bi mo makwe ne dom."
10Petrus do ki sukdu ne or, sugane it, Ananias bi nggon kwop mo Petrus gwem re. Mom ges gwa mo bur mo Petrus gwem. Orge yemsok ne ma sok mo nu mit sa, án ku Ananias bi nggon kwop re. Sane án sam nggon ne mukri mu bi mo makwe, mo nggon ne bi ya de.
11Sane ye gato onyar kem mo Yefun Yesus si yé mwa gato jam sukdu subot Ananias si bi nggon ne, án sino nyu ndo nde.
12Yerasul ben suk mwa gato kadum Yefun Allah bi suktinggi ne bor, subere yé mwa ne sino yeket ete nutbot ndo nde. Tomgane yé mwa gato onyar kem mo Yefun Yesus sum sino mo Salomo bi Nusyari.
13Ye yi neya yo si ye gato sum mone daret nde, án nyuwa re. Ye da nyuwa, sarewo yé mwa ne sino bes ye gato onyar kem mo Yefun Yesus ne gum kok.
14Ye da nyuwa, sarewo kamdik-kamdik yebris si nggon deyo o waii nai sukjimnut do, án simo os be gato Yefun Yesus kak ne, án onyar kem mo Yefun Yesus it, sane án sok tó ye gato onyar kem mo Yefun Yesus nyim ne.
15Sane ye gwat ye gato ku suki ne ma. Ye grem sem mo bi sun mo os miten eswa Petrus muket os ne, subere Petrus gen do tok ye gato i ne yo, bere ye ne ge re.
16Yetu mwa yé, án ma kadit kota bok yo karowa Yerusalem, án ma sum mone dom. Án gwat án bi nje gato i, án gwat ye gato semda ben ne ma mone. Orete yerasul ben ye gato i ne ge re. Yerasul syun semda ti wé kadit ye gato semda ben ne re.
17Yekwesu gato gum kok wai mo Yefun Allah bi nu si yetu ge bok yo gato simo an, gato sok mo ye Saduki bi nje, án sino maskwa ket yerasul, we yé mwa misyar án si án bi sukduno-i, wo yé mwa ne mit iwa yerasul si bi sukduno-i.
18Sane án but yerasul bok ne, orete án bok yerasul ne mo penjara sye,
19sarewo noru miten, ete Yefun bi malaikat ge dik yo kak penjara bi nusyo. Malaikat ne gwat yerasul ma nden, orete malaikat ki nai yerasul bok ne do,
20"Nin mu mo Yefun Allah bi nu de mo ros de mit. Nin mu duno nje subot os be gato Yesus Kristus kak wa yetu kem gesyos. Nin duno nje subot sukdu mwa ne sino, kwa yo gwet dom nde."
21Sane, ik nyotkwo, yerasul bok ne mu mo Yefun Allah bi nu de mo ros de mit ne sagato malaikat syogat án ben ne, orge yerasul duno nje mone. Sugane yekwesu gato gum kok wai mo Yefun Allah bi nu si yé bok yo gato simo yekwesu ne ma mo pe gato an sum mone. Yekwesu ne si án ge bok ne ma kom mone sa, án kendo ye Yahudi bi yepasye si yekwesu subere yepasye sum ete kibot yerasul. Án kendo ye Yahudi bi yepasye ma sum sino, orge án syogat nje mu kar yerasul kadit penjara ma.
22Sarewo yé gato mu kar yerasul ne yo ku yerasul mo penjara nde. Yé ne ma, orge án ki nai yepasye gato sum mone do,
23"Men mu kom mo penjara or, nusyo mone krat sino. Ye gato mewa penjara ne da ti mo nusyo de dom, sarewo men sok mo penjara mit ne sa, men yo ku nje yo mo nde."
24Ye gato mewa Yefun Allah bi nu bi yekwesu si yekwesú mo Yefun Allah bi nu ge bok yo jam sukdu ne, án nalar, án nutbot ndo nde. Án nutbot do, "Yerasul ben suk sane te, bere yerasul ben suk sato suma o ne?"
25Sugane yetu ge dik yo ma ki do, "Nin jammo suk gato ji ki ré et, yé gato nin bok mo penjara ne, ré ne, án ti mo Yefun Allah bi nu de mo ros de mit, án duno nje mone."
26Sane yé gato mewa Yefun Allah bi nu bi yekwesu si bi pa mu kar yerasul ne ma. Án but yerasul, án yo ben sukot su nde, we án nyuwa, sawe yé mwa mo Yefun Allah bi nu ne maskwa ete am án su jok.
27Án gwat yerasul ma mo pe gato yepasye sum mone, subere yekwesu gato gum kok wai mo Yefun Allah bi nu ne ndobot yerasul ne. Yekwesu ne ki do,
28"Men syaugat nin ki sukdu subot Yefun Yesus o nde, wo suma ben to nin mu duno nje mo Yerusalem gat sor ne? Suk ne sor nde, wo nin ndak men ye Yahudi bi yepasye sare do, men anato gu Yefun Yesus kwop wé ne."
29Petrus si yerasul yi ne ki do, "Men jammo yetu nde, wo men jammo Yefun Allah anato men ki sukdu subot Yefun Yesus.
30Sane men ndak nin do, sangge, nin anato gu Yefun Yesus kwop wé mo kwesukwin. Nin da gu An kwop, sarewo Yefun Allah gato jom men bi amui ne, An sun Yefun Yesus kadit sukkwop o re.
31Yefun Allah bes Yefun Yesus gum Yekwesu gato nggiwa jowa men yetu. Yefun Allah bes Yefun Yesus gum Yekwesu gato An syogat ma kak os ndo wa men yetu subere men ku os wa men kem ndo to kapyo mato kapyo. Yefun Allah bes Yefun Yesus gum Yekwesu subere men ye Israel ku os wa men kwet kadit sukibit gato men ben ne, ete men jammo Yefun, subere Yefun Allah yo maskwa men mo sukibit gato men ben ne o nde, tepsu An tot sukibit ne wé kadit men re.
32Sukdu gato men ki subot ne, men dakai me su men gro it, anato men kibot ne. Yefun Allah Gen me su An gro dom, sane An ki sukdu subot Yefun Yesus mo men yetu mit si men onyar. Yefun Allah Gen ne, Yefun Allah syo nai men yé gato jammo An."
33Yepasye mwa ne jam Petrus bi sukdu-i sa, án on sa ndo nde. Sane án iwa gu yerasul bok ne kwop wé,
34sarewo yepasye ge dik yo gato gum do Gamaliel ti mo yepasye ne gwem ete ki an bi sukdu-i. An ye Farisi, an yeguru gato duno ye Yahudi subot Musa bi sukduno. Yé mwa ne sino un yenggras ne. Yenggras ne ti, an nukbot bi sukdu-i nde tó, yenggras ne syogat ye gwat yerasul bok ne mu nden yei.
35Ye gwat yerasul mu nden, orge an ki nai yepasye mwa mone do, "Men, ye Israel, men nut subot suk gato bere men ben su yé bok gare sisu ndo et.
36Suga nyim tuya, yetu ge dik yo gato gum do Teudas, an bes an nggwa tepsu an yepasye or, karowa yetu ka wotin at simo an. Sarewo ye gu an kwop wé, orge yé mwa ne satu mu mo kadik-kadik bi nat-i o re, or o suk yo mo nde.
37Ye gu Teudas kwop wé, or ye Galilea ge dik yo gato gum do Yudas waii bes nggwa tepsu yekwesu wa yé bok yo simo an. Tomgane ye Roma krom yetu mwa gum mo sensus Yudas ré tepsu yekwesu wa yetu ge bok yo gato werwa syun ye Roma wé kadit ye Yahudi bi bur-i, subere ye Yahudi dakai ti mo an dakai. Ye gu Yudas kwop wé dom, orge ye gato simo an satu mu mo bi nat-i o re, suk yo mo nde.
38Saneyo, ji ki sare do, men misyar yé bok gato men kibot ré. Men duyawa án nde, we sukduno gato án duno nje su ne do ma kadit yetu it yo, kom mo rut sa, suk yo mo nde.
39Wo sukduno gato án duno nje su ne do ma kadit Yefun it yo, bere men yo nggiwa duyawa án nde. Sukduno ne do ma kadit Yefun it yo, men duwer án mo sukduno ne yo, tepsu men duwer Yefun Allah it anane. Ji dakai ki yi kaii." Gamaliel ki sane, or yé mwa mone ki do, "Sangge, nan bi sukdu-i ne sangge. Digane it."
40Sane yé kendo yerasul bok ne ma o, yé kwam án su bus, yé syaugat án ki subot Yefun Yesus gum o nde, orete yé sombok án wé.
41Yerasul ne mu kadit yepasye mwa ne, án mit at, we án jam do, Yefun Allah nut do, án sa, gum kok tep wa án ku sukye kadit yepasye ne mo sukdu gato án ki subot Yefun Yesus.
42Sane kamdik-kamdik yerasul bok ne ki sukdu subot os ndo gato Yefun Yesus kak wa men yetu ne. Yerasul ne kibot sukdu ne gat sor mo Yefun Allah bi nu de mo ros de mit ne. Yerasul bok ne mubot nu dom, án duno nje su sukdu gato ndo ne petok sare do, "Yefun Yesus anato Yekwesu gato Yefun Allah tom su men bi amui do, bere An syogat Yekwesu dik yo ma mo bur ré wa nai men yetu kadit sukye ete jowa men. Yekwesu ne anato Kristus."