Dual Panel1Orete ji sokme Ye gato kem mo Yefun bi kursi ne jom buku mo An syim ge. Mo buku mit ye krom suk mo kertas de we ne sino. Ye rum buku ne orete Yefun ut su lilin rom wam mufit wa jom kertas mo de nden ut krat. Ye me lilin gum mone anato ye jam do, Yefun bi buku anane, sane ye gato Yefun bes ne sor ete gum tep wa kak lilin gum ne wé re.
2Orete ji sokme malaikat ge dik yo gato nggi. Malaikat gato gwat Yefun Allah bi suktaru ne saiye nggi do, "Je u anato gum kok tep wa an kak lilin gum bok ne wé ne? Je u anato gum kok tep wa rek buku ré ne?"
3Sarewo mo gu nim ne si bur ré si bur desnak ne sino, ye yo ku yetu ge dik yo gato gum kok tep wa an kak lilin gum bok ne wé yo mo nde. Ye yo ku yetu ge dik yo gato gum kok tep wa kak lilin gum ne sor nde, wo ye yo ku ye gato gum kok tep wa baca buku ne dom nde.
4Ye yo ku yetu ge dik yo gato gum kok tepsu wa an rek ete baca buku ne mo nde, sane anato ji wo, ji wo ndo nde.
5Sugane yenggras ge dik yo gato badek wa un Yefun mone, an ki nai ji do, "Nan wo nde. Ye gato yé kendo gum do, Singa, An Yekwesu mo yewis ye Yahudi, An sa, nggi wai o re. An sa, ye gato ye kendo gum yo o do, yeraja Daud bi dat. An sa, nggi wai kadit bur ré bi suk-i, sane anato An gum kok tep wa An kak lilin gum bok ne wé. An gum kok tep wa An rek buku ne." Orete malaikat ne ki nai ji do, "Nan me et."
6Orete ji sokme Domba Gan ge dik yo ti mo yekwesu bi kursi mwa ne miten. Yefun bi pakwerut ge at mo gu gato ka sato suge at si yenggras ge musyu we sop at ne ti wairi wa Domba Gan ne si kursi ne. Domba Gan ka sato suge gato ye gu kwop wa som Yefun su ne. Domba Gan suti mufit mó, An gro gan mufit mó. An gro gan tepsu Yefun Allah Gen mufit gato Yefun Allah syogat mubot bur ré iwedewe.
7Domba Gan ne ma mo Yefun Allah gato kem mo An bi kursi ete nai buku gane kadit Yefun Allah syim ge.
8Domba Gan ne nai buku sa, suge at si yenggras ge musyu we sop at ne bare nggwa sino mo Domba Gan gwem. Án sino jom kecapi si mbem emas ses su suk yo gato ye gre ete i-bu basmi grik ndo. Suk gato grik ndo ne tepsu sukdu gato yé gato onyar kem mo Yefun Yesus ki nai Yefun Allah ne.
9Án sino ba sukbadek be yo sare do, "Domba ga gum kok ne o, Domba ga sye wai ne o, Nan sa, gum kok tep wa Nan nai buku ne o, tep wa Nan kak lilin gum wé ne o. Nan gum kok a we, Nan gum sye wai a we, Ye gu Nan, Nan dé sye wa yetu ne o, Nan bi nggwa tepsu suktot wa ne o. Nan dé sye wa yetu o, Nan tepsu suktot wa yetu o, Nan dé sye wa yeyo-yeyo gato sok mo Yefun bi rus-i ne o, Yetu mwa ne mo buryo-buryo sino o. Nan dé sye wa yetu o, Nan tepsu suktot wa yetu o, Nan dé sye wa yetu wisyo-wisyo sino ne o, Yetu mwa gato ki ayo-ayo sino o.
10Domba ga gum kok ne o, Domba ga sye wai ne o, Nan sa, nai yetu bok ne sok mo Yefun bi rus-i ne o, yé bok ne tepsu yegweswai wa yetu si Yefun Allah ne o. Domba ga gum kok ne o, Domba ga sye wai ne o, Nan sa, bes yetu bok wa ben Yefun bi suk-i ne o, yé bok ne jom suk mwa mo bur ré o."
11Orete ji sokme mone o. Ji jam malaikat yaino, mwa yé re, ki bi sukdu-i. Malaikat ne mwa yé ndo nde, mwa wai o re, nat ne buk su. Malaikat yaino ne ti wairi wa suge at sisu yenggras ge musyu we sop at ne.
12Malaikat mwa ne ba sukbadek, án ba sye sare do, "Domba ga ye gu ne e, Domba ga kwop ne e, Nan sa, Nan gum kok ne o, gum sye ne o. Men un An gum a we, Men bes An gum a we, Domba ne tep wa ku suktinggi mwa ne o, tep wa suk mwa ne sino o. Men un An gum a we, Men bes An gum a we, Domba ne tep wa ku suktinggi mwa ne o, tep wa dakai rer kom mo mit ne o. Men un An gum a we, Men bes An gum a we, Domba ne tep wa ye bes An gum kok ne o, tep wa ye un An gum petok ne o."
13Orete ji jam suk mwa gato mbau mo gu nim e, mo bur ré e, mo bur desnak e, mo sem e ne sino, suk mwa gato mbau mo pe mwa ne sino ba sukbadek sare do, "Yefun ga kem mo kursi sye ne e Domba Gan ga mone e Men un An we ne gum ne o Men bes An we ne gum kok ne o. Yefun si Domba Gan ne e An we ete gum ne sye wai ne e. An we ete nggi wai kadit suk mwa ne o Su ré to kapyo to kapyo ne o."
14Suk mwa ne ba sukbadek ne, sane anato suge at ne ki do, "Sangge!" ete yenggras ge musyu we sop at ne bare nggwa ete som Yefun dom.