Alkitab Mobile SABDA
[VER] : [ABUN]     [PL]  [PB] 
 <<  Yohanes 16 >> 

1Ji ki suk mwa ne sino su nin subere nin misyar Ji nde, wo nin onyar kem pe mo Ji sor.

2Bere ye Yahudi syun nin wé kadit án bi nu ari. Bere kapyo tak yé gato gu nin kwop wé gendo suk gato án ben ne Yefun Allah imo.

3Yé ne ben suk ne nai nin, we án yo jam Ji bi Ai nde. Án jam Ji dom nde.

4Sarewo Ji ki sukdu ne nai nin jam su ré, subere kam gato suk ne do bor it yo, nin napakom sukdu gato Ji ki nai nin ré, ete nin ti nggi mone." "Suga nyim ne, Ji yo ki sukdu gare nai nin jam nyim nde, we sugane Ji si nin mone sino tó.

5Wo Ji satu mu mo Ji bi Ai gato syogat Ji ma it anare. Sarewo nat gato Ji mu mone, nin ge bok ré yo ndo mo Ji subot nat ne nde.

6Ji ki do, Ji mu, anato nin kwabom dek ndo nde.

7Wo suk gato Ji ki ré suksangge anare, sa ndo sa Ji mu. Ji yo mu nde yo, Yefun Allah Gen gato ma ós nin ne bere An yo ma win Ji nde. Wo Ji mu kadit nin it yo, bere Ji syogat An ma mo nin.

8Yefun Allah Gen do ma yo, bere Yefun Gen kak yé mo bur ré bi sukjimnut subere án jam subot suk gato án ben siri kadit Yefun Allah bi sukduno-i ne. Bere Yefun Allah Gen kak yé mo bur ré bi sukjimnut subere án jam subot suk gato tepsu Yefun Allah mit. Bere Yefun Allah Gen kak yé mo bur ré bi sukjimnut subere án jam do, sangge bere Yefun Allah ndobot ye gato ben sukndo si ye gato ben sukibit sino, ete bere Yefun Allah syo sukye nai yé gato ben sukibit ne.

9Bere Yefun Allah Gen kak yé bi sukjimnut subere án jam do, suk gato án ben siri kadit Yefun bi sukduno-i ne anato án yo onyar kem mo Ji nde, án ben sukibit it anane.

10Bere Yefun Allah Gen kak yé bi sukjimnut subere án jam do, Ji anato ben suk tepsu Yefun Allah mit. Ji mu mo Ji bi Ai it anare, Ji mu mo pe gato nin yo me Ji o nde. Sane anato bere yé jam do, Ji anato ben suk tepsu Ji bi Ai mit, ete Ji bi Ai imo suk gato Ji ben ne.

11Bere Yefun Allah Gen kak yé bi sukjimnut subere án jam do, Yefun Allah syo sukye nai nje sino gato ben sukibit wai mo An mit, we Yefun Allah syo sukye nai biris bi yekwesu gato jom bur ré it anare.

12Ji iwa Ji ki sukdu mwa wai o nai nin, sarewo Ji yo ki nde, we nin bi sukjimnut yo kak tep wa nin but sukdu ne nde tó.

13Yefun Allah Gen do ma yo, bere An duno nin su suk gato sangge, mo An mit sukkidar yo mo nde. An anato kadum os gato rer nai nin. An ki sukdu-i tepsu An dakai bi sukjimnut-i nde, wo An ki An bi sukdu-i tepsu suk gato An jam kadit Ji. Bere An ki subot suk gato bor su kam sari ne ma rer nai nin jam re.

14Bere Yefun Allah Gen bes Ji gum kok, we An ki Ji bi sukdu-i rer nai nin jam.

15Ji bi Ai bi suk-i ne sino anato Ji bi suk-i. Sane anato Ji ki do, bere Yefun Allah Gen ki Ji bi sukdu-i rer nai nin jam."

16Yefun Yesus ki do, "Yo nam nde ge, nin yo me Ji o nde, or o nam gan yo o, bere nin me Ji o re."

17Yefun Yesus bi pakon ndo mo yu do, "Men bi yenggras ki do, 'Yo nam nde ge, men yo me An o nde. Or o nam gan yo o, men me An o re.' An bi sukjimnut sa u ne? An ki do, An mu mo An bi Ai ne te, bi sukjimnut sa u ne?"

18Pakon ne ndo mo yu gat sare do, "An ki do, 'Yo nam nde' ne te, bi sukjimnut sa u ne? Men jam nde An bi sukjimnut ne ware."

19Yefun Yesus jam bi pakon mitwa pakon ndo mo Yefun Yesus subot An bi sukjimnut. Sane Yefun Yesus ki nai An bi pakon do, "Gado nin ndo mo yu subot suk gato Ji ki do, 'Yo nam nde ge, nin yo me Ji o nde. Or o nam gan yo o, nin me Ji o re.' Te, nin ndo mo yu subot sukdu ne bado?

20Suk gato Ji ki ré suksangge anare, bere nin wo, nin nderku Ji. Wo yetu mo bur ré mit iwa o re. Bere nin kwabom dek ndo nde, sarewo bergan yo o nin mit at wa wai o re.

21Tepsu nggon far nukwe i su pa, mom ku sukye ndo nde. Sarewo mom do kem su pa or wé, ete mom mbrinket sukye gato mom ku ne, we mom mit at wa pa gato mom kem su ne.

22Sane nin dom, su ré nin kwabom dek, wo bere Ji ku nin o yo, bere nin mit at wa wai o re, ye yo nggiwa ben nin bi sukjimnut ne ges nde.

23Su kam gane yo, nin yo ndo mo Ji subot suk yo o nde. Suk gato Ji ki ré suksangge anare, suk to nin ndek mo Ji bi Ai, ete nin ki Ji gum su yo, bere Ji bi Ai syo nai nin re.

24Kom mo kam ré, nin yo ndek suk mo Ji bi Ai, ete ki Ji gum su nde tó. Sane nin ndek suk gato nin yewa ne et. Sane bere Ji bi Ai syo suk ne nai nin subere nin mit at mo suk gato nin ku ne re."

25"Ji ki suk mwa ne nai nin su sukamno, wo kam yo tak Ji yo ki suk su sukamno o nde. Bere Ji ki rer subot Ji bi Ai nai nin sor.

26Su kam gane it yo, nin anato ndek suk mo Ji bi Ai, ete nin ki Ji gum su. Nin jammo suk gato Ji ki ré et, bere Ji yo ndek suk mo Ji bi Ai wa nin nde,

27we Ji bi Ai dakai bi sukjimnut sye kas subot nin. Ji bi Ai bi sukjimnut sye kas subot nin, we nin bi sukjimnut sye kas subot Ji, ete nin nut do, sangge, Ji ma kadit Yefun Allah.

28Sangge, Ji ma kadit Yefun Allah. Ji ma mo bur ré re. Sarewo Ji mu kadit bur ré, Ji satu mu mo Ji bi Ai it anare."

29Sane Yefun Yesus bi pakon ki do, "Su ré sa, Nan gwat sukamno o nde, wo Nan ki sukdu rer nai men jam it anane.

30Men jam do, Nan anato jam suk mwa ne sino. Nan anato jam suk mwa ne rer wai kadit ye yi ne ya. Men yo mitwa men ndo mo Nan subot suk yo o nde. Sane anato men jam do, sangge, Nan anato ma kadit Yefun Allah."

31Yefun Yesus ki nai pakon ne do, "Nin onyar kem mo Ji it anare go!

32Bergan, karowa it, nin titi daret, nin gedik-gedik titi mu mo bi nu-i. Bere nin sino mu kadit Ji, Ji wadigan sor ete kem. Sarewo Ji wadigan sor nde, we Ji bi Ai sisu Ji tó.

33Ji ki sukdu mwa ne nai nin jam subere nin kwabom kam mo Ji, ete nin kem not, nin nyuwa suk yo nde. Mo bur ré nin ku sukye mwa. Sarewo Nin nyuwa nde, we Ji sa, Ji nggi wai kadit biris bi rus-i gato ben sukibit mo bur ré re."


  Share Facebook  |  Share Twitter

 <<  Yohanes 16 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel