Alkitab Mobile SABDA
[VER] : [ARALLE]     [PL]  [PB] 
 <<  1 Korintus 3 >> 

1Oa' solasohong, naonge anna sibahaingkea' diting dakoa' mala kupa'karai sinnoa tau ang puhang untahimbo Inaha Masero. Donetoo kupa'karaikoa' sihapang tau ang untuhu'ike' pampemala di mentolinona, aka' donetoo dake' matama kapampetahpa'ammu, sinnoakangkoa' änä' malea yaling di kapampetahpa'ang.

2Änä' ang sumusuke' dai si dibea andeang kahha'. Noa tumokoa' dio, donetoo kupakuhukoa' pepakuhu ang sihatang tau ang dake' matama kapampetahpa'anna, aka' daia' umbela untahimbo pepakuhu ang matama. Anna moi dinoa dake'a' mala untahimbo,

3aka' untuhu'ikangkoa' pampemala karakemu. Aka' ponna ma'kasuehekoa' anna sibehta-behta, ya' maleso dioatee untuhu'i si'dakoa' pampemala karakemu sinnoa tau ang dake' ungnginsang Puang Alataala.

4Aha di alla'mua' ang si mangngoatee, "To pentindo'naä' kodi' Paulus." Anna tau senga' naoane'tee, "Kukärä'i puhane' Apolos." Pembabe ang noa indee sihatang tau ang dake' ungnginsang Puang Alataala.

5Kami' ta Apolos, ya' sabua'na kaleang kami' Puang Alataala ang nasuo mantehtekoa' anna malakoa' mampetahpa' pano di Puang Yesus. Kikähäng yato kähängang ang puha napadurungngiang Puang Alataala.

6Kodi' ang mangngambo', Apolos ang mambayai, ampo' Puang Alataalaete'ne' ang mampalobo', tadia kami'.

7Yato tau ang mangngambo' anna yato ang mambayai daine' pahallu liu. Ang handang pahallu, dianto Puang Alataala aka' dianto ang mampalobo'.

8Tau ang mangngambo' anna tau ang mambayai sinnoa siang pahtuyunna. Anna sahing la untahimbo sahona situhu' pengkähänganna.

9Kami'mitoo sihapang mesa kombongang to pobela' ang napotau Puang Alataala, anna dioa'-dio, solasohong, sihapangkoa' dio bela'na. Mala toukoa' dipasihapang dasanna Puang Alataala.

10Aka' mana' pa'kalemunna Puang Alataala lambi' naängkä'ä' mendahi rasulna, to handang dolu umbahaingkoa' Kaheba Mapia. Malaä' dipasihapang mesa to pampake'de' dasang ang manähäng, ang hali umpake'de' busung di hahona batu. Anna tau senga' ang umpatulu' yato pengkähängangku umpake'de' yato dasang yaho di busung. Ampo' ingkänna tau ang mengkähäng yato di dasang pahallu la umpihki' liu yato pengkähänganna anna malai mahasa liu.

11Supung ke mampetahpa'i tau pano di Puang Yesus anna malai mendahi petauanna Puang Alataala. Mala dioatee Puang Yesus Kristus dianto yato batu ang natanang Puang Alataala ang naongei dipampake'de'i yato dasang, dai aha senga'na.

12Ponna ke ahai to pengkähänna Puang Alataala ang mahasa pengkähänganna, ya' mala dipasihapang mesa tau ang umpake'de' dasang umpake ma'kahupa-hupa aka-aka ang mapia, hapanganna: bulahang, pera' anna batu masu'li'. Anna ponna ke ahai to pengkähänna Puang Alataala ang dai mahasa pengkähänganna, ya' malane' dipasihapang mesa tau ang umpake'de' dasang umpake ma'kahupa-hupa aka-aka ang dai mapia liu, hapanganna: kayu, päräng anna lora.

13Dahi ponna ke naämpu'ii api yato dasang, ya' la landa' pole' aka yato ang dipake mampake'de' ang mahasa anna ang tahuhu, aka' yato ang mahasa la tontong, ampo' yatone' ang tahuhu la mämpu' nei'. Noa tunne' pengkähänna yato ingkänna petauanna Dehata la landa' pole' ke sumuleng Puang Yesus, aka' di allo yatoo la napahehsa Dehata pengkähänna ingkänna tau: la mahasaraka, daraka.

14Ponna ke malai tontong yato pengkähänna mesa tau, ke puhang ungngolai pampahehsaanna Dehata, ya' la untahimbo sahona.

15Ampo' ponna ke dai tontong yato pengkähänna ke puhang napahehsa Dehata, ya' la huki nei'. Bahtuanna kalaena la dilahpa' di hao mai di tahungkunna dosanna, ampo' daine' la disahoi. Anna mala nei' dipasihapang tau ang naämpu'i api dasanna: ingkänna porehana pa'da, ampo' kalaena nei' salama'.

16Darakaa' dio ungnginsang ungngoatee sihapangkoa' Dasanna Puang Alataala? Bahtu' Inaha Maserona Puang Alataala tohho yaling di alla'-alla'mu?

17Tau ang ungkarakei inde Dasang Ada'na la nakarakei toe' Puang Alataala. Aka' yato Dasang Ada'na masero, anna diongnga'too yato Dasang.

18Daa umbulitu' kalaemua'. Ponna ke ahai di alla'mu tau ang unsanga kalaena manähäng situhu' pangngitanna to lino, ya' pahallu la mentomaho di olona hupatau anna malai mendahi manähäng si'da-si'da di olona Puang Alataala.

19Aka' yato ang nasangai hupatau kamanähängang setonganna katomahoangngete' di olona Puang Alataala. Aha tiuki' yaling di Suha' Maserona naoatee, "Tau ang unsanga kalaena keaka' anna manähäng, la napatinaho Puang Alataala yaling di kamanähänganna toboe'."

20Anna aha toi tiuki' naoatee, "Nainsammi Puang Alataala pihki'na to manähäng, naoatee dai aha kunanna."

21Dahia', solasohong, daa umpokale'dei ke untindo'ikoa' supu mesa tau ang ma'tantu, aka' ingkänna aka-aka ang umpahallu, puhamokoa' nabea Puang Alataala mendahi ampuammu:

22Apolos, Petrus anna kodi', puhamokoa' nabea Puang Alataala anna malai kiduluikoa'. Puhamokoa' nabea katuhoang bakahu anna nalahpa'koa' di hao mai di kamateang ang sapano-panona. Ingkänna ang aha yaling inde di lino, ingkänna ang dahi dinoa, moi ang la dahi di allo-allo ang la sule, naäto' asang anna la mahasa pano di dioa'. Ingkänna aka-aka puha nabeakoa' mendahi ampuammu.

23Anna dioa'-dio ampuannamokoa' Kristus, anna Kristus dianto ampuanna Puang Alataala.


  Share Facebook  |  Share Twitter

 <<  1 Korintus 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran