Alkitab Mobile SABDA
[VER] : [ARALLE]     [PL]  [PB] 
 <<  1 Timotius 6 >> 

1Ingkänna to Sahani ang diposabua' pahallu umpengkähäng manahpaing pongkahana anna napakeangka' anna malai sanganna Puang Alataala anna pepakuhunta dai napatahuhu tau senga'.

2Londonang ang to Sahani pongkahana, dai mala naoatee, "Dä' malaya' aka' santosahaningku siang." Ampo' pahallu tuhtuang bansa' napengkähäng manahpaing aka' solana siang yaling di Puang Yesus ang nakalemui. Ingkänna indee la sika umpakuhuing anna malai napadiinahanna liu.

3Monna ke ahai ang mampakuhu senga' anna dai umpehingngii pepakuhu ang tahpa' didiona Puang Yesus Kristus, Dehatanta, anna didiona untuhu'i pa'elo'na Puang Alataala,

4dianto tau ang ma'tomanähäng-nähäng ang setonganna to tapainsang. Supung nababe umpeäng kaha-kaha ang la mala umpadahi kasitelängang didiona kara, lambi' aha ang sikasuehe, siba'di, situla'-tula' tahuhu, sitanda' tahuhu. Tau ang mampanoa dang aha katahpa'ang yaling di pihki'na. Supung napihki' ke mengkähängngi yaling di kasahaniang la to makaka!

5(6:4)

6Inang aha ang la dilambi' yaling di kasahaniang ahsala' masannangngi inaha didiona aka ang aha di kalae.

7Aka' naonge dahii tau tama di lino, daete' aha aka ang dibaha. Noa tunne' ke mateng tau, datoi aha aka ang la dibaha.

8Sundummite' ke ahang ang la diande anna dipake.

9Ampo' ang la pemala mendahi to makaka mentomaho aka' mailu si'da-si'da supu yaling di inahanna ang sinnoa ahpang ang la mampatallang ke dako'mi.

10Aka' kamailuang di doi' umpakende' ma'kahupa-hupa kakarakeang. Aha sangngaka-sangngaka tau ang supung mailu di doi', napolalang dang mampetahpa' lambi' nahoa kamasuhsaang.

11Ampo' dio to untuhu'i Puang Alataala, dahi pahallu ungkahaoi ingkänna yatoo. Pengkalambi'-lambi'i tontongngo maroho inaha di olona Puang Alataala, tuhu' loloi pa'elo'na, pampetahpa' tatooo, kalemuio para-parammu hupatau, sa'bara'o ungngoloi kamasuhsaang anna mahempo' inahao.

12Pa'silumba si'da-si'dao yaling di kapampetahpa'ang aka' nasuhung natambaio Puang Alataala naonge unsa'biio Puang Yesus di hao di olona tau mai'di anna malai ullambi'o kapataloang dianto tuho sapano-panona.

13Dahi dinoa di olona Puang Alataala, ang umpatuho ingkänna sia anna Kristus Yesus ang umpaitai kasa'biang ang tahpa' pano di Pontius Pilatus, kuoaingkotee,

14Tuhu'i ingkänna inde pahenta sitonda inaha maroho anna dao kekasalaang lambi' kasuleanna Puang Yesus Kristus.

15Tempona yatoo la napama'tantu toboe' Puang Alataala, To ma'kuasa anna ang sihatang dipamatande, Tomaraya ang handang malängkä', Dehata ang umpadihoi'ang ingkänna dehata senga'.

16Dianto supu ang dai mala mate. Tuho toi yaling di kamabayaang ang pansillo' ang dai mala nadungku'i moi poro la mesa tau. Dake' aha tau ang puha mangngita anna datoi aha ang mala mangngita. Supunte' dia ang dipudi anna ma'kuasa lambi' sapano-panona. Aming!

17Pakalehai pano di santosahaninta ang to makaka anna dai sika malängkä' inaha anna dai supu hannu pano di katomakakaanna ang inang dai la tontong. Ampo' pahallu la sika hannu dai' di Puang Alataala ang mambea liu ingkänna behe ang mepasuhaka.

18Pakalehai anna malai sika membabe mapia lolo, marota' anna si umpebea tomande'ing aka-akanna.

19Aka' monna ke napanoai, ya' unghimpummite' katomakakaang yaho di suruka ang la mala dipetahpa' di allo di hundinna, lambi' malang untahimbo katuhoang lambi' sapano-panona ang setonganna.

20O Timotius, dakai manahpai samai ang dipetahpa'ingko. Kahaoii kasitula'-tula'ang ang dai ma'bahtuang anna ang dai mebahanang dai' di Puang Alataala sibaha pepakuhu salao-laona, ang disanga kamanähängang ampo' setonganna tadia, ang umpa'bali pepakuhu ang tahpa'.

21Aha ang mantindo'i lambi' umpellei kapampetahpa'anna didiona pepakuhu ang tahpa'. Puang Alataalarang ang la mambeheingkea' para-para.


  Share Facebook  |  Share Twitter

 <<  1 Timotius 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel