Dual Panel1O ingkämmua' änä'ku, tula' yatoo kupayalingngingkoa' inde di suha' anna malai dakoa' umbabe dosa. Ampo' ke ahai tau umbabe dosa, dai la mahea' aka' aha Puang Yesus Kristus To Tahpa' ang la mampa'tula'ingkea' di hao di olona Ambeta.
2Anna Dianto umbala'iingkea' dipatei lambi' mala naampungngiingkea' dosanta Puang Alataala. Anna dai supung dosanta, ampo' dosanna toe' ingkänna hupatau yaling inde di lino.
3La malesong dioatee ungnginsang si'daingkea' Puang Alataala ke dituhu'i loloi ingkänna pahentana.
4Ke ahai tau mangngoatee, "Kuinsang si'da Puang Alataala," ampo' dai si natuhu'i pahentana, maleso tau yatoo to pa'loseng-loseng anna dai umpadiinaha katahpa'anna Puang Alataala.
5Ampo' menna-menna si untuhu'i si'da-si'da pahentana, tau yatoo sundummi pa'kalemunna pano di Puang Alataala. Menna-menna mangngoatee, "Ungnginsangngä' Puang Alataala," pahallu membabe sinnoa Puang Yesus. Noantoo la dipangnginsangngi dioatee tohhoingkea' yaling di Puang Alataala.
6(2:5)
7Oa' solasohongku ang kukalemui, inde kuuki'ingkoa' tadia pahenta ang mane dianna ditula', ampo' pahenta ang masaeng unghingngi, yato ang puha ditula'ingkoa' mengkalao pampahandu'anna mampetahpa'koa' pano di Puang Yesus.
8Moinnakato noa, inde pahenta mala toi dioatee bakahu, aka' tandaang si'da-si'dang pole' yaling di pembabena Puang Yesus anna yaling di kalaemua'. Aka' tuhtuang umpelleimokoa' kamalillingang anna mesilong pole' kamabayaang yaling di pembabemua'.
9Ponna aha tau mangngoatee, "Tuho yalimmä' di kamabayaang; dai aha sallaanna pembabeku." ampo' ungkahiri' solana to mampetahpa', ya' tau yatoo tuho yalingke'te' di kamalillingang.
10Ampo' menna-menna ungkalemui solana to mampetahpa', tau yatoo tuho yalimmi di kamabayaang, anna dang aha katiteroanna la napolalang manaho tama di dosa.
11Ampo' menna-menna ungkahiri' solana, tau yatoo meinaha karake, dianto yaling loloke' di kamalillingang, anna dai nainsang naoatee, "Umba la kuola?" aka' dai nainsang umpasise'la kamapiaang anna kakarakeang.
12Oa' änä'ku, kuuki'ingkoa' yaling inde di suha' aka' diampungngimingkoa' dosammu ungngolai pengkähänganna Puang Yesus.
13Anna noa toi dioa' to dipoambe, kuuki'ingkoa' aka' ungnginsammokoa' Puang Yesus, To inang ahang di tempona dake' aha lino. Anna ingkämmu toia' änä' muane, kuuki'ingkoa' aka' untalomokoa' Pongkahana setang.
14Ya' kuuki'ingkoa' yaling inde di suha', änä'ku, aka' ungnginsammokoa' Ambeta. Anna kuoa salakingkoa', to dipoambe, aka' ungnginsammokoa' Puang Yesus, To inang ahang di tempona dake' aha lino. Noa toi ingkämmua', änä' muane, aka' matoto'mia' kapampetahpa'ammu anna umpayalimmia' di inahammu karanna Puang Alataala, untalo tumokoa' Pongkahana setang.
15Daa umpalupano inahammu di ingkänna kakarakeang yaling inde di lino. Aka' ponna umpanoa, maleso anna dai la lupano inahammu di Ambeta.
16Aka' yato sipa' karakena hupatau yaling inde di lino, sinnoanna: membabe situhu' pampemalanna, kamailuang, anna kaungngangka'-angka'ang kalae, dai sule yaho mai di Ambeta, ampo' dahi yaling di lino.
17Inde ihsinna lino sibaha ingkänna kamailuang karakena daete' la tontong lolo. Ampo' menna-menna umpembabeing pa'elo'na Puang Alataala dianto ang la tuho lolo lambi' sapano-panona.
18Oa' änä'ku, tempo dinoa la ungngoloimingkea' kapuhaanna lino. Puhamokoa' dipainsangngi dioate la sule mesa to pambahananna tau ang la umpa'bali Puang Yesus Kristus. Anna mai'ding kende' dinoa, dianto anna tainsammi taoatee dinoa la kapuhaannang lino.
19Yato ingkänna tau ang umpa'bali Puang Yesus sule yaling siang mai di alla'-alla'taa', ampo' maleso anna tadiaia' solata. Aka' ke la solata si'da-si'daia', la tontong loloingkea' sibaha-baha. Ampo' napelleiingkea' anna malai tandaang dioatee ingkänna yato tau tadia solata.
20Ampo' dioa' dio puhamokoa' dipatamai Inaha Masero ang napatuhung Puang Yesus Kristus lambi' ungnginsang asammia' pepakuhu ang tahpa'.
21Yaling inde di suha' kuuki'ingkoa', dai kuoate dake'a' ungnginsang yato kaheba katahpa'ang, ampo' setonganna ungnginsammia' yato kaheba katahpa'ang. Anna ungnginsang toia' ungngoate dai aha kaheba ang dai tahpa' la sule yaling mai.
22Darakate' tau ang dioaintee to pa'loseng-loseng dianto ang mangngoatee, "Puang Yesus tadia To Dilanti' la Mepasalama'"? Tau yatoo dianto balinna Puang Yesus Kristus, anna dia tunto ang umbahoi Ambeta sibaha Änä'na.
23Menna-menna umbahoi yato Änä', tau yatoo dai tohho yaling di Ambeta. Ampo' menna-menna tontong lolo ungngakui Änä', inang ungnginsang Ambeta.
24Dahi pahallu umpayaling loloa' di inahammu yato Kaheba Mapia ang puha unghingngia' mengkalao pampahandu'anna anna mampetahpa'koa'. Aka' ponna ke umpanoangnga', ya' la tohho lolomokoa'too yaling di Ambeta anna Änä'na.
25Aka' Kalaena Puang Yesus ma'dandi naoatee, "La kubeakoa' katuhoang lambi' sapano-panona."
26Ingkänna inde kuuki'ingkoa' didiona tau ang la mampasähsä' lalangkoa'.
27Ampo' dioa' dio puhamokoa' nabea Puang Yesus Inaha Masero. Anna yato Inaha Masero tontong lolo tohho yaling di kalaemua' lambi' dang pahallu aha tau senga' la umpakuhukoa' pepakuhu ang bakahu. Aka' napakuhu lolomokoa' Inaha Masero ingkänna ang la pahallu; anna yatoo tahpa', dai ditula' kale. Dianto anna la umpatontong lolongnga' kapampetahpa'ammu pano di Puang Yesus.
28Dahi, ingkämmua' änä'ku, la umpatontong lolokoa' kapampetahpa'ammu pano di Puang Yesus. Aka' ke umpanoai, suleito umpepaitaing Kalaena, ya' daingkea' la mahea' anna masili di hao di olona.
29Dahi aka' ungnginsammia', lambi' ungnginsang toe'a' ungngoate ingkänna tau ang membabe katahpa'ang disanga änä'-änä'na Puang Alataala.