Alkitab Mobile SABDA
[VER] : [ARALLE]     [PL]  [PB] 
 <<  Matius 17 >> 

1Tahpana unnung allona puhanna yatoo, ya' maong dai' di mesa tanete malängkä' umpasähä' Kalaena sibaha tallu pahsikolana, dianto ta Petrus, ta Yakobus anna ta Yohanes ullu'na.

2Sika lambi'na dai', ya' ungngitang Puang Yesus tirende hupanna: lindona moballo salamang mata allo, anna pakeanna mabuhsa' pangngillo' sinnoa bulang baya.

3Ya' malesong sika ungngita Musa anna Elia lella' sipa'kara Puang Yesus.

4Ma'karang ta Petrus pano di Puang Yesus, naoatee, "O Puang, masannang liu tau dinne. Ponna ke ungkärä'i umbai mahasa ke kupake'de'ingkoa' bansuli umpopantangnga' simesa: dio mesa, Nabi Musa mesa anna mesa Nabi Elia."

5Lella'ke' ma'kara Petrus, ya' tuhummi yaho mai di langi' salehu' makambang pansillo' unsapu'ii. Ya' kahingngiammi kamaha yato yaling mai di salehu' naoatee, "Dianto inde Änä'ku ang kupakamaya, ang umpamasannang inahangku. Pehingngiia' tula'na."

6Lambi' yato pahsikolana sika mellumbängngi naung di tampo tandana mahea' unghingngi yato kamaha.

7Ya' napendungku'ing Puang Yesus anna natuhpa'i naoaintee, "Ke'de'koa'. Daummahea'!"

8Tahpana sika umbua' bää'na, ya' ke dae' aha tau senga' ang sika naita supunne' Puang Yesus namesa.

9Donetoo sika tuhummi sumule yaho mai yato di tanete. Ya' ma'tula'mi Puang Yesus pano diii naoaintee, "Daa umpetula' sängkäingnga' pano di tau senga' yato aka ang puha ungngitaa' ke dakä' dipatuho sumule, Kodi' inde Änä' to Lino, di hoi' mai di kamateang."

10Mekutanang yato pahsikolana pano naoatee, "Akana naoaite to pampakuhu ada', 'Nabi Elia pahallu nei' la mendolu sule andana To Dilanti' la Mepasalama''?"

11Mentimba'mi Puang Yesus naoatee, "Inang tahpa' la sule Nabi Elia anna umpasadiai ingkänna siamo,

12anna kutula'ingkoa', setonganna haling sule yato ang sinnoa Nabi Elia, ampo' dai nainsang hupatau lambi' sika membabe pano situhu' pampemalanna. Noa tuntone' Kodi' inde Änä' to Lino la sika nadahha."

13Donetoo napähämmi pole' yato pahsikolana naoatee yato tula'na Puang Yesus didiona Nabi Elia setonganna Yohanes to Pantero'ete' ang naoaing.

14Donetoo sumuleng Puang Yesus sibaha pahsikolana ullumba yato tau mai'di. Suleng mesa tau umpellambi'i Puang Yesus anna mengkuntu' di olona naoatee,

15"O Puang, kalemuiingkä' änä'ku aka' si limpumane'ang anna madahha si'da-si'da. Si biasa manaho tama di api anna biasa toe' manaho tama di uhai.

16Puhang kubaha pano di pahsikolamu ampo' dai sika mala napabono'."

17Ya' ma'karang Puang Yesus pano di tau mai'di naoatee, "Tehtereremokoa' dio indee! Umbarea' dio naola kapampetahpa'ammua' lambi' sähsä' lalangkoa'? La sangngakake' masaena tohhoä'a' yaling di alla'-alla'mu anna sa'bara' kuoloikoa'? Bahai ne mai änä'!"

18Nakarahta' siang Puang Yesus yato setang ang umpentamai yato änä' muane, ya' tahpa malai siang yaling mai di kalaena. Donetoo bono' siang yato änä' muane.

19Suleing yato pahsikolana Puang Yesus mendungku'. Tahpana dang aha tau senga' sika manghingngi, ya' mekutanang pano naoatee, "Akana darangkang mala unghambai yato setang yaling mai di kalaena tau?"

20Mentimba'mi Puang Yesus pano diii naoatee, "Aka' dake'a' sundung kapampetahpa'ammu. Aka' kutula'ingkoa' setonganna ke la poro ahangnga' kapampetahpa'ammu sama lisa'na batu pinamula ang handang saohko', ya' malamokoa'te' umpahenta inde tanete ungngoaintee, 'Tirendeo bete' dono!' Lambi' inde tanete la tirende si'daetee'. Anna dai aha aka-aka siamo ang la dai mala tala dahi ke umpemalai."

21[Ampo' didionane' inde hupanna setang daete' mala dihambai ke dai dipasitonda ma'sambayang anna ma'puasa.]

22Di tempona Puang Yesus sibaha pahsikolana sika tohho di hao di Galilea, ya' ma'karang pano di pahsikolana naoatee, "Kodi', inde Änä' to Lino, la dibehoä' pano di kakuasaanna to lino

23anna sika la napateiä', ampo' tallu allona puhangku mate la tuhoä' sumule." Ya' masuhsa asammi inahanna ingkänna pahsikolana unghingngi yato tula'na Puang Yesus.

24Tahpana Puang Yesus sibaha pahsikolana lambi' naung di Bohto Kapernaum, ya' suleng to pansima Dasang Ada'na Puang Alataala ullumba Petrus anna mekutanai naoatee, "Nabaya'raka tuangkuhummu simanna inde Dasang Ada'?"

25Mentimba'mi Petrus naoatee, "Io, nabaya'." Donetoo sika sumuleng pano di dasang ang naongei sika tohho. Tahpana sika lambi' pano yato di dasang, dake' aha ma'kara Petrus untula' didiona sima anna tahpa mekutanang Puang Yesus pano naoatee, "Umba noa situhu' pihki'mu, Simon, menna ang pahallu nasima ingkänna setomarayaang yaling inde di lino? Petauannaraka bahtu' to suleraka ang hali nakuasai?"

26Mentimba'mi Petrus naoatee, "To sule." Ya' ma'tula' bumi Puang Yesus naoatee, "Dahi ke noai yatoo, ya' dante'ne' pahallu mambaya' yato petauanna.

27Ampo' anna dai sika tisiku nasa'ding, ya' dinoa laoo do popekang naung di le'bo'. Anna yato bau ang uhuna naala pekammu, sahkai anna umbillängngi suana, ya' la ullambi'o doi' yaling yato di suana bau ang la sihoang tabaya'ing yato simanta. Alai yato doi' anna umbaya'ingke simanta pano yato di to pansima."


  Share Facebook  |  Share Twitter

 <<  Matius 17 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran