Dual Panel1Tahpana puha mampakuhu Puang Yesus pano di pahsikolana, ya' sika mengkalaong umpellei Poropensi Galilea anna lupanoi di Poropensi Yudea tando bete'na Salu Uhai Yordan.
2Donetoo suleing mai'di liu tau mentindo' anna mai'di di alla'na ang napabono'.
3Sule tunne' sangngaka-sangngaka to Farisi unsändä'i Puang Yesus yaling di pekutananna naoatee, "Situhu' atohang ada'ta la malaraka mesa muane untibe bahinena, moi aka siamo suhunna?"
4Mentimba'mi Puang Yesus naoatee, "Dakake'a' dio aha umbata ang tiuki' yaling di Suha' Masero? Aka' tiuki' yaling naoatee naonge pampahandu'annai lino, To Metampa inang umpapia muane anna bahine
5anna ma'tula'i naoatee, 'Dianto suhunna lambi' mesa muane la umpelleii to baha'na anna sikolungngi bahinena, lambi' la mendahi mesang sibaha.'
6La noanto yatoii dang la derua, ampo' la mesang situhu' pangngitanna Puang Alataala. Dianto anna yato aka ang puhang napamesa Puang Alataala dai mala la napasisähä' hupatau."
7Ya' mekutanang yato to Farisi pano naoatee, "Ponna noa, ya' akana napepahentarinne' Musa lambi' mesa muane ang pemala untibe bahinena mala umbea suha' kasitibeang pano yato di bahinena, mane nasuoi le'ba'?"
8Mentimba'mi Puang Yesus naoatee, "Nasuhung napatiolaikoa' Musa untibe bahinemu aka' makahha' bää'koa' dai ungngaku dipaturu! Ampo' mengkalao dolu inang daete' si aha kasitibeang.
9Ampo' kutula'ingkoa' dinoa: menna-menna untibe bahinena, mane ungkabengngii bahine senga', tau yatoo dihekeng ungngindä'-indä' pa'bannetauang, sehalinna ke yatoi bahinena ungngindä'-indä' pa'bannetauang."
10Ma'tula'mi yato pahsikolana naoatee, "Ponna noae' ne kasikenteanna to sipobahine, ya' dotante' tau dai kebahine bahtu' kemuane."
11Ampo' naoa sala boute Puang Yesus pano diii, "Si mesaete' supu tau ang mala tuho dai mangki' kebahine bahtu' kemuane, dianto tau ang inang puha toboe' napama'tantu Puang Alataala.
12Aha tau ang dai mala kabeng aka' inang noa tubunne' mengkalao dahi. Aha toe' tau ang dai kabeng aka' natumäng tau senga'. Anna aha toe' tau ang dai kabeng aka' pemala napengkabela-belai umpengkähängnging Puang Alataala. Menna-menna ang mala untahimbo inde pepakuhu, ya' mahasa ke napembabeing yaling di katuhoanna."
13Donetoo suleing dibaha pano di olona Puang Yesus mai'di änä'-änä' anna malai napadai' teyyena Puang Yesus di bää'na anna napalauing behe dai' di Puang Alataala yaling di sambayang. Ampo' yato pahsikolana ungkeaha'i yato ingkänna tau ang umbaha änä'na pano.
14Ampo' ma'kara Puang Yesus naoatee, "Pabeiia' ne mating änä', daa ungkalapaii ke pemalai di hao mai di oloku, aka' tau ang noanto inde mai ang ungngala taha yaling di Kapahentaanna Puang Alataala."
15Ya' naängkä'ming teyyena napalauing behe. Puhai yatoo, ya' le'ba'mi umpellei yato ongeang sibaha pahsikolana.
16Donetoo aha mesa änä' muane ullumba Puang Yesus anna mekutanai naoatee, "O Tuang, aka ang mapia ang pahallu kubabe anna malaä' ullambi' katuhoang ang lambi' sapano-panona?"
17Mentimba'mi Puang Yesus nakutanai sala naoatee, "Akana pake ungkutanairä' Ko didiona aka ang mapia? Supunte' aha mesa To Mapia, dianto Puang Alataala. Ampo' ponna inang pemala si'dao mentama di katuhoang sapano-panona, ya' tuhu'i pahentana Puang Alataala."
18Mekutana sala bung yato änä' muane naoatee, "Pahenta ang umba kahang?" Natula'ming Puang Yesus naoaintee, "Daa umpapateang, daa ungngindä'-indä' pa'bannetauang, daa umbokoti, daa unsa'bii kalosengang,
19pakeangka'koa' to baha'mu anna kalemuio para-parammu hupatau sinnoa ungkalemuikoa' kalaemu."
20Naoa bunte yato änä' muane, "Ingkänna ne ang untula' kutuhu'i asammi. Akake' ang pahallu kutuhu'i?"
21Naoante Puang Yesus pano, "Ponna pemala si'da-si'dao sundung kapampetahpa'ammu naita Puang Alataala, ya' laoo dinoa balu' asangngi ingkänna katomakakaammu anna unsusai yato allinna pano di to pemase-mase, anna la ullambi'o katomakakaang yaho di suruka. Puhaito umbabe yatoo, ya' maimo anna untindo'ä'."
22Nahingnginna yato änä' muane umba noa tula'na Puang Yesus, ya' le'ba'mi sitonda manaho inahanna aka' mai'di liu aka-akanna.
23Ma'karang Puang Yesus pano di pahsikolana naoatee, "Kutula'ingkoa' setonganna mapahhi' si'da-si'da mesa to makaka la tama di Kapahentaanna Puang Alataala.
24Anna kutula' touingkoa', setonganna maromi' puhane' onta mangngola lohso' pedai' andana la to makaka untindo' Kapahentaanna Puang Alataala, lambi' tama di suruka."
25Nahingnginna pahsikolana yato tula'na, ya' sika pusa' asammi anna sika mekutanai naoatee, "Ponna ke noai yatoo, ya' menna sakalike'ne' ang la mala dipasalama'?"
26Natimba'mi Puang Yesus, naoatee, "Ponna kakuasaanna hupatau inang daete' aha ang la dipasalama', ampo' ponna kakuasaanna Puang Alataala malaete' nei'. Aka' ingkänna aka-aka mala asangngete'ne' nababe Puang Alataala."
27Ya' ma'tula'mi Petrus pano naoatee, "Kami' indee umpellei asangngang ingkänna aka-akangki' anna kitindo'o. Dahi akang kami' la sahoki'?"
28Ma'tula'mi Puang Yesus pano diii naoatee, "Kutula'ingkoa' setonganna ponna ke nabakahui asammi Puang Alataala ingkänna inde ang aha yaling di lino, anna ke mohko'mä' Kodi' inde Äna' to Lino yaho di ongeang kamatandeangku, ya' dioa' ang mendahing to pentindo'ku la mohko' toukoa' dio yaho di sampulo derua ohko'ang dipakeangka' anna la unghohto'koa' yato sampulo derua peänä'anna Israel.
29Anna ingkänna tau ang le'ba' umpellei dasanna, ullu'na, to baha'na, änä'na, bahtu' tampona aka' natindo'ä', la ullambi'ete' pebehena Puang Alataala ang ma'luhpi'-luhpi', anna la ullambi' katuhoang sapano-panona.
30Ampo' mai'di tau ang dipakeangka' dinoa, la dipadihoi'ang ke dako'mi; noa toi, mai'di tau ang dipadihoi'ang dinoa, la dipakeangka' ke dako'mi."