Alkitab Mobile SABDA
[VER] : [ARALLE]     [PL]  [PB] 
 <<  Wahyu 21 >> 

1Tahpana yatoo ungngitamä' langi' bakahu anna lino bakahu, aka' langi' anna lino ang uhuna pa'dang nei', noa tunne' le'bo'.

2Kuitang Bohto Mahoa' Yerusalem Bakahu ang masero tuhung yaho mai di suruka mengkalao di Puang Alataala. Yato bohto puhang dipasadia sinnoa mesa bahine ang la kabeng dipapunnoi belo-belo untammui muanena.

3Mane unghingngiä' kamaha käyyäng yaho mai di ohko'ang tomaraya naoatee, "Dinoa Puang Alataala la tohho sibaha-baha hupatau; ongeanna dianto yaling di tängngä-tängngänaii anna la sika sibaha lolong! Sika la mendahi petauanna anna Puang Alataala toboe' la mendahi Dehatanna.

4Puang Alataala la umpahsii uhai mata ang aha di matannaii. Kamateang dang la aha sala. Kamasuhsaang, mangngumbui bahtu' kamapi'di'ang datunne' la aha, aka' kaha-kaha ang dolu puha tubunne' pa'da."

5Pihsananna ma'karang Puang Alataala ang mohko' yaho di ohko'ang tomaraya naoatee, "La kubabe ingkänna siamo mendahi bakahu! Dahi uki'i, aka' tula' indee tahpa' liu anna mala dipetahpa'."

6Mane naoa boitee, "Ingkänna dahi asammi! Kodi'mito indee Ang Handang Uhuna anna Ang Handang Katämpä'; Kodi'mito Dehata mengkalao di pampahtunganna lambi' kapuhaanna. Diamo tau ang mahähäng, la kubea tomande' uhai yaling mai di kasuleang uhai mepatuho sapano-panona.

7Tau ang patalo dianto ang la mantahimbo ingkänna indee di hao mai di Kodi'. Kodi' la mendahi Dehatanna anna sika mendahine' änä'ku.

8Ampo' ingkänna tau ang pa'mahea'ang, dai mampetahpa' si'da-si'da, ma'pihki' tahuhu, to papateang, tau ang ungngindä'-indä' pa'bannetauang, to pa'ihsang-ihsang, to umpenombai dehata lino anna ingkänna to pa'loseng-loseng, la dipentibe asangnging tama di api handang maluhsu' ang malua' noa le'bo', dianto kamateang kapendoanna."

9Pihsananna suleng mesa di alla'na yato pitu malaeka' ang untokei dolu enu'ang bulahang ang napunnoi pitu kamadahhaang katampä'anna. Sule naoaingkä'tee, "Maio done indee! La kupaitaio ang la napobahine Änä' Domba."

10Ya' nakuasai siamä' Inaha Masero, anna nabahaä' yato malaeka' dai' di hohong tanete ang handang malängkä'. Mane napaitaiä' Bohto Mahoa' Yerusalem, bohto masero ang sule yaho mai di suruka mengkalao di Puang Alataala.

11Bohto yatoo napunnoi kamatandeanna Puang Alataala. Pansillo' sinnoa batu pangngillo' ang mamata hupanna, melälähäng sinnoa ti'dona kene'.

12Tembo'na sitongko malängkä' lipu', anna sampulo derua babana sibaha pantang nadakai sampulo derua malaeka'. Di hao yato di baba pantang aha diuki' sanga-sanganna sampulo derua bohtona änä'na Israel.

13Tando di katimbingang allo aha tallu baba, noa tunne' tando di katempu'ang allo. Tando di utara aha tallu baba, noa tunne' tando di selatang.

14Yato tembo' dipaohko' di hahona sampulo derua batu käyyäng ang pantang dipangnguki'i sanganna mesa rasulna Änä' Domba.

15Yato malaeka' ang lella' kusipa'karaing untokei huntung pepansi ang bulahang dipapia, anna ummete'i yato bohto mahoa', babana anna tembo'na.

16Bohto mahoa' yatoo mosulapa, kalambe'na anna malua'na sinsamaang. Namete'ing yato malaeka' umpake yato huntung bulahang, ya' donsa'bu uhpa'atu' kilomete' kalambe'na, sama toi malua'na anna malängkä'na.

17Tahpana ummete'i yato tembo' malaeka' ya' unnumpulo lima mete' makambanna. Ang napake malaeka' mammete'i sinnoa siang ang napake hupatau.

18Tembo'na yato bohto mahoa' dipapia di hao mai di batu pangngillo' ang mamata hupanna anna ingkänna ang aha yaling dipapiane' di hao mai di bulahang ang dai aha mampenghaui, sinnoa dahammeng.

19Yato sampulo derua batu käyyäng ang dipampake'de'i hala tembo', batu masu'li' asang. Ang uhuna, mesa batu pangngillo' ang mamata hupanna. Kaderuanna, mesa batu melälähäng ang mamata hupanna noa le'bo'. Katallunna, mesa batu ang moalla' hupanna: mabusa anna mahihi. Kauhpa'na, mesa batu melälähäng ang mamata hupanna noa lala' upe.

20Kalimanna, mesa batu ang moalla' hupanna: mabusa anna maloteng. Kaunnunna, mesa batu pangngillo' ang malahtu hupanna. Kapitunna, mesa batu melälähäng ang mahihi hupanna noa uhai kuni'. Kakahuanna, mesa batu ang mamata hupanna noa bulu sehke'. Kakamehsanna, mesa batu melälähäng ang mahihi hupanna noa punti mahe. Kasampulona, mesa batu pangngillo' ang mamata-mata hupanna noa lala' punti mahäti'. Kasampulomesanna, mesa batu pangngillo' ang noa langi' hupanna ke kulla'i. Kasampuloderuanna, mesa batu melälähäng ang hupanna sinnoa hupanna tahauhe ang handang tanda naung.

21Yato babana ang sampulo derua, mesa boitoo pantang dipapia di hao mai di kalubibing käyyäng ang pangngillo' mabusa noa sihsi' bau. Yato lalang yaling di bohto, bulahang dipapia ang dai aha mampenghaui, pansillo' mala dipodahammeng.

22Daine' aha kuita Dasang Ada'na Puang Alataala yaling yato di bohto mahoa', aka' di umba-umba naongei yaling yatoo aha lolo dipenombai Puang Alataala To Handang Ma'kuasa sibaha yato Änä' Domba.

23Yato bohto mahoa' dai pahallu naballoi mata allo bahtu' bulang, aka' kamatandeanna Puang Alataala anna Änä' Domba mendahi ballo.

24Ingkänna bohto di lino la naballoi anna setomarayaang la sika umbaha katomakakaanna tama yato di bohto mahoa' la napake umpamatande Puang Alataala sibaha Änä' Domba.

25Samai baba ang diola tama la tibuhke lolo; dai pahallu ditutu'i di bengi aka' dang la aha kamalillingang.

26Kakäyyänganna anna katomakakaanna ingkänna bohto la dibaha asang tama.

27Ampo' daine' aha la dibaha tama moi poro mesa ang mehiri'-hiri', bahtu' tau ang mehiri'-hiri' pembabena bahtu' loseng. Supung ang la mala tama dianto tau ang aha tiuki' sanganna yaling di suha'na Änä' Domba ang dipantekengngi to tuho lambi' sapano-panona.


  Share Facebook  |  Share Twitter

 <<  Wahyu 21 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran