Dual Panel1Sahya ini Paulus sndiri minta sama kamu oleh Almaseh punya lmah-lmbot dan klakuan yang manis, ia'itu sahya ini yang rndah-hati kalau sama-sama kamu, ttapi ada brani sama kamu kalau ada jauh:
2sahya minta ini, ia'itu bila sahya ada sama-sama kamu, jangan pula sahya tunjokkan sahya punya brani dngan hati yang ttap, s-bagimana sahya ada fikir mau jadi brani sama brapa orang yang ada bilangkan kita jadi orang yang ikut tabi'at dunia.
3Kerna sunggoh pun kita ada hidop dalam dunia, kita bukan-nya berprang dngan turut tabi'at dunia.
4(kerna kita punya perkakas prang bukan-nya deri-pada dunia punya, ttapi ada berkuasa di dpan Allah boleh rubohkan kota-kota);
5kita rubohkan sgala bichara manusia, dan sgala perkara yang tinggi-tinggi yang orang angkatkan mau mlawan pngtahuan Allah, serta kita tundokkan tiap-tiap fikiran kasi turut prentah Almaseh;
6dan kita bersdia mau jatohkan hukuman atas sgala derhaka manusia, bila kamu punya turut-prentah sudah chukop.
7Kamu ada tengok perkara-perkara yang di dpan muka kamu. Jikalau ada orang harap yang diri-nya jadi Almaseh punya, biar-lah dia itu timbang ini pula dalam diri-nya, yang s-bagimana dia jadi Almaseh punya, bgitu juga kita pun.
8Kerna jikalau sahya mgahkan diri sahya sdikit lbeh fasal kita punya kuasa (yang Tuhan sudah kasi spaya boleh tgohkan kamu, bukan-nya spaya boleh rubohkan kamu), t'ada juga sahya nanti kna malu:
9jangan pula sahya ternampak sperti sahya mau kasi kamu takot dngan sahya punya surat-surat.
10Kerna dia-orang bilang, "Dia itu punya surat smoa brat dan kuat juga; ttapi badan-nya punya rupa lmah saja, dan perchakapan-nya ta'terbilang."
11Itu macham punya orang, biar dia timbang ini, ia'itu s-bagimana ada kita punya chakap dalam surat waktu kita jauh, bgitu juga nanti jadi kita punya perbuatan waktu kita bersama-sama.
12Kerna kita ini t'ada brani mau bilangkan atau bandingkan diri kita dngan itu orang-orang yang pujikan diri-nya sndiri: ttapi dalam hal dia-orang ukorkan diri satu sama lain, dan bandingkan diri satu sama lain, dia-orang kurang pngertian.
13Ttapi kita ini ta'mau mgahkan diri dngan t'ada ukoran, ttapi turut sperti ukoran pegangan yang Allah sudah ukorkan mnjadi kita punya bhagian, ia'itu spaya sampai k-pada kamu pun.
14Kerna kita bukan-nya mluaskan diri kita terlalu banyak, spertikan kita blum lagi sampai k-pada kamu: kerna dalam hal kita khabarkan injil Almaseh, kita sudah datang sampai k-pada kamu smoa:
15dan kita t'ada mgahkan diri kita dngan t'ada ukoran, ia'itu di dalam lain orang punya pnat; ttapi kita ada harap, sdang kamu punya perchaya bertambah-tambah, kita pun nanti di-bsarkan di antara kamu terlbeh lagi s-kdar kita punya pegangan,
16ia'itu spaya boleh khabarkan injil di tmpat yang di sblah sana kamu pun, bukan-nya mau mgahkan diri kita dalam lain orang punya pegangan deri-hal perkara yang sdia sudah di-buat.
17Ttapi orang yang mgahkan diri, biar-lah dia mgahkan diri deri-hal Tuhan.
18Kerna bukan-nya orang yang pujikan diri-nya sndiri yang nanti di-bilangkan bnar, ttapi dia yang Tuhan pujikan.