Alkitab Mobile SABDA
[VER] : [BABA]     [PL]  [PB] 
 <<  Filipi 1 >> 

1Deri-pada Paulus dan Timotius, hamba-hamba Almaseh, datang k-pada sgala orang kudus dalam Isa Almaseh di negri Filipi, serta dngan smoa bishop dan diakon:

2biar-lah datang k-pada kamu anugrah dan sjahtra deri-pada Bapa kita Allah dan Tuhan kita Isa Almaseh.

3Sahya mnguchap shukor k-pada sahya punya Allah deri sbab smoa sahya punya peringatan fasal kamu,

4dan slalu sahya minta do'a kerna kamu dngan suka-hati dalam tiap-tiap sahya punya perminta'an,

5sbab kamu punya persahabatan dalam khabar injil deri-pada hari yang mula-mula sampai skarang;

6kerna sama sahya sudah tntu-lah ini satu perkara, ia'itu dia yang sudah mulaikan satu pkerja'an yang baik di dalam kamu, nanti habiskan itu sampai hari Isa Almaseh:

7sperti patut juga sahya ini fikir bgini deri-hal kamu smoa, sbab sahya ada taroh kamu smoa di dalam hati sahya, sdang kamu smoa ada bhagian anugrah sama-sama sahya pun, baik dalam hal sahya kna pasong ini, baik dalam hal sahya chakap mau bantu dan tgohkan injil.

8Kerna Allah juga yang mnjadi sahya punya saksi, bagimana sahya ada rindukan kamu smoa dalam Isa Almaseh punya kaseh-sayang.

9Dan ini pun sahya punya perminta'an ia'itu spaya kamu punya kaseh boleh bertambah-tambah dngan pngtahuan dan s-gnap pngertian;

10sampai kamu berknan sama perkara yang baik skali; spaya kamu jadi tulus-hati dan t'ada bersalah sampai hari Almaseh itu;

11sambil kamu di-pnohkan dngan buah-buahan yang di-kluarkan oleh kbnaran dngan berkat Isa Almaseh, mau bawa kmulia'an dan puji k-pada Allah.

12Skarang sahya mau kasi kamu tahu, hei sudara-sudara, yang smoa perkara yang sudah datang atas sahya, balek, sudah datang mau jalankan injil;

13sampaikan sgala hal sahya kna pasong sudah mnjadi nyata dalam Almaseh di antara smoa soldado di istana, dan di antara sklian lain orang pun;

14dan kbanyakan sudara-sudara kita dalam Tuhan mnjadi lbeh harap sbab sahya sudah kna pasong, dan bertambah-tambah brani chakapkan perkata'an Allah dngan t'ada takot.

15Btul juga ada sparoh orang yang khabarkan Almaseh deri sbab dngki dan perklahian: dan sparoh orang pula deri hati yang baik:

16ada yang buat sbab kaseh, sbab dia-orang tahu yang sahya ini sudah di-tntukan mau chakap mmbantu injil:

17ttapi yang lain itu mashhurkan Almaseh deri sbab perlawanan, bukan-nya dngan tulus-hati, ttapi chuma dia-orang fikir mau bangunkan satu ksusahan dalam hal sahya kna pasong.

18Jadi apa macham? chuma dngan s-barang daya-upaya, baik dngan pura-pura, baik dngan kbtulan, Almaseh ada di-mashhurkan juga; dan dalam itu perkara sahya suka-hati, dan sahya nanti juga bersuka-hati.

19Kerna sahya tahu yang itu perkara nanti bawa slamat sama sahya, deri sbab kamu punya perminta'an, dan deri sbab klngkapan Roh Isa Almaseh,

20sperti sahya ada nantikan dngan rindu dan ada harap, ia'itu jangan sahya kna malu dalam satu apa pun, ttapi dngan s-habis-habis brani, sperti slalu, bgitu juga skarang pun, Almaseh boleh di-bsarkan di dalam diri sahya, baik hidop baik mati.

21Kerna sama sahya, hidop ia'itu Almaseh, dan mati ia'itu untong.

22Ttapi fasal sahya punya badan ada lagi hidop, jikalau oleh itu sahya punya kerja kluarkan buah, t'ada-lah sahya tahu 'ntah yang mana sahya msti pileh.

23Ttapi antara itu dua hal sahya punya hati ada bimbang, sdang sahya punya suka mau pergi dan ada sama-sama Almaseh; kerna itu banyak skali lbeh baik:

24ttapi deri sbab kamu, lbeh berguna sahya tinggal dalam badan.

25Dan sbab hati sahya sudah tntu fasal ini perkara, sahya tahu yang sahya nanti tinggal, dan tinggal sama-sama kamu smoa, spaya kamu boleh maju dan bersuka-suka dalam perchaya;

26spaya kamu punya kmgahan boleh bertambah-tambah dalam Isa Almaseh deri-hal sahya, sbab sahya ada di antara kamu lagi skali.

27Chuma biar-lah kamu bawa tengkah-laku yang padan dngan injil Almaseh: spaya, baik sahya datang tengok sama kamu, baik sahya jauh, sahya boleh dngar fasal kamu punya hal, ia'itu yang kamu ada berdiri ttap di dalam satu roh, dan dngan satu hati ada bersama-sama mlawan kerna injil punya iman;

28dngan t'ada kna terkjut oleh kamu punya musoh-musoh dalam satu perkara pun: dan ini mnjadi sama itu orang smoa satu tanda binasa, ttapi sama kamu satu tanda slamat, ia'itu deri-pada Allah;

29kerna k-pada kamu sudah di-bri deri sbab Almaseh, bukan-nya saja boleh perchaya sama dia, ttapi boleh kna susah pun kerna dia:

30sdang kamu pun ada dalam pprangan itu juga yang dhulu kamu tengok dalam sahya punya hal, dan yang skarang kamu dngar pula ada sama sahya.


  Share Facebook  |  Share Twitter

 <<  Filipi 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel