Dual Panel1Sbab itu, sdang ada lagi tinggal satu perjanjian deri-hal masok perhentian-nya, baik kita takot spaya jangan pula satu orang pun antara kamu nampak-nya sperti sudah kurang sampai.
2Kerna khabar yang baik sudah di-khabarkan k-pada kita, sama sperti k-pada dia-orang pun: ttapi perkata'an yang dia-orang dngar t'ada berguna sama dia-orang, deri sbab dia-orang t'ada sama-sama perchaya sperti orang yang sudah dngar.
3Kerna kita ini yang sudah perchaya ada juga masok itu perhentian; s-bagimana dia sudah kata, "Sperti sahya sudah bersumpah dalam sahya punya marah, T'ada-lah dia-orang nanti masok sahya punya perhentian;" sunggoh pun dia punya pkerja'an sudah slsai deri waktu kjadian dunia.
4Kerna deri-hal hari yang nombor tujoh itu dia ada kata dalam satu tmpat bgini, "Dan Allah brenti hari yang nombor tujoh deri-pada smoa pkerja'an-nya,"
5dan dalam ini tmpat pula, "T'ada-lah dia-orang nanti masok sahya punya perhentian."
6Jadi sdang ada lagi tinggal brapa orang yang nanti masok itu perhentian, dan orang-orang yang k-pada-nya khabar yang baik sudah mula-mula di-khabarkan t'ada dapat masok deri sbab derhaka,
7jadi lagi s-kali dia tntukan satu hari, dan kata dalam kitab Da'ud ada brapa lama kmdian, "Ini hari juga," sperti yang sudah di-sbot dhulu, "Ini hari juga kalau kamu mau dngar suara-nya, Jangan kraskan kamu punya hati."
8Kerna kalau Yush'a sudah kasi dia-orang perhentian, Allah t'ada nanti sbot fasal lain hari pula kmdian deri-pada itu.
9Kalau bgitu, ada lagi tinggal satu perhentian hari sabat kerna orang bangsa Allah.
10Kerna orang yang sudah masok dia punya perhentian, dia sndiri sudah brenti deri-pada dia punya pkerja'an, sperti Allah pun sudah brenti deri dia punya.
11Sbab itu baik kita usahakan diri masok itu perhentian, spaya jangan satu orang pun jatoh sperti itu chontoh derhaka.
12Kerna perkata'an Allah itu ada hidop dan berkuasa, dan lbeh tajam deri-pada pdang yang mata dua, dan makan dalam sampai blahkan jiwa sama roh, baik sndi baik otak tulang, dan boleh bedakan smoa ingatan dan niat hati.
13Dan t'ada satu kjadian pun yang t'ada nyata di dpan dia: ttapi smoa perkara ada tlanjang dan terbuka dpan mata dia yang k-pada-nya kita msti kasi kira-kira.
14Jadi sdang kita ada satu kpala-imam yang bsar, yang sudah naik trus langit, ia'itu Isa Anak Allah itu, baik kita pegang kita punya pngakuan kuat-kuat.
15Kerna bukan-nya kita ada satu kpala-imam yang ta'boleh sama-sama mrasa kita punya klmahan smoa; ttapi satu kpala-imam yang sudah di-choba dalam sgala perkara sama sperti kita pun, dngan t'ada berdosa.
16Sbab itu baik kita rapat takhta anugrah-nya dngan brani, spaya kita boleh trima ksian, dan dapat anugrah mnjadi pertolongan dalam tempo yang baik.