Alkitab Mobile SABDA
[VER] : [BABA]     [PL]  [PB] 
 <<  Kisah Para Rasul 27 >> 

1Bila sudah di-tntukan yang kita msti blayer pergi Itali, dia-orang srahkan Paulus dan brapa lain orang jel k-pada satu hulubalang yang bernama Yulius, ia'itu hulubalang dalam pasokan Kaisar.

2Kita naik s-buah kapal deri Adramute, yang mau mnyusur tpi darat tanah Asiah, dan kita blayer: Aristarkus orang Makadoniah deri Tisalonika pun ada sama-sama.

3Dan besok-nya, kita singgah di Sidon: dan Yulius tunjokkan ksian sama Paulus, dan kasi dia izin pergi sama sohbat-sohbat dan snangkan diri-nya.

4Bila blayer deri situ, kita mnyusur tpi Kuprus sblah bawah-angin, sbab angin deri dpan.

5Dan bila kita sudah mnybrang laut tntang Kilikiah dan Pamfuliah, kita sampai di Murah dalam tanah Lukiah.

6Di sana itu hulubalang jumpa s-buah kapal yang datang deri Iskandariah mau blayer pergi Itali: jadi dia tumpangkan kita dalam-nya.

7Dan bila kita sudah blayer plan-plan brapa hari punya lama, dan dngan susah sudah sampai tntang Knidus, kerna angin tahankan kita, jadi kita blayer sampai sblah bawah-angin pulau Kriti, tntang Salmone:

8dan dngan susah kita mnyusur tpi-tpi itu pulau, kmdian bharu sampai satu tmpat yang bernama Labohan Baik; dkat-dkat situ ada negri Lasaya.

9Lpas brapa hari punya lama, bila playeran sudah jadi berbahya, kerna hari-puasa sudah lalu, Paulus ingatkan dia-orang dan kata,

10"Hei tuan-tuan, sahya tengok yang playeran kita ini nanti bawa chlaka dan banyak rugi, bukan saja k-pada muatan dan kapal, ttapi atas kita punya nyawa pun."

11Ttapi itu hulubalang lbeh pdulikan kapitan-kapal sama tuan-kapal deri-pada Paulus punya chakap.

12Dan sbab itu labohan t'ada snang mau tinggal sama musim sjok, kbanyakan orang kasi nasihat baik blayer deri sana, spaya bagimana pun kita boleh sampai di Foinik, dan tinggal sana musim sjok, ia'itu satu labohan di pulau Kriti, mnghadap timor-laut dan tnggara.

13Dan bila angin slatan tiop plan-plan saja, dia-orang fikir sudah-lah jadi sperti maksud-nya, dan dia-orang bongkar sauh, serta mnyusur pulau Kriti.

14Ttapi t'ada brapa lama kmdian, sudah turun deri itu pulau satu angin-ribot yang bernama Yurakulun:

15dan bila itu kapal kna pukol, dan ta'boleh lawan angin, kita diamkan saja dan terhanyut-hanyut.

16Dan kita blayer di bawah s-buah pulau kchil yang bernama Kauda, dan dngan susah kita angkat itu kapal punya sampan:

17dan bila sudah naik, dia-orang pakai tali bsar barutkan itu kapal; dan sbab dia-orang takot nanti terkandas di atas bting Surtis itu, dia-orang turunkan sgala alat kapal, dan dalam itu macham punya hal dia-orang terhanyut.

18Dan sbab kita terlambong banyak-banyak, besok-nya dia-orang mula'i buangkan muatan kapal di laut;

19dan lusa-nya dngan tangan dia-orang sndiri dia-orang buangkan perkakas kapal.

20Dan bila sudah brapa hari punya lama matahari atau bintang pun ta'nampak, dan angin-ribot bukan sikit tmpoh sama kita, putus-lah s-lagi harap yang kita boleh slamat.

21Dan bila sudah lama dia-orang t'ada makan, bharu Paulus berdiri di tngah-tngah orang-orang itu, dan kata, "Hei tuan-tuan, patut dhulu tuan dngar sahya punya kata jangan blayer deri Kriti, sampaikan sudah kna ini punya chlaka dan rugi.

22Skarang sahya ingatkan tuan-tuan ttapkan hati masing-masing, kerna t'ada satu orang pun antara kamu nanti hilang nyawa, chuma kapal saja.

23Kerna s-malam satu mla'ikat deri-pada Allah yang ampunya sahya ini dan yang sahya smbah, ada berdiri sblah sahya,

24dan kata, 'Hei Paulus, jangan takot; angkau tntu nanti dapat berdiri dpan Kaisar: lagi pun smoa orang yang blayer sama angkau Allah sudah kasikan sama angkau.'

25Sbab itu, hei tuan-tuan, ttapkan kamu punya hati: kerna sahya perchaya sama Allah, ia'itu nanti jadi sama sperti apa yang sudah di-katakan k-pada sahya.

26Ttapi kita msti terkandas di atas s-buah pulau."

27Ttapi bila sudah sampai ampat-blas hari punya malam, ktika kita lagi terhanyut-hanyut sana-sini dalam laut Adriah, mau tngah malam bgitu, klasi-klasi sangka sudah dkat s-buah tanah.

28Dan dia-orang buang duga, dan dapat dua-puloh dpa: dan lagi s-kjap dia-orang duga lagi skali, dan dapat lima-blas dpa.

29Dan sbab takot kita barangkali nanti kna terkandas di atas batu karang, dia-orang buang ampat sauh deri blakang kapal, dan ingin mau siang.

30Dan bila klasi-klasi choba mau lari tinggalkan itu kapal, dan sudah turunkan sampan di laut, buat-buat mau hulorkan sauh deri haluan,

31Paulus kata sama itu hulubalang dan soldado-soldado, "Jikalau ini orang t'ada tinggal di kapal, kamu smoa ta'boleh slamat."

32Habis itu, soldado kratkan itu sampan punya tali, dan kasi hanyut.

33S-blum siang hari, Paulus minta dia-orang smoa makan, dan kata, "Ini hari sudah ampat-blas hari punya lama kamu nanti-nantikan dngan lapar, satu pun t'ada makan.

34Sbab itu sahya minta kamu makan-lah sikit: kerna itu-lah patut spaya kamu slamat: kerna satu lai punya rambot pun t'ada nanti hilang deri kpala s-barang orang deri antara kamu."

35Dan bila dia sudah kata bgini, dia ambil roti dan mnguchap shukor k-pada Allah dpan smoa orang: dan dia pchahkan roti itu, dan mula'i makan.

36Smoa orang punya hati ttap, dan bharu dia-orang pun makan.

37Kita smoa yang di kapal ada dua-ratus tujoh-puloh-anam orang.

38Bila sudah makan knnyang, dia-orang ringankan itu kapal dngan buangkan trigu di laut.

39Bila sudah siang, dia-orang t'ada knal daratan itu: ttapi dia-orang tengok satu tlok dngan pantai rata, dan dia-orang bichara mau kandaskan kapal di situ, kalau boleh.

40Dan dia-orang lpaskan smoa sauh-sauh tinggal di laut, dan luchutkan tali kmudi, dan bukakan layer-tringkit-suai spaya makan angin, kmdian blayer tuju itu pantai.

41Ttapi kapal jatoh k-pada satu tmpat di mana dua harus bertmu, dan dia-orang kandaskan itu kapal; dan haluan kapal terkna, serta tinggal terdiam, ta'boleh bergrak lagi, ttapi blakang-nya jadi terpchah-pchah sbab glombang punya kuat pukol.

42Dan soldado-soldado punya nasihat mau bunohkan sgala orang jel, spaya jangan satu orang pun terlpas dngan bernang.

43Ttapi sbab itu hulubalang mau slamatkan Paulus, dia tahankan dia-orang jangan buat dia-orang punya maksud: dan dia suroh smoa orang yang tahu bernang terjun spaya sampai darat dhulu,

44dan yang lain, ada yang pegang papan-papan, ada yang pegang lain-lain barang deri kapal punya. Jadi bgini, smoa orang naik darat dngan slamat.


  Share Facebook  |  Share Twitter

 <<  Kisah Para Rasul 27 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel