Alkitab Mobile SABDA
[VER] : [BABA]     [PL]  [PB] 
 <<  Lukas 18 >> 

1Dan Isa katakan satu perumpama'an sama dia-orang, mau trangkan bagimana orang patut slalu minta do'a dngan t'ada tawar hati.

2Dia kata, "Dalam satu negri ada satu hakim, yang t'ada takot sama Allah dan t'ada pdulikan manusia:

3dan dalam itu negri juga ada satu prempuan bujang; yang banyak kali datang k-pada dia, dan kata, Patutkan-lah sahya punya hal sama orang yang ada d'awa sama sahya.'

4Dan ada brapa lama itu hakim ta'mau juga: ttapi kmdian pula dia kata dalam diri-nya, 'Mski-pun sahya ta'takot sama Allah, dan ta'pduli sama manusia,

5ttapi sbab ini prempuan bujang kasi sahya susah, sahya mau patutkan dia punya hal, spaya dia jangan slalu datang kasi sahya pnat.'"

6Tuhan kata, "Dngar perkata'an hakim yang ta'bnar itu.

7Dan bukan-kah Allah nanti patutkan hal orang-orang pilehan-nya, yang siang malam ada bertriak sama dia, mski-pun dia ada panjang-hati fasal dia-orang?

8Sahya kata sama kamu, dia nanti patutkan dia-orang punya hal dngan chpat. Dalam pada itu, bila Anak-manusia datang, boleh-kah dia dapat perchaya di atas bumi ini?"

9Dan Isa katakan ini perumpama'an pula k-pada orang yang mngaku diri-nya bnar dan tengok lain orang ta'mata:

10"Ada dua orang naik masok ka'abah mau minta do'a; yang satu orang Farisi, dan yang lain itu orang pungut chukai.

11Orang Farisi itu berdiri minta do'a sama diri-nya bgini: 'Ya Allah, sahya trima-kaseh sama Tuhan sbab sahya bukan sperti orang lain, orang mrampas, orang ta'adil, orang yang buat zina, atau sperti orang pungut-chukai ini.

12Satu minggo dua kali sahya puasa; dan deri-pada apa-apa sahya dapat, sahya ada kasi dalam s-puloh satu.'

13Ttapi itu orang pungut-chukai pula berdiri jauh-jauh, dan ta'mau angkat mata-nya skali-pun mnghadap langit, ttapi dia tpok-tpok dada-nya, dan kata, 'Ya Allah, ksiankan-lah sama sahya, orang berdosa ini.'

14Sahya kata sama kamu, ini satu orang pulang rumah dngan di-bnarkan, bukan itu lain orang: kerna tiap-tiap orang yang tinggikan diri-nya nanti di-rndahkan; ttapi orang yang rndahkan diri-nya nanti di-tinggikan."

15Dan ada orang bawa sama dia dia-orang punya anak-anak kchil, spaya dia boleh jamah dia-orang: ttapi bila murid-murid tengok, dia-orang tgurkan orang-orang itu.

16Ttapi Isa panggil itu budak-budak, dan kata, "Biarkan itu budak-budak datang k-pada sahya, jangan larangkan: kerna bgitu-lah kraja'an Allah punya orang.

17Dngan sunggoh sahya kata sama kamu, barang-siapa t'ada trima kraja'an Allah sperti satu budak kchil, t'ada-lah skali-kali nanti dia masok dalam-nya."

18Ada satu orang pnghulu tanya, dan kata sama dia, "Hei guru yang baik, apa-kah sahya msti buat spaya dapat hidop yang kkal?"

19Dan Isa kata sama dia, "Knapa angkau triak sahya 'baik'? T'ada satu orang pun baik, chuma satu saja, ia'itu Allah.

20Angkau tahu itu hukum-hukum, Jangan buat zina, Jangan bunoh orang, Jangan churi, Jangan jadi saksi bohong, Hormatkan angkau punya mak-bapa."

21Dan dia itu kata, "Smoa ini sahya sudah turut deri sahya kchil."

22Bila Isa dngar ini, dia kata sama itu orang, "Satu perkara angkau ada kurang lagi: jualkan smoa yang angkau ada, dan bhagikan k-pada orang miskin, dan angkau nanti dapat herta-bnda di shorga: kmdian mari ikut sahya."

23Ttapi bila itu orang dngar ini smoa, dia mnjadi banyak susah-hati skali, sbab dia ada banyak kaya.

24Bila Isa tengok, dia kata, "Brapa susah orang yang ada wang masok kraja'an Allah.

25Kerna lbeh snang satu onta tmbus lobang jarom deri-pada orang kaya masok kraja'an Allah."

26Dan orang-orang yang dngar kata, "Kalau bgitu siapa pula boleh dapat slamat?"

27Isa kata, "Perkara yang ta'boleh sama manusia, boleh sama Allah."

28Dan Petrus kata, "Tengok, kita sudah tinggalkan sndiri punya perkara, dan ikut sama Tuhan."

29Dan Isa kata sama dia-orang, "Dngan sunggoh sahya kata sama kamu, t'ada satu orang pun yang sudah tinggalkan rumah-tangga, atau bini, atau sudara-sudara, atau mak-bapa, atau anak-anak-nya, kerna kraja'an Allah punya sbab,

30yang t'ada nanti trima banyak kali ganda dalam ini waktu, dan dalam jman yang datang dia nanti trima hidop yang kkal."

31Dan dia ambil sama dia itu dua-blas orang, dan dia kata sama dia-orang, "Ingat, kita ini ada berjalan naik Yerusalim, dan smoa perkara yang sudah tertulis oleh nabi-nabi nanti jadi sama Anak-manusia.

32Kerna dia nanti di-srahkan k-pada orang bangsa-asing, dan nanti kna olok-olok, dan kna malu, dan kna ludahkan:

33dan orang nanti ssah, dan bunoh sama dia: dan hari yang ktiga dia nanti berbangkit."

34Dan smoa ini perkara dia-orang t'ada mngerti satu pun; dan ini perchakapan sudah tersmbunyi deri-pada dia-orang, jadi dia-orang ta'tahu apa-apa yang sudah di-katakan.

35Dan sudah jadi bila dia sampai dkat Yeriko, ada satu orang buta dudok di tpi jalan minta sdkah:

36dan bila dia dngar orang banyak lalu, dia tanya apa arti itu.

37Dan orang bilangkan dia yang Isa orang Nasarat ada lalu.

38Dan dia bertriak-triak kata, "Ya Isa, ya anak Da'ud, ksiankan-lah sama sahya."

39Dan orang yang jalan dpan tgurkan sama dia, suroh diam: ttapi balek dia bertriak-triak lbeh kuat, "Ya anak Da'ud, ksiankan-lah sama sahya."

40Isa brenti dan suroh orang bawa itu orang k-pada dia: dan bila dia sudah datang dkat, Isa tanya dia,

41"Apa-kah angkau mau sahya buat sama angkau?" Dan dia kata, "Ya Tuhan, biar-lah mata sahya chlek."

42Dan Isa kata sama dia, "Chlek-lah mata angkau: angkau punya perchaya sudah pun kali angkau baik."

43Dan itu juga dia boleh tengok, dan ikut sama Isa, dngan muliakan Allah: dan smoa orang bangsa itu, bila dia-orang tengok ini, kasi puji k-pada Allah.


  Share Facebook  |  Share Twitter

 <<  Lukas 18 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel