Dual Panel1Itu ktika murid-murid datang k-pada Isa, dan kata, "Siapa-kah yang bsar skali dalam kraja'an shorga?"
2Isa panggil satu budak kchil, dan bila dia sudah dirikan dia tngah-tngah, dia kata,
3"Dngan sunggoh sahya kata sama kamu, jikalau kamu t'ada berbalek dan mnjadi sperti budak-budak kchil, skali-kali t'ada kamu nanti masok dalam kraja'an shorga.
4Sbab itu barang-siapa yang rndahkan diri-nya sperti ini budak kchil, dia-lah juga yang bsar skali dalam kraja'an shorga.
5Dan barang-siapa yang sambot satu budak kchil sperti dia ini kerna sahya punya nama, dia sambot sahya:
6ttapi barang-siapa yang kasi terantok sama satu pun deri-pada ini budak-budak kchil yang perchaya sama sahya, lagi baik kerna itu orang jikalau satu batu kisaran di-gantongkan kliling lehir-nya, dan dia di-tngglamkan di tngah-tngah laut.
7Susah-lah sama ini dunia sbab apa-apa yang kasi orang terantok, kerna ta'boleh tidak itu perkara yang kasi orang terantok msti datang; ttapi susah-lah sama itu orang yang oleh-nya itu terantok jadi.
8Dan jikalau angkau punya tangan atau angkau punya kaki kasi angkau terantok, kratkan, dan buangkan deri-pada angkau: lbeh baik angkau masok dalam hidop dngan kudong atau tempang, deri-pada kna buang dalam api yang kkal dngan dua-dua tangan atau dua-dua kaki.
9Dan jikalau angkau punya mata kasi angkau terantok, korek kluar, dan buangkan deri-pada angkau: lbeh baik angkau masok dalam hidop dngan sblah mata, deri-pada kna buang dalam jhannam api dngan dua-dua mata.
10Ingat baik-baik jangan kamu hinakan satu orang pun deri-pada ini anak kchil-kchil; kerna sahya kata sama kamu, yang di dalam shorga dia-orang punya mla'ikat slalu ada tengok muka Bapa sahya yang di shorga.
11[KOSONG]
12Bagimana kamu punya fikir? jikalau siapa-siapa ada s-ratus ekor punya kambing, dan satu ekor sudah ssat, bukan-kah dia nanti tinggalkan yang smbilan-puloh-smbilan itu, dan pergi gunong-gunong chari yang ssat punya?
13Dan jikalau dia dapat, dngan sunggoh sahya kata sama kamu, dia nanti jadi suka-suka hati sbab kambing ssat itu lbeh deri-pada sbab smbilan-puloh-smbilan kambing yang t'ada ssat punya.
14Bgitu juga bukan-nya kamu punya Bapa yang di shorga punya kahandak yang satu pun deri-pada anak kchil-kchil ini kna binasa.
15"Dan jikalau angkau punya sudara buat salah sama angkau, pergi tgurkan dia s'orang-s'orang: kalau dia dngar, sudah-lah angkau ambil hati sudara angkau.
16Ttapi jikalau dia t'ada dngar, bawa sama angkau lagi satu dua orang, spaya dngan mulut dua tiga orang saksi tiap-tiap perkata'an boleh di-ttapkan.
17Dan jikalau dia-orang pun dia ta'mau dngar, bilangkan itu hal sama eklisia pula: dan kalau eklisia skali pun dia ta'mau dngar, biar-lah dia mnjadi k-pada kamu sperti orang bangsa-asing dan orang yang pungut chukai.
18Dngan sunggoh sahya kata sama kamu, apa-apa yang kamu ikat di atas bumi nanti terikat di dalam shorga: dan apa-apa yang kamu lpaskan di atas bumi nanti terlpas di shorga.
19Lagi pun sahya kata sama kamu, jikalau dua orang deri-pada kamu berstuju di atas bumi deri-hal satu perkara yang dia-orang nanti minta, itu nanti di-jadikan kerna dia-orang oleh Bapa sahya yang di shorga.
20Kerna di mana ada dua tiga orang berhimpon dngan sahya punya nama, di situ-lah sahya ada di tngah-tngah-nya."
21Itu ktika Petrus datang kata sama dia, "Ya Tuhan, brapa kali boleh sudara sahya buat salah sama sahya, dan sahya patut mahapkan sama dia? sampai tujoh kali-kah?"
22Isa kata sama dia, "Bukan-nya sahya kata sama angkau, sampai tujoh kali; ttapi, sampai tujoh-puloh kali tujoh.
23Sbab itu kraja'an shorga ada di-samakan dngan satu raja yang mau hitong kira-kira sama dia punya hamba-hamba.
24Dan bila dia sudah mula'i hitong, orang bawa sama dia satu orang yang ada hutang sama dia s-laksa talanta.
25Ttapi sbab dia t'ada apa-apa boleh bayer, tuan-nya suroh jualkan dia sama-sama dia punya anak-bini dan apa-apa yang dia ada, dan bayer itu.
26Jadi, itu hamba jatoh berlutut di kaki-nya, dan kata, 'Tuan, sabarkan-lah sama sahya dhulu, dan sahya nanti bayer smoa skali.'
27Dan itu hamba punya tuan ksiankan dia, jadi dia lpaskan dia, dan mahapkan dia itu hutang.
28Ttapi itu hamba pula kluar, dan berjumpa lain satu hamba, yang ada hutang sama dia s-ratus dinar. Dan dia tangkap sama kawan-nya, dan chkekkan dia punya lehir, serta kata, 'Bayer angkau punya hutang.'
29Jadi kawan-nya jatoh di kaki-nya, dan minta sama dia, kata, 'Sabarakan-lah sama sahya dhulu, dan sahya nanti bayer.'
30Ttapi dia itu ta'mau: balek, dia pergi masokkan kawan-nya itu dalam jel, sampai dia boleh bayer dia punya hutang.
31Sbab ini, bila lain-lain hamba tengok apa yang sudah jadi, dia-orang jadi terlalu susah-hati, dan dia-orang pergi bilangkan tuan-nya smoa yang sudah jadi.
32Kmdian dia punya tuan panggil itu hamba, dan kata sama dia, 'Hei hamba yang jahat, sahya sudah mahapkan angkau itu hutang smoa, sbab angkau sudah minta sama sahya:
33bukan-kah patut angkau pun ksiankan sama angkau punya kawan, sperti sahya sudah ksiankan sama angkau?'
34Dan dia punya tuan naik marah, dan srahkan dia sama orang yang seksakan orang, sampai dia boleh bayer smoa itu hutang.
35Bgitu juga nanti sahya punya Bapa yang di shorga buat sama kamu, jikalau kamu masing-masing t'ada mahapkan kamu punya sudara dngan s-bulat hati."