Alkitab Mobile SABDA
[VER] : [BABA]     [PL]  [PB] 
 <<  Matius 17 >> 

1Lpas anam hari, Isa ambil Petrus, dan Yakob, sama Yahya, sudara Yakob, dan bawa dia-orang sndiri sahaja naik satu gunong yang tinggi:

2dan dia punya rupa berubah di dpan dia-orang: dan muka-nya berchahya-chahya sperti matahari, dan pakaian-nya pun mnjadi puteh sperti siang-hari.

3Dan ada ternampak k-pada dia-orang Musa dan Ilia berchakap sama Isa.

4Petrus jawab, kata sama Isa, "Ya Tuhan, baik juga kita ada di sini: kalau Tuhan suka, sahya nanti bikin tiga pondok di sini; satu sbab Tuhan, satu sbab Musa, dan satu sbab Ilia."

5Sambil Petrus ada berchakap, ada satu awan yang berchahya tutopkan dia-orang: dan ada satu suara deri dalam awan, yang kata, "Ini-lah Anak saya, yang sahya kaseh, dia-lah berknan sama sahya; dngar-lah sama dia."

6Bila murid-murid dngar itu, dia-orang jatoh tertiarap, dan jadi takot skali.

7Ttapi Isa datang dkat, dan jamah sama dia-orang, dan kata, "Bangun, jangan-lah takot."

8Dan bila dia-orang sudah angkat mata, dia-orang t'ada nampak satu orang pun, chuma Isa saja.

9Dan sambil dia-orang turun deri atas gunong, Isa psan sama dia-orang, dan kata, "Jangan kamu katakan ini pnglihatan sama satu orang pun, s-blum Anak-manusia bangkit deri antara orang mati."

10Murid-murid-nya tanya dia, "Kalau bgitu, knapa-kah orang pnulis kata yang Ilia msti datang dhulu?"

11Dan Isa jawab, kata, "Ilia btul-lah nanti datang, dan pulangkan s-mula sgala perkara:

12ttapi sahya kata sama kamu, yang Ilia sudah pun datang, dan orang t'ada knal sama dia, ttapi sudah buat sama dia apa-apa dia-orang suka. Bgitu juga Anak-manusia nanti kna aniaya deri-pada dia-orang."

13Bharu murid-murid mngerti yang fasal Yahya Pmbaptis-lah dia sudah chakap sama dia-orang.

14Bila dia-orang sudah sampai dkat orang-banyak, satu orang datang sama dia, berlutut dpan dia, dan kata,

15"Ya Tuhan, ksiankan-lah sama sahya punya anak: kerna dia gila-babi, dan kna banyak sngsara, kerna krap kali dia jatoh dalam api, dan krap kali dalam ayer.

16Dan sahya sudah bawa dia sama Tuhan punya murid-murid, ttapi dia-orang ta'boleh smbohkan dia."

17Dan Isa jawab kata, "Hei orang jman yang kurang perchaya dan yang ssat, brapa lama-kah lagi sahya boleh bersama-sama kamu? brapa lama-kah lagi sahya boleh sabarkan kamu? bawa dia sama sahya di sini."

18Dan Isa tngkingkan dia; dan itu jin kluar deri dalam dia: dan itu budak jadi baik deri itu jam juga.

19Habis itu, murid-murid datang k-pada Isa sndiri saja, dan kata, "Knapa kita ta'boleh buangkan itu jin?"

20Dan Isa kata sama dia-orang, "Deri sbab kamu punya kurang perchaya; kerna dngan sunggoh sahya kata sama kamu, jikalau kamu ada perchaya sperti s-biji ssawi saja, kamu boleh kata sama ini gunong, 'Pindah deri sini pergi di sana,' dan tntu-lah gunong ini nanti pindah; dan t'ada satu apa pun yang kamu ta'boleh buat."

21[KOSONG]

22Dan ktika dia-orang lagi tinggal di tanah Galil, Isa kata sama dia-orang, "Anak-manusia nanti di-srahkan k-pada tangan orang;

23dan orang nanti bunoh dia, dan hari yang ktiga dia nanti di-bangkitkan s-mula." Dan dia-orang mnjadi terlalu sangat susah-hati.

24Bila dia-orang sampai Kafarnahum, orang yang pungut itu dua derham datang sama Petrus, dan kata, "T'ada-kah kamu punya guru mau bayer itu dua derham?"

25Petrus kata, "Mau." Dan bila dia sudah masok dalam rumah, Isa chakap sama dia lbeh dhulu, "Hei Simon, bagimana angkau punya fikir? raja-raja di dunia ini trima hasil atau chukai deri-pada siapa? deri-pada anak-anak-nya-kah, atau deri-pada orang lain-kah?"

26Petrus jawab, "Deri-pada orang lain." Kmdian Isa kata sama dia, "Kalau bgitu anak-anak-nya bebas-lah.

27Ttapi spaya kita jangan kasi dia-orang terantok, pergi-lah angkau di tasek panching ikan, dan ambil ikan yang mula-mula naik; dan bila angkau sudah buka mulut-nya, angkau nanti dapat s-kping wang ampat derham: ambil itu, dan kasi sama dia-orang kerna sahya sama angkau."


  Share Facebook  |  Share Twitter

 <<  Matius 17 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel