Dual Panel1Dane Ayub malih mabaos sapuniki: “Tiang masumpah masrana antuk parab Ida Sang Hyang Widi Wasa, Sane Maha Kuasa sane nyeneng, sane nenten mapaica kadilan ring tiang miwah sane ngawinang tiang nandang duhkita.
2(27:1)
3Sakantun tiang kicen mangkihan antuk Ida Sang Hyang Widi Wasa,
4bungut tiange nenten pacang naenin maosang paindikan sane dursila, tur layah tiange nenten pacang naenin maosang sane bobab.
5Tiang nenten pacang naenin maosang mungguing semeton puniki patut. Tiang jaga makukuhin paindikan tiange sane patut kantos tiang padem.
6Tiang nenten jaga wusan nuntut, mungguing tiang puniki madewek patut. Kletegan manah tiange sampun galang pisan.
7Dumadak sakancan anake sane ngamesehin miwah nglawan tiang, jaga kasisipang sakadi jadmane sane dursila sane nenten patut.
8Napike sane jaga kajap-ajap antuk jadmane sane tan pawidi rikalaning rauh dauhnya Ida Sang Hyang Widi Wasa ngarsayang uripipune?
9Rikalaning ipun katempuh antuk kamewehan, punapike Ida Sang Hyang Widi Wasa kayun mirengang pinunasipune?
10Ipun patut dot ring kaliangan sane paicayang Ida. Ipun patut tan rered-rered ngastawa ring Ida.
11Tiang pacang ngurukang semeton indik amunapi ageng kawisesan Ida Sang Hyang Widi Wasa miwah amunapi sane sampun karencanayang antuk Ida Sang Hyang Widi Wasa Sane Maha Kuasa.
12Nanging sujatinipun semeton ngraga sampun pada ngaksi paindikan punika, napi awinannya semeton maosang paindikane sane tan papuara punika?”
13Pasaur Dane Sopar “Kadi asapunika Ida Sang Hyang Widi Wasa nyisipang jadmane sane dursila tur angkara murka.
14Ipun kengin akeh madue pianak, nanging makasami pianakipune punika jaga padem ring payudan. Pianak-pianakipune tansah jaga kakirangan pangan kinum.
15Sane kantun urip jaga padem keni pinakit tur baluanipune nenten jaga mangelingin pademipune punika.
16Jadmane dursila kengin maderbe perak tan keni wilangin akehipun miwah maderbe pangangge kantos maliah-liah.
17Nanging makudang-kudang jadma sane susila jaga nyaluk panganggen ipune punika tur makudang-kudang jadma sane jujur pacang muponin perak ipune punika.
18Jadmane dursila ngwangun umah sakadi umah kekawane, wiadin sakadi kubun parekane sane mondokin abian.
19Pamuputipun, ipun jaga pules tur sugih, nanging rikalaning ipun bangun, dapetang ipun arta brananipune sampun ical.
20Karesresan jaga nempuh ipun sane rauhnya sakadi blabar sane tan pararapan. Angine rikala wengi jaga ngampehang ipun.
21Angine sane rauh saking kangin jaga nyampatang ipun saking umahipune.
22Rikala ipun ngibehang dewekipune mangda ipun luput, angine punika jaga tan jangkaan nempuh ipun.
23Rikala ipun malaib, angine punika makuug nempuh ipun, nengkejutang ipun antuk kakuatan sane tan sida antuk mapas.”