Dual Panel1Inggih semeton Ayub, nenten patut semeton maosang mungguing semeton tan paiwang ring ayun Ida Sang Hyang Widi Wasa.
2(35:1)
3Wiadin matur pitaken ring Ida Sang Hyang Widi Wasa kadi asapuniki: ‘Sapunapike antuka dosan titiange ngrubeda Palungguh IRatu? Punapike pikolih titiange malantaran titiang nenten ngardi dosa.’
4Tiang jaga ngaturin semeton pasaur, kadi asapunika taler parasawitran semetone.
5Indayangja aksi akasane! Amunapike tegeh ambune punika?
6Yening semeton madosa, indike punika nentenja ngawinang Ida Sang Hyang Widi Wasa pocol. Yening semeton mawali-wali ngardi iwang punapike indike punika ngrubeda Ida?
7Malantaran semeton malaksana sane patut, punapike indike punika mrasidayang ngaturang pitulungan ring Ida Sang Hyang Widi Wasa? Ida Sang Hyang Widi Wasa nenten merluang punapa-punapi saking semeton.
8Wantah parasawitran semetone pada manusa sane nandang sangsara malantaran dosan semetone. Semeton makardi ayu, ipun sane polih pitulungan.
9Yening anake katindes, ipun raris jerit-jerit, ipun nyeritin anak lian mangda rauh nulungin ipun.
10Nanging ipun nenten tangkil ring Ida Sang Hyang Widi Wasa, sane ngardi ipun, sane ledang mapaica pangajap-ajap ring ipun, rikalaning ipun katempuh antuk masa sane pinih peteng dedet.
11Ipun nenten tangkil ring Ida Sang Hyang Widi Wasa, sane ngawinang iraga wicaksanaan ring saananing sato wiadin paksine.
12Ipun jerit-jerit nunas tulung, nanging Ida Sang Hyang Widi Wasa nenten nyaurin pinunasipune santukan ipun kalintang sumbung tur jaat.
13Nenten wenten pikenoh pabuat ipun jerit-jerit. Ida Sang Hyang Widi Wasa Sane Maha Kuasa nenten ledang ngaksi wiadin mirengang aturipune.
14Semeton Ayub, semeton maosang mungguing semeton tan mrasidayang manggihin Ida Sang Hyang Widi Wasa. Nanging jantosangja saha sabar, wicaran semetone wenten ring ayun Idane.
15Semeton mitaenang mungguing Ida Sang Hyang Widi Wasa nenten nyisipang miwah Ida nenten pati lingu ring dosa.
16Nenten wenten pikenohipun pabuat semeton, yen semeton ngraris mabaos kadi asapunika. Santukan sampun sinah, mungguing semeton nenten uning ring paindikan sane baosang semeton.