Dual PanelIda S
1Anake punika raris ngajak tiang ka kurine sane marep kangin.
2Irika tiang manggihin wenten galang dumilah teja wedanan Widin Israele rauh saking kangin. Suaran Ida Sang Hyang Widi Wasa makerug sakadi kuugan segarane, tur pretiwine masinar malantaran galang dumilahe punika.
3Wahyu puniki pateh sakadi sane pecak panggihin tiang, duk Ida Sang Hyang Widi Wasa nguugang kota Yerusaleme miwah sakadi sane panggihin tiang ring sisin Tukad Kebare. Irika tiang raris bah makakeb ring tanahe.
4Galang dumilahe punika raris mamargi nglintang ring kurine sane bedangin ngraris ngranjing ka Perhyangan Agung.
5Roh Ida Sang Hyang Widi Wasa tumuli mangunang tiang, raris ngajak tiang ngranjing ka natare sane ring jeroan. Irika panggihin tiang, mungguing Perhyangan Agunge sampun kalikub antuk kaluihan Ida Sang Hyang Widi Wasa.
6Anake punika ngadeg ring samping tiange, tur tiang miragi Ida Sang Hyang Widi Wasa masabda ring tiang saking Perhyangan Agunge, sapuniki:
7“Ih manusa, ene suba singasanan Ulune. Ulun mapakayun malinggih dini di pantaran bangsa Israele tur mrentah ia salawas-lawasne, apanga eda buin bangsa Israele wiadin pararatunnyane nganistayang parab Ulune ane suci, malantaran ia pada nyungsung widi ane lenan, wiadin malantaran ia nanem bangken pararatunnyane di tongose ene.
8Pararatune ento nyujukang jejeneng muah adegan jelanan beneng pesan mapapas nglawan jejeneng muah adegan jelanan Perhyangan Ulune, kanti tuah tembok dogen ane melat Ulun nglawan ia. Ia pada nganistayang parab Ulune ane suci aji sakancan laksanannyane ane cemer. Ento awanane Ulun nyirnayang ia sajeroning pidukan Ulune.
9Ane jani ia patut suud nyungsung widi-widi ane lenan muah ngaadang bangken pararatunnyane. Yen ia nyalanang unduke ento, Ulun lakar malinggih di pantarannyane salawas-lawasne.”
10Ida Sang Hyang Widi Wasa malih nglanturang pangandika sapuniki: “Ih manusa, orahang teken wong Israele unduk Perhyangane, tur tunden ia mlajahin rencanan Perhyangane ento. Gaenang ia kimud uli krana tingkahnyane ane madosa.
11Sasubane keto, yen ia suba kimud malantaran unduk ane suba laksanayanga, terangang rencanan Perhyangane ento teken ia, luire: gambarne, kuri muah pamedalne, wangunnyane, susunan sakancan paundukan muah sakancan pidabdab lan gilirannyane. Tulisang sakancan paundukane ento apang ia nawang, mungguing sakancan paundukane ento suba kaatur muah apanga ia nyidayang nyalanang sakancan pidabdabe.
12Kene pidabdab Perhyangan Agunge ento: Sakuub wewidangan ane ngiter Perhyangane di duur gununge ento suci tur pingit.”
Indik
13Sapuniki sikut pamorboran aturane punika. Sikut sane kagunayang pateh sakadi sikut Perhyangan Agunge. Dasar pamorborane punika kiter antuk jlinjing sane dalemipun seket sentimeter miwah linggahipun taler seket sentimeter. Sisin jlinjinge punika kilehin antuk paundukan sane tegehipun slae sentimeter.
14Pangked pamorboran aturan sane pinih sor, saking dasar rauh ring pangkednyane mategeh ameter. Pangked sane baduuran makeledan malih seket sentimeter saking bibih pangked sane ring soran, tur tegehnyane wenten kalih meter. Pangked sane duuran ring punika taler makeledan seket sentimeter saking bibih pangked sane ring soran.
15Pangked sane siduur puniki taler kalih meter tegehipun, tur irika genah aturane kaborbor. Bucu-bucun pamorborane punika makapatpat sada tegehan ring bagian pamorborane sane siduur punika.
16Pangked pamorborane sane siduur punika rupanipun mrepat, sabilang samping panjangipun nem meter.
17Pangked sane sitengah taler mrepat, sabilang samping panjangipun pitung meter. Ring tanggun pangkede punika kabedbed antuk sabuk, tegehipun wenten slae sentimeter. (Jlinjingnyane wenten seket sentimeter linggahipun.) Undag sane munggah ka pamorborane punika magenah ring sisi kanginnyane.
Indik
18Ida Sang Hyang Widi Wasa Sane Maha Luur ngandika ring tiang sapuniki: “Ih manusa, padingehangja sabdan Ulun teken kita. Yen pamorboran aturane ento suba pragat, kita patut mlaspas pamorboran aturane ento, malantaran morbor aturan di pamorborane ento muah ngetisin pamorboran aturane ento aji getih wewalungan ane katurang ento.
19Tuah parapandita suku Lewi ane uli katurunan Sadoke dogen ane wenang umedek di ayun Ulune buat ngayahin Ulun. Ulun Sang Hyang Widi Wasa Sang Maha Luur nitahang unduke ene. Kita patut maang ia godel sampi aukud buat anggona aturan panyupat dosa.
20Kita patut nyemak getihne abedik, laut olesang di muncuk bucu-bucun pamorboran aturane ane pangked siduur muah di bucu-bucun pamorboran aturane ane pangked sitengah muah di tanggu-tanggunne makaileh. Majalaran unduke ento kita lakar nyuciang tur mlaspas pamorboran aturane ento.
21Kita patut nyemak sampine ane anggona aturan panyupat dosane ento, laut tunjel sig tongos ane suba kapastiang di jabaan pakarangan Perhyangane.
22Buin maninne kita patut ngaturang kambing muani ane tan paceda, buat aturan panyupat dosa. Suciangja pamorboran aturane ento aji getihne, patuh buka ane jalanang kita dugas nganggon getih sampine.
23Yen suba pragat nyalanang unduke ento, kemaja ngalih godel sampi aukud muah panak biri-biri aukud, ane tan paceda,
24laut aturang di ayun Ulune. Parapanditane lakar nyambehin godel sampi muah panak biri-birine aji uyah, laut borbora buat dadi aturan di ayun Ulun.
25Pitung dina makelonne sabilang lemah kita patut ngaturang kambing aukud, sampi aukud muah panak biri-biri muani aukud, makadadi aturan panyupat dosa. Wewalungane ento makejang patut tan paceda.
26Pitung dina makelonne parapanditane patut nyuciang pamorborane ento, apanga pamorborane ento prasida kagunayang buat ngaturang aturan.
27Yen suba liwat pitung dina, parapanditane patut ngawitin ngaturang aturan sig pamorboran aturane ento, luire aturan maborbor muah aturan buat karahayuan rakyate. Ditu Ulun lakar asung lugraha teken kita ajak makejang. Ulun Sang Hyang Widi Wasa Sang Maha Luur ane suba masabda ene.”