Dual Panel1Angtane bosna Lasarus jei ga bwernabara. Jei tamna Betanya ga jep ge nwinbene jelem ayanawanabar Maria yo Marta.
2Maria aaiserem jeiba wisam minyak ninsini waakena Yesusem tufap aa jei sutobaabuntowenantam, ane jelem nabal safam ga wirtabaibetenant. Jemna osona Lasarus, jei bwerna ga aa folbana.
3Lasarusem ayan nauna jeiserem jei angtanes ge baftana taterisi jei gwirinfeleiserem Yesusminibe, "Tuhan, Lasarus Ijes nesiktenerem jei bwernabara."
4Yesus taterisi jeiserem jame aa galap sarbilirim, Jei ga aa gutena, "Jei bwerna aaiserem safam domolt, jei se gwena. Aaiserem mes etamwena, jega angtane baabeta Uwa Sanbagirmana ga sene domola. Ane tere aaiserem jei ga baabeta Tane Uwa Sanbagirmanaiserem jes mese ga jes destabili."
5Yesus Jei Marta, Maria, ane Lasarus Jei jam nesiktababili.
6Jengga Yesus Jei taterisi enggam jame aa galap sarbilirim Lasarus jei bwernabara, Jei ga jeber nwini jamer nunu naura.
7Jeiserem taban, Yesus ga aa gutena ai angtane Jei ajeya tikwebaatinennerem, "Au nei gamjon nejama warauwa ona Yudeyaminibe."
8Ai ga aya tamawolbana, "Guru, nunu uskambaryan gwananaiserem angtane Yahudimana jei safe Is tonem ne munbof. Ke bunar, Aamei namwer ga enggam Im gunu Aamei gamjon Ijewer warauf?"
9Yesus enggam ga balbabili, "Nunu daamfenna jemna gwer nafa dua belas jam, ke bunar? Angtane gwerem aa jei gam wofenaram jei jam dargasoyan, aam temawer jei ogir nafaiserem jeter gam gerebana.
10Jengga angtane gwinem aa jei gam wofenaram jei gam dargasona, aam temawer jemnibe nafa fas."
11Yesus game aa gutenaram, Jei gamjon ga aa gutena, "Nem afelna Lasarus jei mes tana, jengga Ai As gwina, ane jei ga As irtestetna."
12Ai angtane Yesus ajeya tikwebaatinennerem ai ga aya gutena enggame, "Tuhan, afa Lasarus jei jam talaye, jei se waakenswena."
13Yesus Jei aas seisyawulu enggame Lasarus jei mes tere, jengga ai angtane Jei ajeya tikwebaatinennerem ai alem inibe enggam aya gunu Lasarus ba nusam tana.
14Jega jem temawer Yesus Jei gamjon Jam seisyawulmiyen, jengga enggam ga balbabili, "Lasarus jei mesam terent.
15Jengga ini Aman mesna Ase saaser-saaserem folbana Ai jebe fas, aam temawer jeiserem ibe waakenfer ga ise falmini jega aamei mese gam isa taabili. Au nei ganma sofwe Lasarusminibe."
16Tomas aa jes ne jenbewenaram "Nawer Bateneme", jei ga jelem afelen mesna ai Yesus ajeya tikwebaatinennerem ga as balbabili, "Au, nei mese ganma tikwebaati, nei Jebaner saf nesa tere!"
17Yesus Jei tamna jeiserem jep safe gemer fornaram, Lasarus jei tonmwa bitisibe mes ne waakentaasinint nunu ga nawer-naura.
18Tamna Betanya je kota Yerusalemwer bijauyan, jemna bijua kilometer nawer-ningna.
19Jes jepserem angtane Yahudimana unggwanfer ga aa ge forobitye enggalfe, Marta yo Maria gam ne domsof. Jei enggalf ge forobitye Marta yo Maria ini jemna gam ne kanausomif, aam temawer osona jemna mes tere.
20Marta jei jame aa galap sararam enggame Yesus mes gwetmansweyal, jei ga aa totintye enggalfe Yesusfar gam ge dorwef, jengga Maria jei jenaber nwini.
21Marta jei Yesus ga aa bala, "Tuhan, afa Aamei aafer baiserem jes galapserem, gam jega bunar osona amna jei jam teryen.
22Safe gam ai tousa enggame, namwer aas jepserem Uwa Sanbagiri Jei se eyebili Aamei Jep Ijes bilibenerem."
23Yesus Jei Marta enggam bili, "Osona imna jeiserem jei gamjon sefersontyo."
24Marta ga aa tamawolbana, "Ai enggam ai towaswena Lasarus jei gamjon sefersontyo, angtane jam tereserem jam sene irtebisirim nunu umwef jepserem jeme."
25Yesus Jei Marta enggam ga bili, "Aiba Jesam angtane fwater tereserem As irtebaabisi terewer, ane Ai waakenfer gwelaiserem jamer abak-abaksus As golmisi jebe. Angtane Ams tebalaiserem, jei safe gam tere, jei gamjon gam irwa.
26Ane angtane gemer gwelaiserem, ane Ai As jei ne tebanaram, jei abak-abaksusfer jam teryen. Aamke taterisi aaiserem ke is taabili?"
27Jei ga enggam tamawola, "Ngga Tuhan, ai as taabili Aameiba Mesiasam, Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif. Aameiba Tane Uwa Sanbagirmana ogiri aaiserem jep aa jei fortyaram."
28Marta jei jame aa galap tabanwenaram jes gamserem gam jam nasowelabe, jei osona jemna Maria ga aa gubili, ane jei ga aa nastubunuwili enggame, "Guru Jei aafe mes foryal, ane Jei ims tenaabisini."
29Maria jei game aa galap sararam, jei tatarsusfer nunuwer ga aa irwa, ane jei Yesusminip ga aa gwina enggalfe jei Jebar gam ge dorwef.
30Jes galapserem Yesus ane ai angtane Jei ajeya tikwebaatinennerem ai gemerje tamna jeiserem ajama kauteyan. Ai jeber aya fina tampata Martafar ajebara dorwenaram.
31Angtane Yahudimana ini Mariamana aa jei ne kanautaabilirim jenabe, jei Maria ga aane domola jei nunuwer tatar-tatarsusfer aa galap irwenaram, ane jam aa galap totintyerem. Ane jei Maria ga aane onsobili, aam temawer jei jelem inibe enggam ge gubili, Mariaba tonmwa bitisiweram gwina enggalfe jep gam syefe.
32Maria jei tampata ai Yesusfar ajeba finaram jep aa galap fornaram, ane jei Yesus ga damtana, jepga Maria jei ga Yesusem tof tarnabe ga aa jena, ane ga aa bala, "Tuhan, afa Aamei aafer baiserem jes galapserem, gam jega bunar osona amna jei jam teryen."
33Yesus Maria jame aa galap domolaram jam syelabe, ane angtane Yahudimana Mariafar seyafter aa jei ge jalbilirim jei mese jegme aa ge syebili, ini Jemna ga jenbana ane Jei Jelem inibe uskambarsusfer enola.
34Jepga Yesus ga angtane jeiserem ga aa tenebaabili, "Aamei jem futunu ifofa gerna?" Jei ga aane tamawolbana, "Au Tuhan, gase damta!"
35Jepga Yesus ga aa syena.
36Ane angtane Yahudimana jei ga jepga aa ge gubili, "Gasa angga, Yesus Jei Lasarus uskambarsus nesiktene!"
37Jengga angtane afweraiserem enggam ge gubili, "Jei angtane nwe kofaiserem gam waakentana jamere gam anggasini. Gam jega bafa Jei Lasarus Jam waakentayan, jei nalefe jam teryeneye?"
38Yesus Jei gamjon Jelem inibe uskambarsusfer enola, ane ai ga aya forna bitisibe. Bitisi jeiserem jei ga tonmwa bitis, ane tuna unggwan-giriserem ga jem ne motolsini.
39Yesus enggam ga aa gutena, "Tuna unggwan-giri jeiserem imsa irfitaaniwi!" Marta jei angtane aa jei tererem jem ayana, jei ga aa tamawolbana, "Tuhan, jei nunu nawer-naura tonmwa bitisibe, ane jei mes asnabarswena."
40Yesus Jei ga Marta ga aa bili, "Aike is Ajam towasulyon enggame, afa aamei taterisi Amnaiserem jam is taabilirim, aamei ga baabeta unggwandusa Uwa Sanbagirmana ga is domolbana?"
41Ane jepga tuna unggwan-giri jeiserem ga aane irfitaanwili. Jepga Yesus winsiwer ga aa anggaswena, ane ga aa gutena, "Uwa, Ase samfer gulbana, aam temawer Aamei As Imes sarbana.
42Ai Amsam towaswena enggame Aamei jeber-jeber As Igam sarbana, jengga Ai enggam Ai gunu jega angtane aaf aaiserem jei taterisi aaiserem ga sene sarbili, ane jega taterisi aaiserem ga sene taabili enggame Aiba As Aamei Am baftannunt."
43Yesus Jei game aa galap gutenaram, Jei ol dagam ga aa gutena, "Lasarus gase totinye!"
44Ane jepga angtane fwater tere jeiserem jei ga aa totintye. Jemna tafa mese ane tof jei fen sinsineme aa gemer ne tafresinirim jebaner je, ane jemna mirmase mese jei fenbitem aa gemer ne mataibaasinirim gemerje. Yesus angtane jeiserem enggam ga balbabili, "Fene sinsini jemna jeiserem jasa fertebaibaasi, jega jei waakenfer gase wofena."
45Angtane Yahudimana anesus aa jei ge forobityerem Marias domolfe, jei Yesus ga aane tebana, aam temawer jei bwembwema Yesus aa jes eyebilirim aa jewer ne domolaram.
46Jengga angtane afwer jep aaiserem, jei ga aa ge gubili angtane Farisiminibe, ane jei ga aane nasipmini bwembwema Yesus aa jes eyebilirim jem temawer.
47Jega jem temawer, angtane safna Farisimana ane angtane imam-imam sanbakaiserem, jei seyafter Safna Angtane Yahudimana Sanbak-sanbaka seyafter gemerserem jebar ga aa ge betwebili enggalfe taterisi daamfennaber jewer gam ne nasbif. Jei jen jena ga aane taanaaminenne, "Nei ga nebasa eyebifi? Angtane aaiserem Jei bwembwema anesusfer eyebaabuwena.
48Afa nei Angtane aaiserem nei jamfener nesa gerebanaram bwembwema se eyebilirim, gam jega angtane seyafter Jei sene tebana. Ane gam jega angtane sanbaka Romamana ga sege forobitye, ane Jena Uwa Sanbagirmana ga sene wirulbaasini, ane anggwabura nemna seyafter gemerserem ga sene munbobili."
49Jepga angtane jemniwer aaiserem jemna bosna Kayafas, jei imam sanbagirsususerem tahunu jeiserem, jei ga aa gutena, "Aamei seyafter teisyenfenna!
50Aamke ijama towasweyan enggame waakenfer ga aas, angtane afa daamfennam se tere, jega anggwabura seyafter gemerserem jam barweyan."
51Kayafas jei taterisi game aa jewer biltenaram, jeiserem gam ke jelemanfener nasowena. Jengga jeiba imam sanbagirsususerem tahunu jeiserem jeme, ane jei taterisi Uwa Sanbagirmana bunarsusfer aa jei se etamwenaram ga jes nasbili enggame, Yesus Jei se tere anggwabura Yahudimana seyafter gemerserem jem temawer.
52Ane gam ke anggwabura Yahudimanaiserem jetefener. Fas, jengga Jei tantantane Uwa Sanbagirmana ogiri aaiserem jep aa jei ge syensyanwebilirim, gam dupdupbulsif safna daamfennaber.
53Nunu jeiserem jeme angtane sanbaka anggwabura Yahudimana ula ga aane dagalsini enggame Yesus jewer gam ne munbof.
54Jega jem temawer Yesus Jei anggwabura Yahudimana jem nenennap Jam wofeyan. Ai ona Yudeya ga aya mirsotefala, ane ai ga tamna bosna Efraim jewer ga aya sofwa dwisgir gwetmanabe. Ai jep ga aya nwini Yesusfar.
55Jes galapserem ga Masara Paska anggwabura Yahudimana ga mes gwetmanswemini, angtane anesus jei tamnawer aa jei ge jalbiwenaram, jei kota Yerusalemwer mes ge sofwebili. Jei jewer ga enggalf ge sofwebili, jega jei ini jemna gam ne wirtabaabif Uwa Sanbagirem danggonabe, nunu Paskana jeiserem je nalefe jam falyan.
56Jei Yesus ga aane terelbene, ane Jena Uwa Sanbagirmanaiserem jebe aa galap betwenaram, jei ga jen jena ga aane taanaaminenne, "Aamei ilem inibe ifomfoma gunu? Jei ke masar aaiserem jep gase fortya, afa fas?"
57Jei game aa jewer ge gubilirim, jei ga aam temawer ge gubili angtane imam-imam sanbakaiserem ane angtane safna Farisiman mesna jei ula mes ne dagalsini, ane angtane ga aane balbabili enggame, "Angtane afa tamna Yesus aa jep nwinirim jei aa jei towasweminirim, jei ga as jei se towastababili jega ai Jei ga asa temila."