Alkitab Mobile SABDA
[VER] : [BERIK]     [PL]  [PB] 
 <<  Yohanes 4 >> 

1Angtane safna Farisimana jei enggam ge sarbili, angtane Yesus aa jei ne tikwebaatinenewenaram ane Yesus aa jes baptistababilirim, angtane jeiserem jeba unggwanferam. Ane angtane Yohanes aa jei ne tikwebaatinennerem jei unggwanferyan.

2Yesus angtane Jener jam baptistababiyen, jengga angtane Yesus aa jei ne tikwebaatinennerem ga jei ne baptistababili.

3Jepga Yesus Jei jame aa galap towaswenaram enggame angtane safna Farisimana ula jeiserem mes ne sarbili, Jei ga ona Yudeya ga firsotafala, ane Jei ga aa warauwa ona Galileyaminiwer.

4Jemna wofera jeiserem, Jei ona Samaryastamer gam ayenni.

5Yesus Jei tamna bosna Sikar ona Samaryaminibe ga jep fortya. Tamna jeiserem jei bijauyan ona Yakub fwater aa jes gerbalam tane jelemanaiserem Yusufe.

6Jepga fo mwona Yakubmana ga jep fala. Tufa Yesusmana ga aane werenswebana, Jemna wofera bijua, ga jem temawer Jei ga aa nwintena fo mwa tarnabe. Jes jepserem gwere ga bolap fyal.

7Ai angtane Yesus Jei ajeya tikwebaatinennerem ai kotanap ga aya sofwa enggalfe ai tumilgala jep agma armantababif. Ane abakefyan Samarya wini ga fortya fo mwa tarnabe enggalfe fona gam jesultef. Jepga Yesus jei ga aa bili, "Iye, fona Ap ke samfer Asis gulbana Ai Ajam telbif?"

8(4:7)

9Samarya wini jeiserem ga aa tamawolbana, "Aamei angtane Yahudimana, ane ai angtane Samaryamana. Jeje bafa Aamei ai ga as Im bili fos telbife?" (Anggwabura Yahudimana jei anggwabura Samaryamanaiserem jebar daamfennaber waakenfer jam naaweyan.)

10Yesus ga aa tamawolbili, "Aamei teisyena Uwa Sanbagiri is bas golbili, ane aamei teisyena Ai nansa aamei is Ajei bilirim fos telbife. Afa aamei tousaye, bunarsus As iner is bala fos telbife, ane Ai fona jem gwelaiserem isAs golbili."

11Wini jeiserem ga aa gutena, "Uwa, Imna wesyana fas, ane fo mwona aaiserem ga giri. Fona jem gwelaiserem jei ga Ifwir domola?

12Yakub asal-asal amna, jei ga fo mwona aaiserem as jei terbemil abe. Jei ga fona jener tesbemitowel jam telbife, jem tanem mesna, ane jem ofo mese aa jes taayinbilim. Aamei ke enggam Im gunu, 'Ai unggwan-giri Yakubminiwer.'?"

13Yesus ga aa tamawolbili, "Angtane fona aaiserem aa jei ne telbilirim, jei fo botona gamjon sege folbamini.

14Jengga fona Ai Ajes golminirim, fona jeiserem jes galserem galyan. Angtane fona Ai Ajes golminirim jeiserem jam gane telbilirim, jei gamjon fo botona jam ge folbamiyen jamer abak-abaksus, aam temawer fona ai Ajes golminirim, fona jeiserem ga fo mwafe jese fala jemnibe. Fona jeber-jeber jeweram sowetya, ane ga jei golmini waakenfer gwelaiserem jamer abak-abaksus."

15Wini jeiserem ga aa gutena, "Uwa, abe fona jeiserem ase golbi, jega ai fo botona gamjon as jam falbiyen, ane ai gamjon ajam warauyan aafe fos disultefe."

16Yesus ga wini jeiserem bili, "Gwanan im gwi, anggwana ilemana ga is gaariufenne, ane aaf ga is ge jela."

17Wini jeiserem jei ga tamawolbana, "Ai anggwana fas." Yesus enggam ga gutena, "Ijes bilirim ba bunaram, aamei anggwana fas.

18Aamei anggwana tafna gwiri ijamer ketawelabe, ane anggwana namwer ijebar ge nwinirim, jei im anggwayan. Gam jega taterisi jeiserem aamei ijes nasbilirim ba bunaram."

19Wini jeiserem enggam ga gutena, "Uwa, ai namwer am towaswena Aameiba nabisam.

20Asal-asala amnaiserem jei ga Uwa Sanbagiri aaf ne sembatawel taarena aaiserem, jengga anggwabura Yahudimana Imnaiserem, jei ga enggam ge gubili angtane Uwa Sanbagiri sene sembatawena kota Yerusalem jep fener."

21Yesus ga gutena, "Iye, taterisi Amnaiserem bunar, aamei jeter is taabili. Galap enggam se etamwesa: aamei Uwa Sanbagiri gemer is sembatananna, jengga taarena aaiserem jepyan, ane Yerusalemweryan.

22Aamei anggwabura Samaryamana, aamei teisyena Uwa Sanbagiri ijesa sembataunaram ijama towaswebayan. Ai anggwabura Yahudimana, ai Uwa Sanbagiri ajesa sembatanaram amsa towaswebana, aam temawer Angtane aa jei gam waakentababisinirim, Jeiba anggwabura Yahudiminiwer jela.

23Angtane Uwa Sanbagiri bunarsusfer aa jei gam sembatanaram, jei Uwa Sanbagiri enggam sene sembatasa ini seyaftersus gemerserem, ane ini bunarsusfer gemerserem ga jem sene sembatasa. Galap enggam gase etamwesa, ane namwer aas jepserem mesam towaiwena jam etamwefe. Uwa Sanbagiri Jei angtanes terelbaabili, angtane Jei aa jei ne sembatalaiserem.

24Uwa Sanbagiri Jeiba Mafnansam, ane angtane Jei aa jei ne sembatanaram, jei jamer gane sembatana enggame ini seyaftersus gemerserem, ane ini bunarsusfer gemerserem ga jem gane sembatana."

25Wini jeiserem jei ga Yesus ga aa bala, "Ai tousa Mesias, aa Jes ne balwenaram Kristus, Jei gase fortya. Jei Jam se forsanyaram, Jei ga taterisi Uwa Sanbagirmana seyafter gemerserem nebe ga nese nasbaipmisi."

26Yesus ga enggam gunu, "Aiba Jesam, namwer iJebar ge nasounaram."

27Jes galapserem ai angtane Yesus Jei ajeya tikwebaatinennerem ga aya warautna. Ai ga Yesus jep aya bitbitwebana, Jei wini jeiserem ga jebar ge nasowena. Jengga ai ajama tenebayan, "Ibas bili?" afa "Jeje bafa Aamei jebar Im ge nasouna?"

28Jepga wini jeiserem jei fo wesyana jemnaiserem jeber ga firultefala, ga aa sofwa kotanap. Jepga jei angtane jepmanaiserem enggam ga aa balbabitne,

29"Au, sa damta Angtane aaiserem Jei seyafter ai ajes eyebilintim ap ga as jes nasbili. Angtane jeiserem Jeiba engbar Kristusam, Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif?"

30Jepga angtane jeiserem jei ga kotana jewer ga aa ge sofobitye, ga aa ge jalbili Yesusminibe.

31Jes galapserem, ai angtane Yesus Jei ajeya tikwebaatinennerem, ai unggwanfer ga aya bala, "Guru, jase twen!"

32Jengga Yesus ga as enggam tamawolbaabili, "Amnibe tumilgala aare, aamei ijama towaswebiyen jem temawer."

33Jepga ai angtane Jei ajeya tikwebaatinennerem an ana ga aya taanaaminenne, "Fomfoma, angtane tumilgala Jebe afa ke mes ne gulbana?"

34Yesus ga as balbabili, "Tumilgala Amna jeba enggam, Uwa Sanbagiri aa gam gunurum, seyafter jeiserem ga Ai As eyebili. Uwa Sanbagiri Jei Amsam baftannunt, ane awelna Jemna Abe As jes gulbanantam, jeiserem ga As tabanulbono.

35Angtane enggam ge nasbawena, 'Angtane gane tonola, muara gamjon nawer-naura igi ga gane targabaabili.' Jengga Ai aamei isa enggam Ai balbabili, nwe sa ketate, makana aaiserem sa damtabi, igi mes ge berswebili, ane saf isa targabaabili.

36Angtane nananisi aa jei ne targabaabinennerem, jei doini mes ne tebabili. Jei nananisi aane targabaabili, ga aane orobili. Nananisi jeiserem ga aas, angtane waakenfer gwelaiserem jamer abak-abaksus aa jei ne domolaram. Ga jem temawer angtane aa jei tonolaram, ane angtane aa jei targabaabilirim, ini jemna saaser-saaserfer gam nulamini.

37Taterisi aaiserem angtane jeber-jeber aa jes ne nasbabiwenaram jeiserem ba bunaram, 'Afelnaiserem jam tonola, afelnaiserem jam targabaabili.'

38Ai ims baftabili nananisi bereiserem ga isa targabaabili. Aamei awelna jebe ijama gwebiyen. Angtane afwer awelna uskambar ne gwebili, ane aamei isa targabaabili jeiserem aa jes ne tonolaram mofabaner."

39Angtane Samaryamana unggwanfer kotana jeiserem jebe jei Yesus ne tebana, aam temawer wini jeiserem jei ga enggam gunu, "Jei seyafter ai ajes eyebilintim ap ga as jes nasbili."

40Jepga angtane Samarya jeiserem Yesusfar jame aa galap ge dorwebilirim, jei uskambar ne bala Yesus gwanan jebar ge nwinbefe. Ane Yesus jebar aa ge nwinbenerem nunu ga naura.

41Ane jepga angtane unggwanfersus jei Yesus ga aane tebana, aam temawer Jei Jener aa jewer towas-towastababilirim.

42Jei ga wini jeiserem ga aane bili, "Ai ga taterisi ijes bilirim ajama taabili. Jeke enggam aamei ijes nasbilirim jetefener, jengga ai aner amsama sarbasini, ane amsama towaswena enggame, Angtane aaiserem Jei bunar-bunarsus angtane ogirip aaiserem se waakentababisini."

43Nunu ga naura kotana jeiserem jam nwinibe, Yesus ga ona Galileyaminiwer ga aa sofwa.

44Yesus Jener gwanan mes gutena, "Angtane jei nabi jelemanaiserem jei jam ne sarbayan, aa jei ge nwinbenerem jebar tamna daamfennabe."

45Jengga Jei Galileyaminibe jame aa galap fornaram, angtane jepmana ini saaserfer ge folbamini Jei aa tebanaram. Jei mese kota Yerusalemwer mes ge sofobilint nunu Paska galapserem. Ane jei bwembwema seyafter Yesus aa jes eyebilintim jei mes ne domola jelem nweme.

46Jepga Yesus gamjon ga aa warauwa tamna Kana ona Galileyawer. Yesus Jei gwanan fos eyebilint anggurfe jam etamwefe tamna jeiserem jebe. Angtane awelna pemerintamana aa jei gam gwebilirim, jemna tane bwernabara kota Kapernaum je.

47Jei jame aa saram enggame Yesus Jei mes fortya ona Galileya je, ona Yudeyaminiwer jela, jei ga Yesusminip ga aa sofwa. Jei Yesus ga bunarsusfer sarwobana Jei Jam jalfe Kapernaum je, ane tane jemna gam waakentabaf, jei bwernabara amkom fom tere.

48Yesus angtane jeiserem ga bala, "Afa aamei Ai As ijama damtayanaye, Ai bwembwema unggwanfer As eyebilirim, aamei Ase ijama tebayan."

49Angtane jeiserem ga aa tamawolbana, "Tuhan, tatarfer Is jela, tane amna nalefe jei jam teryen."

50Yesus ga aa bala, "Se sofwe, tane imna jeiserem se gwena, jam teryen." Angtane jeiserem jei samfer taabili Yesus aa jes bilirim, jewer ga sofwa.

51Jamer nelep, angtane jemna awelna aa jei ne gweyibenennerem ga aa ge dorwebili, ane ga aane bala enggame, "Tane imna bwernabaraiserem jei mes waakenswena."

52Ane jepga jei aa tenebaabili, "Jema fomera tane jeiserem ga waakenswena?" Jei ga aa tamawolbana, "Ir gwere bolap, jema daamfenna, jemna bwerna ga aa barwebanant."

53Jepga jeta ga aa sarstaabona enggame, gwer mwongga jes jepserem Yesus jebar balant, "Tane imna jeiserem se gwena, jam teryen." Jepga jen jena ane jem wi tane mese seyafter Yesuster ga aane tebana.

54Yesus ga aa jela ona Yudeyaminiwer, ane Jei bwembwema aa eyebili naurabaraiserem ona Galileya je.


  Share Facebook  |  Share Twitter

 <<  Yohanes 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel