1Yaḇuk swarepen faro penetua-penetua rofandu mko, aya imnis min penetua ma saksi ḇaḇekandera Kristus, nari ḇesma kako rarwas ro baba, rofyor Kristus baba ḇyedi ḇyeḇefasna faro snonkakusya.
2Inja mkofarandows domba nai Allah ḇyesi ḇero mkororisya, kuker dafdifer awer, ḇape kuker sneḇemarisen imnis Allah marisen ḇyedi, ma mkosewar awer ḇaḇefainda, mboi mkuffarmyan kaku ḇeri.
3Mkofrur imnis awer raris mkomarisen mkoḇuk sasoser faro Allah domba ḇyesi ikyar faro mko kwar, ḇape mkoḇefasasna faro domba ansi.
4Ma rofyor Manfarandows Ḇebasyadi ani ryama, nari mkosma wower ḇesnaper fyoroya.
5Rarirya kako, ne, snonkbor mko, mkokunem faro mansarsya. Ma mkorunyae mko, snar sfas ro Refo radine: "Allah isampum ḇemararessya, ḇape iswar ḇerun snesya."
6Eḇedari rwun mankundaw faro Manseren ḇramin ḇesambraḇ ḇyesuya, insa ikanow mko rofafisu ḇyedi.
7Mkoḇuk makakwarek mkoḇena kam faro Allah, snar i ḇefaduru mko.
8Mkoḇaḇir ma mkepen mko! Snar mbroḇ mkoḇedi, Ibiris, imbran yar mura muma imnis raris singa (aiwan ḇeyan ḇepek) ḇeaur ma ḇesewar snonkaku fadoren ḇepek.
9Kosampum i kuker kakyar ḇedworen, snar mkofawi, naek srar Kristen kam ro supswan ine ḇesiper sḇar kandera ḇemnis kam.
10Ma Allah knam ro saswar-fakamaman nakam, ḇeyor mko kwar snar Kristus baba ḇyena ḇekain fyoroya nari fyasos ma isonem, ma ḇyuk samambraḇ ma syoser mko, rofyor mkosma kandera knik monda kwar.
11I ḇena papoik isof fyoro-fyoroya! Amin.
12Yafas syap ḇeknampu yedine faro mko kuker fafnoḇek ro Silwanus (Silas), yakara i ḇesnon Kristen oso ḇeḇeuser. Yamarisen yadif ma yaḇuk snekin faro mko mboi ine kada fakamaman Allah ḇenapes. Inja mkufepen fakamaman ani nadworen.
13Bati ḇena jemaat oser ro Babilon, Allah kyinfir si kako, sfarem aroo faro mko, rarirya kako romawa saswar ayedi Markus.
14Mkokofen arooyae faro mko kuker saswar imnis snon Kristen. Manseren ḇyuk aski faro mko kam ḇena Kristus i kada! Amin. Ro aya, Petrus