1Inja, Kristus isma kandera kwar imnis kandera ḇaḇesnonkaku, rarirya mko kako mkofasos romamun mkoḇena kuker kakara ḇeradine, -- snar mansesi ḇesma kandera ḇaḇesnonkaku, imnai kwar ro ifrur sasar, --
2insa fafisu ḇedawerya mkoḇuki ifrur awer marisen ḇaḇesnonkakuya, mboi mkoso Allah marisen ḇyedi.
3Snar fafisu nabor kwar mkoḇuki ifrur marisen snonkaku ḇefawi Allah ḇasya. Mkokenem kwar ro rmomen-nafsu, ḇaḇemasaser, munara ḇefnak pipi, farandinem ma syom karwar ḇeyarwarem.
4Rarirya si kandor snar mkoso si famkaksun ro aner raris kankenem sena ḇa, eḇedari sonef mko.
5Ḇape nari skarem faro Allah, ḇefasos kwar faḇeḇemankara faro ḇekenem ma ḇemarsya.
6Eḇedari Ankankinem Ḇeḇyeya ḇyeḇeḇaryas kako faro ḇemarsya, insa sḇemankara si kwar kako ro ḇaḇesnonkaku -- imnis raris nari snonkakusya kam semankara si -- insa sikenem imnis ḇaḇerurya, siso Allah marisen ḇyedi.
7Fafisu ḇepupesya ro roi ḇeḇor kam fyanam kwar. Inja mkepen mko ma mkoknon, ḇo mkoḇenadi.
8Ḇape ḇepon kakuya: mkoswaryae mko kaku ḇeri, snar saswarya ikawef sasar nabor kaku.
9Mkoḇuk moḇ ḇaḇeryaryae faro mko kuker sasurem ḇa.
10Mkuffarmyanyae mko, imnis raris fakamaman snonkaku oser-oser isma kwar imnis manfarkin ḇeḇye ro Allah saswar-fakamaman ḇyena.
11Rofyor snonkaku ono sawawos ido, sawos imnis ḇeḇuk Allah wos ḇyedi; rofyor snonkaku ono suffarmyan ido, sifrurna kuker samambraḇ Allah ḇyukna, insa Allah isma baba ro roi ḇeḇor kam snar Yesus Kristus. I ḇesma papoik ma babaya isof fyoro-fyoro! Amin.
12Naek srar yaswar kaku, mko kandor awer for ḇesber ḇerama ḇefrur kandera mko imnis manasnasen, imnis roi ḇeba oso isya kyur mko.
13Mkoryaḇ syadi, imnis kuker rarwas mkosma ro Kristus kandera ḇyedi, insa mko kako mkoryaḇ ma mkomarisen naba rofyor Kristus fyasna baba ḇyedi.
14Fainda faro mko, rofyor mkosma anonef snar Kristus snonsnon ḇyedi, snar Rur ḇeḇye, isoine Allah Rur ḇyedi isya ro mko.
15Snonkaku oso kako rofandu mko ḇyekandera awer snar myamun, roḇa kyaraw, roḇa ḇyarḇor, roba snar ifrur arubiru, snonkaku ḇese wos sena.
16Ḇape, rofyor isma kandera imnis snonkaku Kristen, imai awer, mboi isandik Allah snar snonsnon Kristus ani.
17Snar fafisuya ryama kwar fa-Allah ḇyemankara supswan ine. Ma Allah mankundi kawasa ḇyesiso nari ḇyemankara ḇepon kakusya. Ma rofyor ḇaḇemankara ani irandak maro ko, rariso kuker snonkaku ḇekyar ḇa faro Ankankinem Ḇeḇye ro Allah ani?
18Ro Refo sfas radine: "Rofyor ḇenapessya kermkuno kada sisma koreri ḇa, nari rariso kuker ḇeḇarḇor ma ḇesasarsya?"
19Eḇedari iḇye kako ḇesma kandera snar Allah marisen ḇyedi, ssḇuk rur sesi, ma sifrur roi ḇeḇye ḇesya kwar faro Ḇefrur siya.