1Rarirya kako mko ne, bin ḇefakawin kwar mkoya, mkokunem faro swa mkoḇesi, insa ono ro mko seuser Allah wos ḇyedi ḇa, mkokofen roi oso faro si awer mboi rari mkoḇena nafrur fasikyar kako,
2rofyor smam, kankenem ḇekaku ma ḇesren ro swa sesi.
3Karamas bena, karamas ro kankenem monda awer imnis raris famankor ofur, famankor ro brawen roḇa mkosansun sansun ḇepyum,
4mboi karamas ḇena nek ro sne ḇeyokef kuker karamas nari ḇero ḇa ḇeḇeknam ro rur ḇefafir ma ḇeknon, ḇeḇemaeja kaku ro Allah mamam ḇyedi.
5Snar ḇeponiwara bin ḇesrensya sfamankor si rarirya, isoine bin ḇena saneraro faro Allah; skunem faro swa sesi,
6imnis raris Sara ḇyesyowi Abraham ma nyiri ḇetuan ḇyedi. Ma mko kada mko ḇeromawa faroi, rofyor mkofrur roi ḇeḇye ido mkomkak awer faro rosairyawer kako:
7Rarirya kako mko, ne snon ḇefakawin kwar mkoya, mkokenem kuker fawawi faro swa mkoḇesi, imnis snonkaku ḇesambraḇ ḇa syadi! Mko ḇesyowi si snar mko kam nari mkosma saswar-fakamaman ro Allah, isoine kankenem, insa nadi mkoḇena royo idwarekna ḇa.
8Ma ḇarpurya, mko kam mkona wos oser, ḇaḇaḇir oser, mkoswaryae mko imnis manḇekanaek ma ḇerun sne,
9ma mkomunsu awer ḇarḇor kuker ḇarḇor, roḇa anonef-fanfadak kuker anonef-fanfadak, mboi mko kaḇer kuker mkor ḇaḇok ro Allah. Snar Allah dor mko insa mkosma ḇaḇok ro i.
10Ro Refo sfas radine, "Mansei ḇeswar kankenem ma bemarisen bemam ras ḇeḇye, depen sḇadon ḇyedi insa dawos roi ḇeḇye ḇa awer ma ikofen awer roi ḇeḇeankarkar.
11Ḇyinkwanbur roi ḇeḇarḇor ma ifrur roi ḇeḇye, syewar ḇaḇeaski isof isma i.
12Snar Manseren myamepen ḇeso marisen ḇyenasya, ma Manseren imnaf nadi sena; ḇape Manseren isampum ḇefrur ḇarḇorsya."
13Ma mansei nari ḇefrur ḇarḇor faro mko, rofyor mkomyaren mkofrur roi ḇeḇye?
14Ḇape mkosma kandera rariso wer kako snar ḇaḇenapnapes, nari mkosma aski. Inja mkomkak awer faro manseiryawer kako ma mkoradai awer.
15Ḇape mko ḇesyowi Yesus ro mkosnemna imnis Manseren! Rofafisuna kam mkofasos insa mkoḇuk kankarem faro mansei ḇefuken saneraro mkoḇena, ḇape iḇye kada kuker fawawi ma syowi,
16ma kuker sneuser ḇesren kaku insa rofyor ḇeyonef mko smam kankenem ḇeḇye mkoḇena imnis ḇeso Kristus, nari ḇeyonef ansi simai ro mankun si.
17Iḇye syadi koḇekandera snar kofrur roi ḇeḇye rofyor Allah imarisen roi ḇerarirya, ro kofrur ḇarḇor.
18Snar Kristus mankundi imar ḇeoser isof fyoro-fyoro snar snonkakusya sasar sena -- snonkaku oser ḇesasar ḇa imar sadwer ḇefrur sasarsya. Kristus ifrur rarirya insa dun ko faro Allah; smuni kwar imnis ḇaḇesnonkaku, ḇape ḇyeḇeḇawes kaḇer kwar imnis ḇaḇerurya.
19Ma Kristus Rur ḇyedi kako rya ḇyaryas Ankankinem Ḇeḇye faro rur-rur ḇero buisya,
20isoine rur snonkaku ḇeḇeuser Allah ḇa ro awar Nuh, rofafisu ani Allah ikḇaḇ ma iwaf Nuh fasasos jawara ḇyedi, faro snonkaku riwar monda ḇekenem ro faḇruḇ ani.
21Baboine mko kako mkosma kankenem snar sarḇer ani, isoine masi sren -- ḇeḇuk fasasren mamas ro baken ḇa, mboi faro fararyor sneuser ḇeḇye faro Allah -- snar kaḇaḇaḇ Yesus Kristus,
22ḇekain ro Allah ḇar raku ḇyedi, rofyor ḇyeḇekanow ḇeboiyaswa kwar ḇyuk sasoser faro malaikatsya kam, papoikna kam ma samambraḇna kam nkunem faroi.