1Ro awar ma fafisu fandun faneḇefas faro mko ḇa,
2snar mankun mko ḇardi mkofawi kwar, mboi ras Manseren ryamumaya imnisbos kaku ḇekaraw ro roḇna.
3Rofyor sikofen: Nakam neaski ma naknon -- ḇape fasaw kaku ḇaḇeraroya kyur si, imnis bin ḇemoḇesḇa oso iduf iḇedaḇen romawa ḇyedi.
4Ḇape naek srar, mkokenem ro pampanya ḇa, isof ras ani ryama ifrur kanandor mko imnis ḇekaraw oso,
5snar mko kam romawa ro sananai ma romawa ro meser. Koine snonkaku ro pampan roḇa snonkaku ro roḇ ḇa.
6Rarirya kenef awer imnis kawasa ḇese, mboi koḇaḇir ma kowaren.
7Snar ḇeyenefsya, senef ro fafisu roḇ ma ḇemsersya simser rofafisu roḇ.
8Ḇape koine, kawasa ro meser, iḇyekada koḇaḇir, kona kakyar ma saswar imnis sansun mankarmomen ma kona saswoi mankarmomen kakyar faro koreri.
9Snar Allah ḇyuk fakosma masasor ḇyedi ḇa, mboi kosma koreri snar Yesus Kristus, Manseren koḇedi,
10ḇemar kwar snar ko, insa kowarenke, roḇa kenefke, kokenem fnoḇek kuker Kristus.
11Rarirya mkanunyae mko ma mkosonemyae mko, imnis moḇ mkofrur ro baboine raya.
12Nkor faro naek srar, insa mkoḇesyowi ḇefararur sambraḇ rofandu mko, ḇefarkin ma ḇesonek mko snar Manseren;
13ma insa kaku ḇeri mkoḇeuser si kuker saswar snar fararur sena. Mkokenemyae ḇesya kwar kuker aski.
14Nkanun mko kako, naek srar, insa mkosonek ḇekenem kuker aunos ḇasya, mkawos sneprei faro ḇefafardunsya, mko ḇesanowarek ḇeryarḇasya, mkokḇaḇ faro snonkakusya kam.
15Mkoswarepen naḇye, insa snonkaku ono smunsu ḇarḇor kuker ḇarḇor awer, ḇape mkoḇesewar ḇesya kwar roi ḇeḇye, faro mko oser-oser ma faro snonkaku kam.
16Mkorayaḇ ḇesya kwar.
17Mkoḇenadi faswef.
18Mkokofen kasumasa ro roi ḇeḇor kam, snar Allah marisen ḇyedi faro mko ro Yesus Kristus.
19Mkofasye awer Rurya.
20Ma mkomamkyof awer ḇardadi Allah Rur ḇyedi ḇyukna.
21Mkomnasen roi ḇeḇor kam ma mkona ḇeḇyena.
22Ma mkoḇinkwanbur ḇarḇor syoso-syoso kam kada.
23Allah saswar-ḇaḇye ḇyedi fyasren mko kam kada mboi rur kenem fnoḇek baken mkoḇena, neḇefaduru mnis kuker farorewḇa faro raramuma ro Yesus Kristus, Manseren koḇedi.
24Allah i ḇeyor mko kwar ima ikaḇaḇaḇ, i kako nari ḇyefanamnis.
25Naek srar mkonadiwarek nko kada.
26Mkokofen aroo nkoḇenane faro naeksya kam ḇena kakyar oser.
27Kuker snonsnon ro Manseren yor kaku ḇeri insa mkowasya syap ine faro naeksya kam.
28Saswar-fakamaman ro Yesus Kristus, Manseren koḇedi, ryowus mko kam kada! Ro nko, Paulus, Silas ma Timotius