1Ḇarpurya, naek srar, nkor ma nkanun mko ro Manseren Yesus: Mkorower ro nko kwar rariso mkokenem insa mkofrur Allah marisen ḇyedi. Roi ḇerarirya ani mkoso i kwar, ḇape kaku ḇeri mkofrur i kada.
2Snar mkofawi kako fasasnai rosai nkoḇuk kwar faro mko ro snonsnon Yesus.
3Snar Allah marisen ḇyedi isoine ido: Insa mkokenem kuker saranden, isoine mkofrur farḇuk awer,
4inja mkono oser-oser dun bin oser faḇyeswa faro mankundi ḇardi insa ikenem kuker saranden ma ḇaḇesyowi,
5mboi kuker rmomen baken nafsu ḇa, imnis fararur ro snonkaku ḇefawi Allah ḇasya,
6ma insa roi ḇeradine kawasa sifrur awer roi ḇeḇyeḇa faro naek sesi roḇa seankar si. Snar Manseren nari myunsu roi nanekam, imnis nkokofen fasna faro mko ro ḇeponnya.
7Allah dorko insa kofrur roi ḇemamas ḇa, mboi roi ḇesren.
8Inja, mansei ḇesampum roi ḇeradine, isampum snonkaku ḇa, mboi isampum Allah ḇeḇuk Rur Ḇesren ḇyedi faro mko kako.
9Ro saswar manbekanaek fandun faneḇefas faro mko ḇa, snar mankun mko mkofarkor kwar saswaryae ro Allah.
10Roi ḇeradine mkofrurna kako faro naek mkoḇesi kam ro supya mnuk Makedonia ḇesiper. Ḇape nkanun mko, naek srar, insa mkofrur syadi kakuna wer.
11Ma mkokarana imnis ḇaḇesyowi oso faro kankenem ḇeknon, famkokara roi ḇekur mankun mko ḇardi ma mkosewar nanan ro mankun mko, imnis nkanun kwar faro mko,
12isof mkokenem raris snonkaku ḇeḇesyowi ro mamam snonkaku ḇese ma mkokasandem awer faro si.
13Naek srar nkomarisen insa mkakfawi kaku roi ḇekur snonkaku ḇemar kwar ansi; insa mkoḇarop awer imnis snonkaku ḇese ḇena kakyar ḇasya.
14Snar rofyor kokyar, mboi Yesus imar kwar ma ḇyeḇeḇawes wer, ma kokyar kako mboi ḇemar kwar ro Yesus nari Allah fyanjur si fasiwarpui.
15Nkokofen radine faro mko kuker Manseren wos ḇyedi: ma ḇekenem kaker koya isof Manseren raramuma ḇyedi nari kopon ḇemar ansya ḇaḇeri.
16Snar rofafisu ssḇuk aḇyair, isoine rofafisu mananir malaikatya kyaru ma Allah kḇur ḇyedi ryok, ma nari Manseren mankundi dado ro boiyaswa ma ḇemar ro Kristus nari sḇawes si ḇepon;
17raimnai, ḇekenem kaker koya, nari koḇe ḇekanow fnoḇek si ḇemandep ro farsyos sansoren fakosrow Manseren. Rarirya nari kowarpu Manseren isof fyoro-fyoro.
18Inja mkoḇuk snepreiyae faro mko kuker wos nane.