1Ananun yaḇuk ḇepon kaku: Insa mkoḇenadi, mkofararyor fafnoḇek ma mkokofen kasumasa faro Allah snar snonkakusya kam,
2ma faro waireksya ma faro ḇebararasya kam, insa kokenem kuker kananon ma aski, ro kakyar ma ḇaḇesyowi faro Allah.
3Naiso ḇeḇyena ma ḇefrur marisen faro Allah, Manfaspar koḇedi,
4ḇemarisen insa snonkakusya kam sisma koreri ma sifawi ro ḇaḇenapnapesya.
5Snar Allah ḇyeoser ma i ḇeḇemanfandu rofandu Allah ma snonkaku, ḇyeoser kako, isoine snonkaku Yesus Kristus,
6Yesus Kristus ḇyuk mankundi kwar imnis sasuref warek sasar ro snonkakusya kam: iso ḇeḇesaksi rofafisu ḇemnis kwar.
7Faro ḇaḇesaksi ani yaḇe ḇekinfir kwar imnis manbaryas ma manwawan -- roi yakofen nane kam, yasrer ḇa -- ma yamnis ḇeḇuk farkarkor faro ḇeḇe-Yahudibasya, ro kakyar ma ḇaḇenapnapesya.
8Eḇedari yamarisen, insa ro moḇna kam snonsya sḇenadi kuker sne ḇesren, kuker masasor ma sasurem ḇa.
9Rarirya kako binsya. Bin ansi sḇemaris faḇaḇye si mboi kuker syowi, ma snonburyam sena nbekapyai -- kapyai awer, semaris awer si kuker karamas brawen roḇa mustika roḇa kako sansun ḇekakur,
10ḇape ḇyemaris i kuker fararur ḇeḇye, imnis bin ḇesyus faro ḇaḇeariya.
11Iḇyesyadi binsya sḇefasis ro ḇinkunsi ma sisma farkarkor kaku ḇeri ma srun ḇinkunsi.
12Yaḇuk kaku ro binsya ḇa fasakḇuk farkarkor oroḇa kako yaḇuk kaku ḇa fasawawos syadi snonsya; iḇye sefasis ro ḇinkunsi.
13Snar Adam i sifrur ḇeponya, raimnai insape Hawa.
14Ma Adam i ḇesma fafrowesya ḇa mboi bin ani iso ḇesma fafrowes ma ḇesapi ro sasar.
15Rariryano, bin ani nari isma koreri snar aḇaḇen romawa, rofyor ḇyeuser kuker kakyar ma saswar ma ḇaḇesaranden ma ikenem faro Allah.