1Kaku ḇeri ro wos ine: "Snonkaku ḇemarisen nasan manfarkin ro jemaat imarisen snar fararur ine iḇye kaku."
2Eḇedari manfarkin ro jemaat iḇye snonkaku ḇefarorewḇa, snon ḇefakawin kuker bin oser, imkuser mankundi, ifawi nanem, ikenem kuker aunos, imarisen nya dakam, ifawi ḇyuk farkarkor,
3fyarandinem ḇa, ḇemasasor ḇa mboi ḇefafir, ḇewos sneprei, ḇermomen pipi ḇa,
4ifawi fyaduru kina ḇyesi kuker ḇaḇye, ma ḇyuk farkarkor faro romawa ḇyesi fasikenem kuker aunos ma sesyowi mankundi.
5Snar rofyor snon oso ifawi fyaduru kina mankundi ḇyesi ḇa, rariso nari fyaduru Allah jemaat ḇyena?
6Manfarkin ani snonkaku ḇeḇe-Kristen babo awer, insa imarares awer i, imbude isma fras imnis Ibiris ro ḇeponiwara.
7Snonkaku ḇesma snonsnon ḇeḇye rofandu kawasa, insa sonef awer i ma isapi awer ro Ibirisya denem ḇyedi.
8Rarirya kako (syamas) ḇefnoḇek ro jemaat iḇye snonkaku ḇesma syowi, mboi snonkaku ḇeḇeramar kasipḇa, snonkaku ḇefarandinem ḇa, snonkaku ḇermomen pipi ḇa,
9mboi snonkaku ḇekram kankunes kakyar ro sneuser ḇesren.
10Iḇye seḇemnasen ḇepon resari, rawo sfarorewḇa, insape sifnoḇek ro jemaat.
11Rarirya kako swa sesi bin ḇeḇesyowi, bin ḇeyawos anonef ḇa, iḇye fyarmkuser ḇinkundi ma ḇyeḇekyar ro roi ḇeḇor kam.
12Syamas (ḇefnoḇek ro jemaat) fyakawin bin oser ma fyaduru romawa ḇyesi ma kina ḇyena kuker ḇaḇye.
13Snar snonkaku ḇeyuffarmyan ro jemaat nari isma syowi ma nari imku ro ḇaḇesaksi kakyar sena faro Yesus Kristus.
14Yakyar nari yarakaki aw fasaw, rariryano yafas roi ḇeḇor nane faro aw.
15Inja, rofyor yasaryar ido, wafawi kwar rariso snonkaku sikenem imnis Allah kina ḇyesi, isoine jemaat ro Allah ḇekenem, adir kakyar ma knam napnapes.
16Ma kaku ḇeri kankunes ḇaḇeari koḇedi iba kaku: "Fyasna mankundi kwar ro ḇaḇesnonkakuya, Rurya fyasna irya kaku; ḇefasna mankundi faro malaikatsya. Ḇyeḇeḇaryas rofandu er-er ḇemamḇaḇir Allah ḇasya; ḇyeḇekyar ro supswan ḇesiper, ma ḇyeḇekanow ḇeboiyaswa."