Alkitab Mobile SABDA
[VER] : [BIAK]     [PL]  [PB] 
 <<  1 Timotius 6 >> 

1Kawasa Kristen ḇeḇewomensya skara tuan sesi sisyus fasisma syowi ḇeḇor kam, insa Allah snonsnon ḇyedi ma farkarkor koḇena nḇeḇeyonef awer.

2(2a) Rofyor tuan sesi snonkaku ḇeḇe-Kristen sirya, imbude soḇo semanbekanaek ro Kristus inja suffarmyan mnis siḇari, snar tuan ḇesma ḇok ro afuffarmyan ḇeḇye syadi wer, ikada naek ḇekyar ma koswar kaku. (2b) Buk farkarkor ma wanun roi nane kam.

3Rofyor oso ḇyuk farkarkor eḇese ḇemnis ḇa kuker farkarkor ḇenapes ro Manseren koḇedi Yesus Kristus -- ma iso farkarkor ḇemnis kuker ḇaḇeari koḇena ḇa,

4snonkaku ani imarares ḇo doḇo ifawi ḇape ifawi royoḇaḇeri. Dafduf ḇyedi isoine imarisen fyamfaḇri kuker wawos, ḇefrur masasor, anunḇesisye, anonef, warkaki ḇeḇyeḇa,

5ma anunḇesisye rofandu kawasa ḇekara mnisḇa ma ḇaḇenapnapes ḇa, skara ḇaḇeari ani sun oso ḇeḇuk ḇaḇefainda.

6Kakuḇaḇoi ḇaḇeari ani rofyor kofrur mnis i, ḇyuk fainda ḇeba.

7Snar kun roi oso ḇesupswan ineḇa rarirya kako nari kun roi oso ḇokosasyarbur supswan ineḇa.

8Rofyor roḇean ma sansun naisya, namnis kwar.

9Ḇape mansei ḇemarisen ḇenana nari isapi ro fafrowes, ro denem ma ro nafsu ḇeḇor ḇeḇebei ma ḇeyun raro. Nafsu anna nafrur fasnonkakusya sfarmambriwer ma sro.

10Snar ḇarḇor ḇeḇor nakam nerares ro mkaba pipiya. Snar sasewar pipi eḇedari snonkaku ono ssunkirbur kakyar sena ma sewayam mankunsi kuker ḇarop nabor.

11Ḇape, aw, ne, Allah snonkaku ḇyedi, nari rwoḇandibur roi ḇeḇor nane kam, mboi swewar ḇaḇenapnapesya, ḇaḇeariya, ḇaḇefarmkuya, saswarya, ḇaḇekaḇabaḇya ma ḇaḇefafafirya.

12Faḇri kada ro famfaḇri kakyar ḇenapesya insa nwa kankenem ḇekain fyoroya. Iso eḇedari beḇeyor kwar ma kwarem kwar kankarem ḇenapes ro ḇarpon saksi ḇeḇor.

13Ma ro Allah ḇarpon ḇyedi ḇeḇuk kankenem faro roi ḇeḇor kam ma ro Yesus Kristus ḇarpon ḇyedi ḇekarem kankarem ḇenapes ani kako ro Pontius Pilatus ḇarpon ḇyedi yaḇaryas faro mko:

14Mkoḇeuser sasoser nanekam, ma mkoḇeuk awerna, isof rofafisu Manseren koḇedi Yesus Kristus ifyaferya,

15isoine fafisu Allah nari fyasnaya ma fafisu ani ifo kuker aski, Wairek robo waireksya kam ma Tuan robo tuansya kam.

16Demir monda kyunem faro marmari ḇa, ḇekain ro isnai nari kofanam ba. Snonkaku osero ḇaim famyam i ma kaku ḇeri snonkakuyo nari myam i ḇa. Faroi syowi ma papoik isof fyoro-fyoro! Amin.

17Buk swarepen faro ḇenanasya ro supswan ine insa simarares awer si ma sikyar awer roi nari ḇero imnis nana, mboi sikyar faro Allah ro nana ḇyena ḇyukma ḇeko ro roi ḇeḇor fakona na.

18Buk swarepen faro si insa sifrur roi ḇeḇye, snana ro ḇaḇenapnapesya, simarisen ssḇuk ma sirarwas

19ma rarirya sfanjur arasa ono imnis knam ḇeḇye faro mankunsi rofafisu nari ḇeramaya insa sisma kankenem ḇekakuya.

20Ne, Timotius, faduru rosai yakofen kwar faro aw. Binkwanbur wawos ḇeḇebei ma ḇemamas ma ḇesren ḇa ma famfaḇri ḇaḇeknam ro rosai sap ḇefawawi,

21snar snonkaku ono sisya ssḇuk farkarkor rona ma rarirya ssayebur kakyarya. Saswar-fakamaman ndous mko kam kada! Ro aya, Paulus



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  1 Timotius 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel