1Mkomame! Allah iswar ko rarirya isof sap ko ḇeromawa ḇyesi; ma rarirya -- koine Allah romawa ḇyesi. Rarirya supswan ḇeḇarḇor ine sifawi koḇa, snar supswan sifawi Allah ḇa.
2Naek srar yaswar kaku! Baboine koine Allah romawa ḇyesi ko, ḇape rariso kuker ko, ima ḇyeḇefasnai ḇaim maro ko. Mboi kofawi rofyor Kristus ryama nari komnis i, snar nari komam kaku i.
3Snonkaku kam ḇena kakyar ine faro Kristus, iwaren mankundi insa isren kaku ḇeri ro sasar, imnis Kristus kako isren ro sasar.
4Mansei ḇefrur sasar, ḇyeuk Allah sasoser ḇyena; snar sasar ikada ḇaḇeuk Allah sasoser ḇyena.
5Ma mkofawi Kristus ryama faipyos snonkakusya sasar sena, ḇape ima dakḇesasar ḇa.
6Snar snonkaku kam ḇekenem ma ḇeḇeoser kuker Kristus, ifrur sawawek sasar ḇa. Ḇape snonkaku ḇefrur sawawek sasar, isrow Kristus ḇaim roḇaido ifawi Kristus ḇaim.
7Romawa yesi mko, mkomam monda awer ḇo manseirya kako ḇyeninyan awer mko. Mansei ḇefrur Allah marisen ḇyedi, ḇyeknam ro Allah, imnis Kristus ḇyeknam ro Allah kako.
8Mansei ḇefrur sawawek sasar ikada Ibirisya romawa ḇyedirya, snar Ibiris ifrur sasar ro randakya. Allah Rumkun ḇyedi ryama ḇesupswan ine insa kyakok Ibirisya fararur ḇyena.
9Snonkaku oser-oser ḇeḇeromawa faro Allah kwar, ifrur sawawek sasar ḇa, snar Allah papoik ḇyedi isya roi. Ma snar Kma ḇyedi Allah, inja ifrur sawawek sasar ḇa.
10Inekada aḇyair rofandu Allah romawa ḇyesi kuker Ibirisya romawa ḇyesi: Mansei ḇefrur Allah marisen ḇyedi ḇa, roḇaido iswar naek ḇyesi ḇa, ḇyeromawa Allah ḇaim.
11Snar ro randakya sḇair ḇaryas ine faro mko kwar: isoine mkoswaryae mko.
12Ma komnis awer Kain, ḇeḇeknam ro Ibiris isof myun ḇedar ḇyedi. Snaro Kain myun ḇedar ḇyedi? Snar roi ifrur na nsasar, ma roi ḇedar ḇyedi ifrur na nakada nanapes.
13Rarirya, naek srar yesi, mkokandor awer rofyor snonkaku ro supswan ine siyin mko.
14Kofawi kosasyar kwar ro marmar, ma baboine kokenem. Kofawi snar koswar naek koḇesi. Mansei ḇesaswar ḇa, ikada isya ro papoik marmarya.
15Mansei ḇeayin naek ḇyedi, ikada snon mamun, ma mkofawi snon oso myamun ikada nya kankenem ḇekain fyoroya ḇa.
16Rarirya kofawi Kristus saswar ḇyedi, isoine ḇyuk kankenem ḇyedi faro ko kwar; ma ko kako koḇuk kankenem koḇena faro naek srar koḇesi!
17Rofyor snon oso nya papus ro supswan ine, ma myam naek ḇyedi isma namnis ḇa, ḇape imewer fyasna fafnoḇek faro naek ḇyedi, rariso snon ani ikofen ḇo doḇo, iswar Allah?
18Romawa yena mko! Koswar monda awer kuker sḇadon roḇaido wawos. Ḇape koswar kuker saswar ḇekaku, kofasna ro fararur koḇena.
19Rarirya kofawi koḇeknam ro Allah, isof koknon ro ḇarpon Allah.
20Ma rofyor kosnesna nbaḇir kosasar, kofawi Allah ibasyadi ro kosnesna ma ifawi roi ḇeḇor kam.
21Inja naek srar ayesi yaswar kaku, rofyor kosnesna nbaḇir kosasar ḇa, kora faro Allah kuker kakyar.
22Ma rosai kor roi kosmana, snar koso sasoser ḇyena kam ma kofrur rosai imarisen na.
23Roi syoser maroko isoine: Kokyar faro Rumkun ḇyedi Yesus Kristus; ma koswaryae ko, imnis raris sasoser Kristus faro ko.
24Mansei ḇeḇesyowi Allah sasoser ḇyena, ḇyeoser kuker Allah, ma Allah ḇyeoser kuker si. Ma kofawi Allah ḇyeoser kuker ko snar Allah Rur ḇyedi ḇyuki faro ko kwar.