Alkitab Mobile SABDA
[VER] : [BIAK]     [PL]  [PB] 
 <<  1 Yohanes 2 >> 

1Romawayesi! Yafas roi nane faro mko insa mkofrur sasar awer. Ḇape rofyor ono sifrur sasar, ḇefnoḇek ko isoine Yesus Kristus, ḇenapes ani; nari iwos fandun koḇena ro ḇarpon Kmaya.

2Kuker fafnoḇek Yesus Kristus ani kosma ḇaḇepayasyos ro sasar koḇena. Ma kerer kosma payasyos ro sasar koḇena ḇa, mboi sasar ro kawasa kam ro supswan ine kako.

3Rofyor koḇeuser Allah sasoser ḇyena, irya kofawi Allah.

4Mansei ḇekofen ḇo ḇeyoḇo, "Yafawi Allah," ḇape ḇyeuser Allah sasoser ḇyena ḇa, snon ani dankar, ma Allah wos ḇekaku ḇyedi isya ro sne ḇyedi ḇa.

5Ḇape mansei ḇeḇeuser Allah wos ḇyena ido, iswar kaku Allah. Ine fyasna koḇeoser ma kokenem kuker Allah kwar.

6Mansei ḇekofen ḇo ḇeyoḇo, ḇyeoser ma ikenem kuker Allah, kankenem ḇyedi imnis raris Yesus kada.

7Naek srar yaswar kaku! Roi yafas nane sasoser ḇebabo naisya ḇa. Mboi sasoser ḇekwar ro randakya sikofen faro mko isoine wos mkorower ro Allah kwar.

8Ma roi yafas nane sasoser babo nairya kako; sasoser anna nfasna Yesus mankundi ma faro mankun mko kako; snar rofyor pampanya ipromes ma isnaiya iyar kwar.

9Mansei ḇekofen ḇo ḇeyoḇo, ima isya ro isnaya dori, ḇape dayin naek ḇyedi, ikada isya ro pampanya isof baboine.

10Mansei ḇeswar naek ḇyedi, ikada ikenem ro isnaiya, snar roi oso isya ro iḇa ḇefrur fanari snonkaku ḇese sifrur sasar.

11Ḇape mansei ḇeayin naek ḇyedi, ikada isya ro pampan, imbran ro pampanya, ma ifawi moḇ iḇe ryaḇeya ḇa, snar pampanya ifrur famyam ba.

12Yafas faro mko kam, ne, romawa yesi, snar sasar mkoḇena Kristus ipyos na kwar.

13Yafas faro mko kam, ne, kma yesi, snar mkofawi Allah, isya kwar ro awar madero. Yafas faro mko, ne, snonkbor mkoya, snar mkokafyo ḇarḇor Ibirisya kwar.

14Yafas faro mko kam, ne, romawa yesi, snar mkofawi Kmaya kwar. Yafas faro mko kam, ne, kma yesi, snar mko kam mkofawi wos ma ro awar madero isya kwar. Yafas faro mko kam, ne, snonkbor mkoya, snar mkosambraḇ ma Allah wos ḇyedi isya ro mkosnemna, inja mkokafyo Ibirisya kwar.

15Mkoswar awer supswan ine, roḇa rosai isya ro supswan ine. Rofyor mkoswar supswan ine, nari mkoswar Kmaya ḇa.

16Roi ḇeḇor ro supswan ine kawasa ḇesasarsya sirmomen na -- isoine roi ḇeḇor ḇeyun sne, isof sirmomen sna na, ma roi ḇeḇor sirmomen na insa ssḇuki darer mankunsi -- nane neknam ro Kmaya ḇa, mboi ro supswan ine.

17Supswan ine ma roi ḇeḇor kawasa sirmomen ro ina nari napromes. Ḇape snonkaku ḇefrur Allah marisen ḇyena, ikenem faswef isof fyoro-fyoro.

18Romawa yesi mko, awar papupesya fyanam kwar! Ma imnis raris sikofen ḇadir faro mko kwar, Kristus mbroḇ ḇyesi nari srama, rarirya baboine Kristus mbroḇ ḇyesi sikḇok kwar. Ine aḇyair ḇeko rofafisu Ras Ḇepupesya fyanam kwarya.

19Mbroḇ Kristus ḇyesi snonkaku ḇebur ko kwar, inja snonkaku koḇesisya ḇa. Snar sun ro rarwas koḇedi ido nari sisya kuker ko. Ḇape sisasyarbur ko, fyasnai oso ro si snonkaku koḇedisya ḇa.

20Ḇape Yesus Kristus ḇyuk Allah Rur ḇyedi fabyepoik mko kwar. Ma rarirya mko kam mkofawi Allah ḇenapesya.

21Inja yafas ine faro mko snar mkofawi Allah kwar, ma mkofawi Allah ḇenapes dankar ḇaim.

22Mansei ḇeḇeankarkar ani? Ḇeḇeankarkar isoine snonkaku ḇekofen ḇo ḇeyoḇo, Yesus Wairek Ḇeyun koreri raris Allah asas ḇyedi ḇa. Snonkaku ani Kristus mbroḇ ḇyedirya; ikada kyarem Kmaya ma Rumkunya ḇa.

23Mansei ḇekarem Rumkun ani ḇa, ikako nya Kmaya ḇa kako. Mansei ḇekarem Rumkun ani, ikada nya Kmaya kako.

24Snar rarirya ḇyaryas mkomnaf kwar ro randakya mkokara naḇye i ro mkosnemna. Rofyor mkokarai naḇye ḇaryas ani, nari mko ḇeoser kuker Rumkun ani ma Kmaya.

25Ma inekada Kristus mankundi ḇyeasas maroko isoine: Kankenem ḇekaku ḇekain fyoro.

26Rosai yafas nane kam nkur snonkaku ḇeḇesasewar ḇefarkor ninyan mkosya.

27Ḇape mankun mko ḇardi, Kristus isbawer Rur ḇyedi kwar faro mko. Ma rofyor Rur ḇyedi isya ro mko, inja fandunḇa fasnonkaku sfarkor mko. Snar Rur ḇyedi fyarkor mko ro roi ḇeḇor kam; ma rosai fyarkor na nkaku, ma nasrer ḇa. Rarirya, mkomarisen ma mkoḇesyowi Rurya rosai fyarkor na, ma mkomarisen mkoḇeoser kuker Kristus.

28Inja, romawa yena mko, mko ḇeoser kuker Kristus, insa rofafisu ryama, kuker kakyar nari komku ro ḇarpon ḇyedi, ma koḇaḇir komai ḇa.

29Mkofawi kwar Kristus ikenem ma iso Allah marisen ḇyedi. Snar rarirya mkofawi kako snon oso ikenem ma iso Allah marisen ḇyedi, ikada Allah romawa ḇyedirya.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  1 Yohanes 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel