1Syap ine kyur Wos ḇeḇuk kankenem, isoine Wosya isya kwar roawar madero. Nkomnaf i kwar, ma nkomam i kwar, kuker nkomkasna. Nkomami kwar ma nkuf i kwar kuker nkoḇrasna.
2Rofafisu kankenem ani ḇyeḇefasnai, ma nkomami kwar. Rarirya nkoḇesaksi i ma nkoḇaryas faro mko kankenem ḇekaku ḇekain fyoro, isya fnoḇek Kmaya, ma sfasnai kwar faro nko.
3Rosai nkomam kwar ma nkorower, ikada nkokofen ḇadir faro mko kako, insa mkoḇeoser kuker nko ma koso Kmaya ma Rumkun ḇyedi, Yesus Kristus.
4Ma nkofasna kam faro mko, insa kosnesna namarisen kaku ḇeri.
5Wos nkosma kwar ro Allah Rumkun ḇyedi ma nkoḇuk faro mko isoine: Allah ikada isnai, ma pampanya isya ro iḇaḇeri.
6Rofyor kokofen ḇo koḇo, mboi koḇeoser kuker i, ḇape kokenem ro pampan, koḇeankar iḇye ro wos ma fararur koḇena kako.
7Ḇape rofyor kokenem ro isnai imnis raris Allah isya ro isnai kako, nari kosma ḇaḇeoser kuker snonkaku ḇesesya, ma Allah Rumkun ḇyedi, Yesus rik ḇyena, nfasren sasar ḇeḇor koḇena kam.
8Rofyor kokofen ḇo koḇo, kosasar ḇa, koḇeankar mankun ko ma napnapesya isya ro koḇa.
9Mboi rofyor kokarem sasar koḇena faro Allah, nari ḇyuk raris asas ḇyedi ma ifrur rosai ḇenapes. Nari ipyos sasar koḇena ma fyasren ko ro ḇarḇor ḇeḇor koḇena.
10Ḇape rofyor kokofen ḇo koḇo, kosasar ḇa, kofrur Allah imnis raris ḇeḇeankarkar; isoine kokram Allah wos ḇyena ro kosnesna ḇa.